1 UPITROSI 5 - IsiNdebele 2012 Translation

Umhlambi kaZimu

¹ Nje-ke, njengomphathi nofakazi weenhlupheko zakaKrestu, begodu nanjengaloyo omhlanganyeli wephazimulo ezakwambulwa, ngincenga abaphathi phakathi kwenu, ngithi:

² Yelusani umhlambi kaZimu eniwuphetheko, ingasi ngokugandelelwa, kodwana ngokuthanda kwehliziyo njengombana uZimu athanda bona nenze, ingasi ngenzuzo elihlazo, kodwana ngetjisakalo yokuzinikela.

³ Ningazenzi amakhosi kilabo enibaphetheko, kodwana nibe ziimbonelo emhlambini.

⁴ Kuzakuthi mhlana uMelusi omkhulu abonakalako, nizuze isihlohlo sephazimulo esingabhabhukiko.

⁵ Ngendlela enjalo nani lutjha, thobelani abadala. Noke yembathani ukuthobelana ekusebenzisaneni kwenu omunye komunye ngombana: “UZimu ujamelene nabazikhukhumezako. Kodwana ubehlisela umusa abazithobileko.”

⁶ Nje-ke zithobeni ngaphasi kwesandla esinamandla sakaZimu, khona azaniphakamisa ngesikhathi esifaneleko.

⁷ Fumbelani woke amatshwenyeko wenu kuye ngombana yena uyanikhathalela.

⁸ Zikhalimeni nihlale niqaphile; isitha senu uSathana utjhagala hlangana nani njengengwenyama ebhodlako, efuna ezomrhiribidela.

⁹ Jamelanani naye ninzinzile ekukholweni ngombana niyazi bona abazalwana benu ephasini loke bangaphasi kokubandezeleka okunjalo.

¹⁰ Kodwana ngemva kokuhlupheka kwesikhatjhana, uZimu womusa woke owanibizela ephazimulweni engapheliko kuKrestu, yena ngokwakhe uzanivuselela, anisekele, aniqinise abe anakhe.

¹¹ Akube kuye amandla nini nanini. Amen.

Isiphetho

¹² Nginitlolele incwajana efitjhani le ngisizwa nguSilvanu engimthatha njengomfowethu othembekileko; nginikhuthaza, ngifakaza kobana koke lokhu kumumusa weqiniso kaZimu, yeke kakarelani kiwo.

¹³ Ibandla leBhabheli elikhethwe kanye nani, liyalotjhisa. UMarkosi indodanami naye uyalotjhisa.

¹⁴ Bingelelanani ngokubingelela okukhethekileko nokunethando. Ukuthula akube nani noke nina enikuKrestu.