1 UPITROSI 3 - IsiNdebele 2012 Translation

Abafazi namadoda

¹ Ngokunjalo nani bafazi, thobelani amadodenu ukuze kuthi nanyana kukhona amanye angalaleli ilizwi, azuzeke ngaphandle kwekulumo, kodwana ngokuziphatha kwabafazi bawo,

² lokha nakabona ikambo yenu ehlanzekileko nehloniphekileko.

³ Ukuhloba kwenu akungabi ngekwangaphandle kokweluka iinhluthu nokokwembatha izambatho zegolide namkha zakanokutjho.

⁴ Kodwana ukuhloba kwenu akube ngokomuntu wangaphakathi, iye, ngobuhle obungapheliko bommoya wesizotha nothobekileko, okuyinto eligugu phambi kwakaZimu.

⁵ Mbala, leyo yindlela abafazi bekadeni abacwengileko nebebabeka ithemba labo kuZimu, ebebahloba ngayo. Bebathobela amadodabo,

⁶ njengoSara obegade athobela u-Abrahamu abe ambize ngekosi. Nani-ke senibe madodakazakhe mlunga nje nenza okulungileko, ningesabi ilitho.

⁷ Ngokunjalo nani madoda, philisanani nabo ngokubazwisisa, nibacabangele ngokwazi bona babuthakathaka begodu nabo baziindlalifa zomusa wokuphila kanye nani; kwenzeni lokho ukuze imithandazo yenu ingaliyeki.

Ukuhlupheka ngebanga lokulungileko

⁸ Kokugcina yibani mmoya munye noke, nizwelane, nithandane, nibe nehliziyo enesisa nokuthobeka.

⁹ Ningabuyiseli ubumbi ngobumbi namkha ihlamba ngehlamba; kunalokho buyiselelani ngokubusisa ngombana nabizelwa ukwenza njalo ukuze nizuze isibusiso.

¹⁰ “Loyo othanda ukuphila nokubona amalanga amahle, akalonde ilimu lakhe ebumbini, neembhena zakhe ekukhulumeni ikohliso.

¹¹ Akatjhide ebumbini enze okulungileko; akafune ukuthula akulandelele.

¹² Mbala amehlo kaSomnini aphezu kwabalungileko, iindlebe zakhe zivulekele imithandazwabo, kodwana ubuso bakaSomnini bujamelene nalabo abenza ukukhohlakala.”

¹³ Alo, ngubani onganilimaza nanitjhisekela ukwenza okulungileko na?

¹⁴ Kodwana nanyana nihlupheka ngebanga lokulunga, nizakubusiswa! Ningesabi okwesatjwa babantu begodu ningethuswa.

¹⁵ Kodwana eenhliziyweni zenu yesabani uKrestu njengeKosi. Nihlale nilungele ukuphendula loyo onibuza ngesizathu sethemba elikini.

¹⁶ Kodwana lokho nikwenze ngobumnene nangehlonipho. Nibe nesazelo esimsulwa ukuze kuthi nabaninyefulako labo abanithukako ngokuziphatha kuhle kwenu kuKrestu, babe neenhloni.

¹⁷ Kungcono ukuhlupheka ngokwenza okulungileko nangabe lokho kuyintando kaZimu, kunokuhlupheka ngokwenza okumbi,

¹⁸ ngombana noKrestu wahlupheka kwaba kanye ngenca yezono zethu. Iye, olungileko wafela abangakalungi ukuze anilethe kuZimu. Wabulawa ngokwenyama, kodwana wavuswa ngoMoya,

¹⁹ okwathi ngaye wayokutjhumayeza imimoya ebotjhiweko,

²⁰ iye, leyo engazange ilalele ngesikhathi uZimu ayilindele ngokunyamezela emihleni kaNowa, ngeenkhathi zokwakhiwa komkhumbi, okwathi abambalwa ebebabunane basinda ngamanzi.

²¹ Amanzi lawo ajamele umbhabhadiso, enisindiswa ngawo nani, kungabi ngokususa isila yomzimba, kodwana ukubawa isazelo esimsulwa kuZimu ngokuvuka kwakaJesu Krestu ekufeni,

²² osele anyukela ezulwini, uhlezi ngesidleni sakaZimu, kubekwe ngaphasi kwakhe iingilozi, iimphathimandla nemibuso.