1 UJWANISI 4 - IsiNdebele 2012 Translation

Ukuhlola imimoya

¹ Bathandekako ningakholwa yoke imimoya, kodwana hlolisisani nakube ivela kuZimu ngombana banengi abaphorofidi bamanga abaphumele ephasini.

² UMoya kaZimu nizamazi ngalokhu: Woke ummoya ovumako bona uJesu Krestu uzile ngejamo lenyama uvela kuZimu.

³ Woke ummoya ongamvumi uJesu awuveli kuZimu. Lowo mumoya waloyo ophika uKrestu enezwa ngawo bona uyeza, njenganje selakhona ephasinapha.

⁴ Bantwana ningebakaZimu begodu nibahlulile ngombana loyo ongakini mkhulu kunaloyo osephasineli.

⁵ Bona bangebephaseli; yeke lokho abakukhulumako kungekwephasi.

⁶ Thina singebakaZimu, loyo owazi uZimu uyasilalela; loyo ongasuye wakaZimu akasilaleli. Ngalokhu sazi ummoya weqiniso nommoya wamanga.

UZimu ulithando

⁷ Bathandekako, asithandaneni ngombana ithando livela kuZimu. Onethando ubelethwe nguZimu begodu uyamazi uZimu.

⁸ Loyo onganathando akamazi uZimu ngombana uZimu ulithando.

⁹ Ithando lakaZimu labonakaliswa phakathi kwethu ngokuthumela iNdodanakhe eyodwa tere ephasinapha ukuze siphile ngayo.

¹⁰ Ithando ngilokhu: Akusingithi esamthandako uZimu, kodwana nguye owasithandako bewasithumela neNdodanakhe bona ibe mhlabelo oyihlawulo yezono zethu.

¹¹ Bathandekako, njengombana uZimu wasithanda kangaka, ngokunjalo nathi sifanele sithandane.

¹² Akakho noyedwa owakhe wabona uZimu, kodwana nasithandanako uZimu uhlala kithi nethando lakhe liphelele kithi.

¹³ Ngalokho siyazi bona sihlala kuye naye uhlala kithi ngombana usinikele kwakaMoya wakhe.

¹⁴ Sibonile begodu siyafakaza bona uYise wathumela iNdodanakhe bona ibe Msindisi wephasi.

¹⁵ Loyo ovumako bona uJesu uyiNdodana kaZimu, uZimu uphila kuye naye uphila kuZimu.

¹⁶ Nje-ke siyalazi besiyalikholwa ithando uZimu analo kithi. Iye, uZimu ulithando, loyo ophila ethandweni uphila kuZimu noZimu uphila kuye.

¹⁷ Ngendlela leyo ithando liphelelisiwe kithi ukuze sibe nesibindi ngelanga lokugwetjwa ngombana njengombana anjalo yena, sinjalo nathi ephasinapha.

¹⁸ Akukho ukwesaba ethandweni. Kodwana ithando elipheleleko liqotha ukwesaba ngombana ukwesaba kunesibetho, nje-ke owesabako akakapheleli ethandweni.

¹⁹ Thina siyathanda ngombana yena wasithanda qangi.

²⁰ Loyo othi: “Ngiyamthanda uZimu,” kodwana khisibe uzonde umzalwana wakhe, umleyimala ngombana loyo ozonda umzalwana wakhe ambonako angekhe athanda uZimu angazange akhe ambone.

²¹ Umyalo asinikele wona ngilo: Loyo othanda uZimu kufanele athande nomzalwana wakhe.