1 UPITROSI 2 - IsiNdebele 2012 Translation

Ilitje eliphilako nesizwe esikhethiweko

¹ Ngalokho-ke lahlani boke ubumbi nobuqili, ukuzenzisa, umona nayo yoke ihlebo.

² Njengamasana langazelelani ibisi elicwebileko lokommoya ukuze ngalo nikhule esindisweni,

³ nakube seninandiphile bona iKosi ilungile.

⁴ Bandamelani kiyo, ililitje eliphilako, elininwe babantu kodwana kuZimu likhethekile begodu liligugu;

⁵ nani-ke njengamatje aphilako, nakhelwe endlini yokommoya kobana nibe buphristi obucwengileko, ninikele imihlabelo yokommoya eyamukelekako kuZimu ngoJesu Krestu.

⁶ Ngitjho ngombana umtlolo uthi: “Qala, ngibekile eZiyoni ilitje, iye, ilitje lejika elikhethekileko neliligugu; loyo okholwa kilo angekhe adaniswe.”

⁷ Nje-ke kini nina enikholwako liligugu, kodwana kilabo abangakholwako, “Ilitje abakhi abalininako, seliphenduke laba yihloko yejika”,

⁸ begodu “Lililitje elibakhubako, iye, ilitje elibawisako.” Bayakhubeka ngombana akhange balalele ilizwi njengombana bebajanyiselwe ukwenza.

⁹ Kodwana nina nisisizwe esikhethiweko, ubuphristi bobukhosi, isizwe esicwengileko, abantu ekungebakaZimu kobana nitjhumayele imisebenzi yamandla yaloyo owanibiza bona niphume ebumnyameni nize ekukhanyeni kwakhe okukarisako.

¹⁰ Phambilini beningasibo abantu, kodwana kwanjesi nisisizwe sakaZimu. Nakhe naswela umusa, kodwana kwanjesi niwamukelisiwe.

Niziinceku zakaZimu

¹¹ Bathandekako, ngiyanincenga njengemiqhamuka namathunjwa kobana nitjhide eenkanukweni zenyama ezilwa nomphefumulo.

¹² Philani ipilo elungileko hlangana nabangakholwako ukuze kuthi nanyana banisola ngokwenza okumbi, babone imisebenzenu emihle badumise uZimu ngelanga lamatlhuwo.

¹³ Ngebanga leKosi, thobelani zoke iinjamiso ezijanyiswe ziimphathimandla, nanyana kungezekosi njengombana ingekulu,

¹⁴ namkha zababusi abathunywe ngiyo kobana bahlunguphaze labo abenza okumbi nokudumisa labo abenza okuhle

¹⁵ ngombana injalo intando kaZimu, yeke ngokwenza okuhle kufuze nithulise ukungazi kweendlhayela.

¹⁶ Njengabatjhaphulukileko, philani njengabatjhaphulukileko, nokho ningasebenzisi ukutjhaphuluka kwenu bona kube sibhibho sokumbi, kodwana philani njengeenceku zakaZimu.

¹⁷ Hloniphani boke abantu, nithande abazalwana, nesabe uZimu benihloniphe umbusi.

Isibonelo sokuhlupheka kwakaKrestu

¹⁸ Nina nsebenzi, thobelani abaphathi benu ngayo yoke ihlonipho, ingasi labo abanomusa nesineke kwaphela, kodwana nalabo ababukhali

¹⁹ ngombana kuhle ukubekezelela ubuhlungu bokuphathwa ngokungakafaneli ngebanga lakaZimu.

²⁰ Nakube niyanyamezela nanidulwako ngokwenza okumbi, lokho kunivuza ngani? Kodwana naninyamezelela ukuhlutjhwa ngebanga lokwenza okuhle, lokho kuyathokozeka kuZimu.

²¹ Kokwakho, nabizelwa khona lokho ngombana noKrestu wahlupheka ngebanga lenu, wanitjhiyela isibonelo bona nilandele emtlhaleni wakhe.

²² “Ongazange enze isono, akhange kufunyanwe ikohliso emlonyenakhe.”

²³ Kwathi athukwa, akhange azibuyiselele; kwathi ahlutjhwa, akhange asongele; kodwana wazibeka kiloyo ogweba ngokulungileko.

²⁴ Yena ngokwakhe wathwala izono zethu emzimbenakhe emthini ukuze sife esonweni siphile ekulungeni. Ngemivuvu yakhe naphiliswa

²⁵ ngombana beninjengezimvu ezidurhileko, kodwana kwanjesi seniphendukele kuMelusi nomnakekeli wemiphefumulwenu.