1 USAMYELA 12 - IsiNdebele 2012 Translation

USamyela ubeka ikulumo yokulayelisa

¹ USamyela wathi ku-Israyeli woke: “Nginilalele kikho koke enikukhulume kimi bengabeka nekosi phezu kwenu.

² Gadesi-ke ninekosi eniphetheko. Mina-ke sengimdala, sengithukghele: Amadodanami ziintanga zenu. Soloko ngathoma ebutjheni bami ukuba mrholenu bekube gadesi.

³ Nakhu lapha ngikhona namhlanjesi, vezani ubumbi bami phambi kwakaSomnini naphambi kozesiweko wakhe. Ngakhe ngathatha ikomo kabani na? Ngakhe ngathatha udumbana kabani? Ngubani phakathi kwenu engakhe ngamgalaja na? Ngubani engakhe ngamgandelela? Ngubani owakhe wangifumbathisa kobana ngicimeze na? Nange kukhona enye yezinto kilezi engizitjhwileko engiyenzileko, ngizayilungisa.”

⁴ Abantu baphendula bathi: “Azange khewusigalaje namkha usigandelele. Azange khewufunjathiswe.”

⁵ USamyela wathi: “USomnini ungufakazi nozesiweko wakhe ungufakazi namhlanje kobana nithe azange ngenze litho elimbi.” Abantu bathi: “Iye, uSomnini ngufakazi.”

⁶ Yeke uSamyela wathi ebantwini: “Niyazi bonyana nguSomnini owakhetha uMosi bano-Aroni bewenyula naboyihlomkhulu eGibhide.

⁷ Yeke yizani emlandwini, ngizokufakazela uSomnini ngokutjho koke okuhle akwenza kini naboyihlomkhulu:

⁸ Emva kobana uJakopo nabantu bakhe bangene eGibhide, balilela uSomnini kobana abasize. USomnini wathumela uMosi no-Aroni abafika babakhupha aboyihlomkhulu eGibhide babahlalisa kilendawo.

⁹ Kodwana bakhohlwa uSomnini uZimabo, yeke wabanikela esandleni sakaSisera, induna yebutho lakaRhatsoro, nezandleni zamaFilista nekosini yakwaMowabi eyalwa nabo.

¹⁰ Balila kuSomnini bathi, ‘Sonile, satjhiya uSomnini sayokulotjha aboBhali nabosingazimukazi abo-Atjhitarothi. Kodwana yewusisindise esandleni sezitha zethu, yeke sizakulotjha.’

¹¹ Nje-ke uSomnini wathumela uJerubhali, uBhedani, uJafta nami Samyela, wanihlangula ezitheni zenu mahlangothi woke, yeke naphila nibulungekile.

¹² Kodwana kwathi lokha nanibona uNarhatjhi ikosi yama-Amoni ijamelene nani, nathi kimi, ‘Awa, thina sifuna ikosi ezasibusa,’ nanyana uSomnini uZimu bekaseze ayikosenu nje.

¹³ Arha-ke, naso-ke ikosi enizikhethele yona nenithe niyayifuna; uSomnini uninikele ikosenu leyo.

¹⁴ Nanesaba uSomnini uZimu, nimlotjhe, nimlalele ningakhunyalali niphikisane nemithethwakhe begodu nimlandele nina nekosi enibusako, uSomnini uzakuba nguZimenu.

¹⁵ Kodwana naningalaleli uSomnini begodu nanikhunyalalako nijamelane nemithethwakhe, nizazizwa; isandla sakhe sizakuba phezu kwenu njengombana kwenzeka kiboyihlomkhulu.

¹⁶ Akhenijame-ke, umlandu awukapheli. Qalani bona kukhulu kangangani uSomnini azokwenza phambi kwenu:

¹⁷ Akusisikhathi sokuvuna ikoroyi lesi na? Ngizakubiza uSomnini kobana athumele umdumo nezulu. Yeke nizakulemuka bonyana yimbi kangangani into eniyenze phambi kwakaSomnini ngokuzibawela kwenu ikosi.”

¹⁸ Ngambala uSamyela wabiza uSomnini, khona mhlokho uSomnini wathumela umdumo nezulu. Boke abantu besaba khulu uSomnini noSamyela.

¹⁹ Boke abantu bathi kuSamyela: “Yewusirabhelela thina nceku zakho kuSomnini uZimakho; kobana singafi ngombana sithe sinezono, sazingezelela ngokuzibawela ikosi.”

²⁰ USamyela waphendula wathi: “Ningesabi, vele; ukona khona nonile, kodwana ningamhlubuki uSomnini, mlotjheni ngeenhliziyo zenu zoke.

²¹ Ningaphendukeli kibosingazimu abanganabubhadekelo. Akunanto abanganisiza ngayo begodu angeze banisindisa ngombana abanabubhadekelo.

²² Ngebanga lebizo lakhe elikhulu uSomnini akazukubalahla abantu bakhe ngombana wakuthabela ukunenza bona nibe ngebakhe.

²³ Mina angizukona phambi kwakaSomnini ngokubhalelwa kunirabhelela. Begodu ngizanifundisa indlela ehle nelungileko.

²⁴ Yesabani uSomnini begodu nimlotjhe ngokwethembeka, ngeenhliziyo zenu ezipheleleko, nikhumbule izinto ezikulu anenzele zona.

²⁵ Kodwana nanikhunyalalako nenza ubumbi, nina nekosenu nizazizwa, nizakutjhabalaliswa.”