1 USAMYELA 10 - IsiNdebele 2012 Translation

¹ USamyela wathatha ikwana yamafutha we-oliva wawathela phezu kwehloko kaSawula, wamgona wathi: “USomnini uzese ubaba bona abe mbusi phezu kwelifa lakhe.

² Namhlanje nawusuka kimapha, uzokuhlangana namadoda amabili hlanu kwethuna lakaRarheli; eTselitsarha ngemaphelelweni wenarha yakwaBhenjamini. Azakuthi kuwe: ‘Abodumbana obugade ubafuna sebafunyenwe. Noyihlo selebe alisile nokucabanga ngabo, kodwana utshwenyeke khulu ngani. Ubalabala uthi, “Maye mina bo; ngendodanami!” ’

³ Nawusuka lapho uzakuragela phambili bewufike emthini omkhulu weThabori. Uzakuhlangana namadoda amathathu enyukela kuZimu eBhethe-Eli. Enye izabe itjathe iimbuzana ezintathu, enye iphethe amagedzu amathathu wezikwa ezindulungu, enye iphethe umjeka wewayini.

⁴ Azakubuza amavuko abe akuphe amagedzu amabili wezikwa, uwamukele.

⁵ Emva kwalokho uzakuya eGibeya lakaZimu lapha kunesiqhema samajoni wamaFilista khona. Kuzakuthi nawuvelela emzini, uhlangane nabafundi bomphorofidi behla babuya esidulini bancinza imihlobohlobo yamaharibha, balilisa abosotjherere neemfludu; basemmoyeni wabaphorofidi.

⁶ UMoya kaSomnini uzakwehlela phezu kwakho, nawe ube semmoyeni wabaphorofidi bewutjhuguluke ube ngomunye umuntu.

⁷ Nasele kuzaliseke amatshwayo lawa, yenza okusemandlenakho ngombana uZimu unawe.

⁸ Khamba phambi kwami wehlele eGiligali. Ngiyaqinisa bonyana ngizokulandela ngizokwenza umhlabelo wokutjhiswa nomnikelo wetjhebiswano, kodwana ulinde amalanga alikhomba bengifike kuwe ukuze ngikutjele lokho ofanele ukwenze.”

⁹ Kuthe lokha uSawula nafulathela uSamyela, uZimu watjhugulula ihliziywakhe; bekwathi woke amatshwayo azaliseka khona mhlokho.

¹⁰ Nabafika eGibeya, wahlangana nabafundi bomphorofidi. UMoya kaZimu wehlela phezu kwakhe, naye wavukwa mumoya hlangana nabo.

¹¹ Boke agade bamazi ngaphambilini, lokha nabambona avukwe mumoya hlangana nabanye abaphorofidi babuzana bodwa bathi: “Yintobani engene kumsa kaKhitjhapha? Kanti noSawula sele ahlangana nabaphorofidi na?”

¹² Umuntu walapho waphendula wathi: “Njekhona ngubani umphathabo?” Yeke intwele yaphenduka isaga sabo sokuthi: “Kanti noSawula sele ahlangana nabaphorofidi na?”

¹³ Emva kobana uSawula selaqaqulukile emmoyeni, wenyukela esidulini.

¹⁴ Usonghwanakhe wabuza uSawula nencekwakhe wathi: “Beniyephi?” USawula wathi: “Besiqalana nabodumbana, kodwana kuthe nasibona singababoni saya kuSamyela.”

¹⁵ Usonghwanakhe kaSawula wathi: “Akhutjho-ke, uSamyela utheni kini?”

¹⁶ USawula waphendula wathi: “Usiqinisekisile bonyana abodumbana bafunyenwe.” Kodwana akhange amtjele usonghwanakhe bona uSamyela utheni ngobukhosi.

USawula ubekwa bona abe yikosi

¹⁷ USamyela wabiza abantu bakwa-Israyeli bona beze kuZimu eMitsipha.

¹⁸ Wathi kibo: “Nakhu okwatjhiwo nguSomnini uZimu wakwa-Israyeli, ‘Ngimi enganyula u-Israyeli eGibhide. Nganihlenga emandleni wamaGibhide nemandleni wayo yoke imibuso eyanigandelelako.’

¹⁹ Kodwana nina namhlanjesi nilahle uZimenu owanisindisa kizo zoke izehlakalo nemitlhagwenu, nathi, ‘Awa, thina sifuna ikosi ezosibusa.’ Yeke zihleleni phambi kwakaSomnini ukuya ngeenkoro zenu nangemindenenu.”

²⁰ Lokha uSamyela nabandameza iinhloko zeenkoro zakwa-Israyeli ngaphambili, ikoro yakwaBhenjamini yadliwa yifumbe.

²¹ Wabese ubandameza ikoro yakwaBhenjamini ngaphambili ngemindenayo, umndeni wakaMatri wadliwa yifumbe. Ekugcineni uSawula umsa kaKhitjhi wadliwa yifumbe. Kodwana kwathi lokha nafunwako wangatholakala.

²² Babuza godu kuSomnini bathi: “Umuntu loyo selafikile na?” USomnini wathi: “Iye, ubhace hlangana nemithwalo.”

²³ Bagijima, bamrhubhulula beza naye, wajanyiswa hlangana nabantu wabonakala avele ngehloko amude kunabo boke abanye.

²⁴ USamyela wathi kibo boke abantu: “Niyambona umuntu uSomnini amkhethileko na? Hlangana nabantu boke akakho ofana naye.” Abantu barhuwelela bathi: “Bayede kosi!”

²⁵ USamyela wahlathululela abantu ilungelo lobukhosi. Walitlola emsongweni, wawubeka phambi kwakaSomnini. USamyela wabese uphadlhalaja abantu; omunye nomunye waya kwakhe.

²⁶ USawula naye waya kwakhe eGibeya, aphekelelwa madoda anesibindi nathintwe nguZimu.

²⁷ Kodwana abanye abaphehli benturhu bathi: “Umrhali lo angasisindisa njani?” Bamnyaza bebamdima amalotjhiso. Kodwana uSawula wavala phetjheya.