1 UPITROSI 1 - IsiNdebele 2012 Translation

Ukulotjhisa

¹ UPitrosi umpostoli kaJesu Krestu, kibo abakhethiweko, abaziinkhambi ephasinapha nabahlakazeke kilo loke lePontusi, leGalatiya, leKaphadosiya, le-Asiya neleBhithiniya;

² iye, abakhethwe ngokwazi ngaphambili kwakaZimu uBaba, ngokomsebenzi ocwengisako wakaMoya mayelana nokulalela uJesu Krestu kanye nokufafazwa ngeengazi zakhe: Akwandiswe umusa nokuthula kini.

Ithemba eliphilako

³ Akadunyiswe uZimu uYise weKosethu uJesu Krestu, owathi ngomusa wakhe omkhulu wasipha ukubelethwa kabutjha ethembeni eliphilako ngokuvuswa kwakaJesu Krestu kabafileko,

⁴ kobana sibe nelifa elingabhubhiko, elingasilaphazekiko nelingapheliko enibulungelwe lona ezulwini;

⁵ iye, nina enilondwa mamandla kaZimu ngokukholwa kube kusindiswa esele kulungele ukwembulwa ngesikhathi sokuphela.

⁶ Kilokho niyathaba nanyana gadesi nimele nihlupheke isikhatjhana esincani kiyo yoke imihlobohlobo yeenlingo

⁷ ukuze kuthi iqiniso lokukholwa kwenu okuligugu kunegolide elibhubhako, nakuzizinywa ngomlilo, kuveze idumo, iphazimulo nokuhlonitjhwa lokha uJesu nakembulwako.

⁸ Niyamthanda nanyana ningakhange nimbone; niyakholwa kuye nanyana ningamboni njenganje begodu niyathokoza ngethabo elingekhe lahlathululwa nelibabazekako

⁹ ngombana namukela umphumela wokukholwa kwenu, iye, ukusindiswa kwemiphefumulwenu.

¹⁰ Mayelana nesindiso leyo, abaphorofidi abaphorofida ngomusa obewuzonehlela, bahlolisisa bebaphenyisisa ngayo,

¹¹ bafunisisa bona ngisiphi isikhathi nobujamo uMoya kaKrestu obegade akibo aphawula ngaso lokha nakafakaza ngaphambili ngokuhlupheka ebekubekelwe uKrestu nephazimulo ebeyizakulandela.

¹² Kwembulwa kibo bonyana bebangazilotjhi bona kodwana nina, lokha nebebakhuluma ngalokho nani esele nikuzwa ngalabo abatjhumayela iindaba ezimnandi ngoMoya oCwengileko ovela ezulwini. Iye, sengitjho nezinto iingilozi ebezifuna ukuzibona.

Yibani ngabacwengileko

¹³ Ngalokho lungiselelani iingqondo zenu, nizithibe; nibeke loke ithemba lenu emseni kaKrestu enizakuphiwa wona lokha nakabonakaliswako.

¹⁴ Njengabantwana abalalelako, ningaphendukeli eenkanukweni enanikizo phambilini ekungazini kwenu.

¹⁵ Kunalokho, njengombana owanibizako acwengile, yibani ngabacwengileko kikho koke ukukhamba kwenu

¹⁶ ngombana umtlolo ocwengileko uthi: “Yibani ngabacwengileko ngombana mina ngicwengile.”

¹⁷ Nangabe nimbiza bona nguBaba, loyo ogweba boke abantu ukuya ngokwemisebenzi yabo ngaphandle kokubandlulula, khona-ke philani ngokwesaba esikhathini sokuba ziinkhonzi kwenu.

¹⁸ Kufuze nazi bona ekukhambeni kwenu okulilize enakuzuza kiboyihlomkhulu, azange nahlengwa ngezinto ezibhubha njengesiliva negolide,

¹⁹ kodwana ngeengazi eziligugu zakaKrestu, iye, njengezemvana enganamphambo namkha isibazi.

²⁰ Yena wajanyiswa ngaphambilini iphasi lingakasekelwa, kodwana wabonakaliswa eenkhathini zokuphela ngebanga lenu.

²¹ Ngaye nakholwa kuZimu owamvusa kabafileko wamnikela iphazimulo ukuze ukukholwa nethemba lenu kudzimelele kuZimu.

²² Nje-ke, njengombana senihlambulule imiphefumulwenu ngokuthobela iqiniso ukuze nibe nobudlelwano bethando lamambala kubazalwana benu, yeke thandanani omunye nomunye ngehliziyo epheleleko.

²³ Senibelethwe kabutjha, ingasi ngembewu ebhubhako kodwana ngengabhubhiko, iye, ngelizwi lakaZimu eliphila ngokungapheliko

²⁴ ngombana umtlolo uthi: “Mbala, boke abantu bafana notjani, nedumo labo loke lifana nelikhwa lommango: Utjani buyatjhwaba nelikhwa libune,

²⁵ kodwana ilizwi lakaSomnini lijame ngokungapheliko.” Ilizwelo ziindaba ezimnandi ezatjhunyayelwa kini.