1 USAMYELA 1 - IsiNdebele 2012 Translation

Ukubelethwa kwakaSamyela

¹ Kwakukhona umuntu weRamatayimi, umTsufi weentabeni zakwa-Efrayimu. Ibizo lakhe bekungu-Elikhana, ayindodana kaJerohamu umsa ka-Elihu omsa kaTohu umsa kaTsufi umEfrate.

² Ubenabafazi ababili, ibizo lowokuthoma bekunguHana, ibizo lowesibili kunguPhenina. UPhenina gade anabantwana, uHana yena anganabo.

³ Qobe mnyaka indoda le beyenyuka emzini wekhabo iye eTjhilo bona ilotjhe beyenze umhlabelo kuSomnini uMninimandlawoke. Kileyondawo amadodana amabili ka-Eli, okutjho uHofni noFiniyasi, gade abaphristi bakaSomnini.

⁴ Ngaso soke isikhathi lokha u-Elikhana nakenza umhlabelo, gade anikela uPhenina umkakhe namadodanakhe namadodakazakhe woke, izabelo.

⁵ Wanikela uHana isabelo esikhethekileko ngombana gade amthanda khulu. Nokho uSomnini gade avale isibeletho sakhe.

⁶ UPhenina, ogade ajamelene naye, wamkokomeja kobana azinyaze ngombana uSomnini gade amvale isibeletho.

⁷ Kwabanjalo iminyaka ngeminyaka: Lokha uHana nakenyukela endlini kaSomnini, uPhenina wamkokomeja bekwabhala bona adle.

⁸ U-Elikhana umyenakhe wathi: “Hana, ulilelani? Kubayini ungadli? Ihliziywakho isilingekeleni? Angisingcono kunamadodana alitjhumi kuwe na?”

⁹ U-Eli gade ahlezi esitulweni emathurini wethempeli lakaSomnini. Selebadlile bebasela, uHana wasikima,

¹⁰ amunyu emphefumulweni, wathandaza kuSomnini alila isibibithwana.

¹¹ Wafunga isifungo wathi: “Somnini, Mninimandlawoke! Nange nangambala ungaqala ukutshwenyeka kwencekukazakho godu ukhumbule ungakhohlwa incekukazakho bese upha incekukazakho umntwana womsana, ngizambuyisela kuSomnini ipilwakhe yoke notjhefana angathinti ehlokwakhe.”

¹² Kwathi asathandaza ngokuqinisela phambi kwakaSomnini, u-Eli wayelelisisa umlomakhe.

¹³ Kodwana uHana gade abubula ngehliziywenakhe, bekusikinyeka iimbhena zomlomo kwaphela, ilizwi lakhe lingazwakali. U-Eli wacabanga bona udakiwe.

¹⁴ U-Eli wathi kuye: “Uzakudakwa bekube nini? Akhe ulise ubudakwa bakhobu!”

¹⁵ UHana waphendula wathi: “Awa kosami! Ngimfazi onommoya owurubajekileko. Angikaseli iwayini nanyana utjwala. Bengizibubula phambi kwakaSomnini.

¹⁶ Ungalinganisi incekukazakho nomfazi okhohlakeleko; kungesibanga sobuhlungu namatshwenyeko bona ngikhulume kangaka.”

¹⁷ U-Eli waphendula wathi: “Yewukhambe ngokuthula. UZimu ka-Israyeli uzakupha okubawileko kuye.”

¹⁸ UHana wathi: “Incekukazakho ayifunyane umusa emehlwenakho.” Wasuka-ke wakhamba, wadla, ubuso bakhe akhange busatjhitjhibala.

¹⁹ Bavuka ngamasa, balotjha phambi kwakaSomnini, bagodukela ekhabo eRama. U-Elikhana wangena kumkakhe uHana. USomnini wamkhumbula;

²⁰ waba sidisi uHana. Sesifikile isikhathi, wabeletha umsana. Wamthiya ibizo lakaSamyela ngombana wathi: “Ngimbawe kuSomnini.”

USamyela ubuyiselwa kuSomnini

²¹ Umuntu loyo, u-Elikhana wenyuka nendlwakhe yoke ukuyokwenzela uSomnini umhlabelo weminyaka nokuzalisa isifungo sakhe.

²² UHana akhange enyuke ngombana wathi emyeninakhe: “Ngizakuhlala umntwana abe akhunyulwe, khona-ke ngizamusa bona abonakale phambi kwakaSomnini, ahlale khona isiphelani.”

²³ U-Elikhana umyenakhe wathi kuye: “Yewenze okuhle okubonako. Hlala ubumkhumule. Kwanga uSomnini angakusiza.” Kwabanjalo, umfazi wahlala wakhulisa umtwana bewamkhumula.

²⁴ Selamkhumulile wanyukela ethempelini lakaSomnini eTjhilo nomndenakhe. Bakhamba nekunzi eneminyaka emithathu nopumpana wepuphu yamabele nomjeka wewayini. Umsana gade asesemncani.

²⁵ Bahlaba ikunzi, umntwana bamusa ku-Eli.

²⁶ UHana wathi: “E, kosami! Kwamambala ngimi umfazi owajama lapha phambi kwakho ngathandaza kuSomnini.

²⁷ Umsana lo, ngangimthandazela. USomnini wanginikela engikubawileko kuye.

²⁸ Nami-ke ngimnikela kuSomnini isiphelani ngombana ubawiwe kuSomnini.” Balotjha uSomnini lapho.