1 UPITROSI 4 - IsiNdebele 2012 Translation

Ipilo etja

¹ Njengombana uKrestu wahlupheka enyameni, nani hlomani ilemuko elinjalo ngombana ohluphekileko enyameni ukulisile ukona.

² Ngalokho esikhathini sokuphila kwakhe asesenyameni, akasaphili eenkanukweni zabantu, kodwana sele aphila ngentando kaZimu.

³ Iye, isikhathi esidlulileko besanele ukwenza okuthandwa ngabatjhili, niphila emanyaleni, eenkanukweni, ebudakweni, ekurhiribideleni, ematjhadeni nekulotjheni abosingazimu ekuyinto esinyenyiso.

⁴ Bayarareka ngokungasahlanganyeli nabo ematjhadeni wokuziphatha ngameswe kwabo nokuthukana.

⁵ Kodwana kuzakufanela bona baziphendulele kiloyo osele alungele ukugweba abaphilako nabafileko.

⁶ Ngilokho okwabangela bona ivangeli litjhunyayelwe nakabafileko ukuze bagwetjwe enyameni njengabantu boke kodwana baphile kuZimu ngokommoya.

Abaphathi abalungileko bezipho zakaZimu

⁷ Ukuphela kwezinto zoke kubandamele, yeke ncamani nizikhuze ukuze nikwazi ukuthandaza.

⁸ Kikho koke lokhu, thandanani ngombana ithando lisibekela izono ezinengi.

⁹ Yamukelanani ngaphandle kokurhonona.

¹⁰ Loyo naloyo owamukele isipho somusa, akasisebenzise ukusiza abanye njengenceku elungileko yomusa owandileko wakaZimu.

¹¹ Okhulumako akakhulume kube njengokwamezwi kaZimu, osebenzako kube njengokwamandla uZimu amuphe wona ukuze kikho koke kudunyiswe uZimu ngoJesu Krestu. Kuye akube lidumo namandla nini nanini. Amen.

Ukuhlupheka komKrestu

¹² Bazalwana, ningarareki ngokulingwa okubuhlungu kangaka enikuzwako, kube sengathi nehlelwa ziziga.

¹³ Kodwana thokozani njengabahlanganyele noKrestu eenhlungwini ukuze nani nisase mhlana iphazimulwakhe yembulwako.

¹⁴ Nibusisiwe nabanithukako ngebanga lebizo lakaKrestu ngombana uMoya wephazimulo newakaZimu uphezu kwenu.

¹⁵ Akungabikhona kini ohlupheka ngombana ambulali, alisela, iselelesi namkha osibhidlamnyanya;

¹⁶ kodwana nangabe nihlupheka ngombana nibalandeli bakaKrestu, ningabi neenhloni ngalokho, kodwana dumisani uZimu ngombana nibizwa ngebizwelo.

¹⁷ Sekusikhathi sokobana ukugwetjwa kuthome endlini kaZimu. Alo, nakube kuthoma ngathi sizokuba yini isiphetho salabo abangalaleli ivangeli lakaZimu?

¹⁸ Umtlolo uthi: “Nakube kulikhuni bona umuntu olungileko asindiswe, alo, kangangani-ke kokhohlakeleko nosisoni na?”

¹⁹ Yeke akuthi labo abahlupheka ngentando kaZimu, bathembele kuMdali othembekileko, baragele phambili ngokwenza okuhle.