1 UJWANISI 5 - IsiNdebele 2012 Translation

Ukuhlula iphasi

¹ Loyo naloyo okholwako bona uJesu unguKrestu, ubelethwe nguZimu; omunye nomunye othanda umbelethi, uthanda naloyo obelethwe nguye.

² Ngalokho siyazi bona sithanda abantwana bakaZimu, lokha nasilonda imiyalwakhe.

³ Ukuthanda uZimu kukobana silonde imiyalwakhe, begodu imiyalwakhe ayisinzima

⁴ ngombana koke okubelethwe nguZimu kuyalihlula iphasi; lokhu kukuhlula okwehlule iphasi: ukukholwa kwethu.

⁵ Ngubani ongahlula iphasi nakungasi ngiloyo okholwa bona uJesu uyiNdodana kaZimu na?

Ubufakazi ngoJesu Krestu

⁶ Nguye loyo oweza ngamanzi nangeengazi, uJesu Krestu; ingasi ngamanzi kwaphela, kodwana weza ngamanzi nangeengazi. UMoya nguye ofakazako ngombana uMoya uliqiniso.

⁷ Bathathu abofakazi,

⁸ nguMoya, mamanzi neengazi begodu abathathwaba bayavumelana.

⁹ Nakube siyabamukela ubufakazi babantu, khona-ke ubufakazi bakaZimu bukhulu kunabo ngombana lobu bufakazi bakaZimu abunikeleko ngeNdodanakhe.

¹⁰ Okholwa eNdodaneni kaZimu unabo ubufakazi ngehliziywenakhe. Ongakholwa kuZimu, umenze umleyimanga ngokungakholwa ebufakazini uZimu abukhulumileko ngeNdodanakhe.

¹¹ Ubufakazi ngilobu bokuthi uZimu usiphe ubuphilo obungapheliko; ubuphilobu buseNdodanenakhe.

¹² Loyo oneNdodana kaZimu unokuphila; kodwana loyo onganaNdodana kaZimu akanakho ukuphila.

Isiphetho

¹³ Nginitlolela lokhu nina enikholwa ebizweni leNdodana kaZimu ukuze nazi bona ninokuphila okungapheliko.

¹⁴ Nasi isibindi esinaso kuye: Lokha nasibawa nanyana yini ngokwentando yakhe, uyasizwa.

¹⁵ Nje-ke nakube siyazi bona uyasizwa nasibawa nanyana yini, khona-ke siyazi bona sesikufumene esimbawe khona.

¹⁶ Nangabe omunye ubona umzalwana wakhe enza isono esingadoseli ekufeni, akamthandazele; uZimu uzamupha ukuphila loyo ongenzi isono esidosela ekufeni. Sikhona isono esidosela ekufeni, angitjho bona kuthandazelwe leso.

¹⁷ Koke okungakalungi sisono kodwana kukhona isono esingadoseli ekufeni.

¹⁸ Siyazi bona loyo obelethwe nguZimu akathuweleli ngokona, iye ngombana obelethwe nguZimu uyazilonda nomumbi akamthinti.

¹⁹ Siyazi bona singebakaZimu nokobana iphasi loke lisemandleni womumbi.

²⁰ Godu siyazi bona iNdodana kaZimu yeza yasipha ilemuko ukuze simazi oliqiniso begodu sikuye oliqiniso neNdodanakhe uJesu Krestu. Yena unguZimu mbala, ukuphila okungapheliko.

²¹ Bantwana, tjhidani kibosingazimu.