1 UJWANISI 3 - IsiNdebele 2012 Translation

Abantwana bakaZimu

¹ Qalani bona lingangani ithando uBaba asiphe lona kobana sibizwe bona sibantwana bakaZimu; iye, singibo! Ngikho lokhu iphasi lingasazi ngombana azange limazi yena.

² Bathandekako, kwanjesi sibantwana bakaZimu, nokho akukakhanyi kuhle esizakuba ngikho. Kodwana esikwaziko ngilokhu: lokha nakabonakaliswako sizakufana naye ngombana sizombona njengombana anjalo.

³ Ngiloyo naloyo onethemba leli kuye uyazihlambulula njengombana yena ahlambulukile.

⁴ Loyo owenza isono weqa umthetho ngombana isono sikukweqa umthetho.

⁵ Niyazi bona wabonakaliswa kobana azokuhlangula izono begodu kuye akukho sono.

⁶ Loyo ohlala kuye akoni; yeke owonako akakamboni begodu akamazi.

⁷ Bantwana, ningalahlekiswa mumuntu. Loyo owenza okulungileko ulungile njengombana naye alungile.

⁸ Loyo owenza isono ngewakaSathana ngombana uSathana uyona kusukela ekuthomeni. Isizathu sokobana iNdodana kaZimu ibonakaliswe kugiriza imisebenzi kaSathana.

⁹ Loyo obelethwe nguZimu akoni ngombana imbewu kaZimu ihlala kuye, akasakghoni ukona ngombana ubelethwe nguZimu.

¹⁰ Ngalokho abantwana bakaZimu nebakaSathana babonakala ngalokhu: Loyo ongenzi okulungileko naloyo ongathandi umzalwana akasuye umntwana kaZimu.

Thandanani

¹¹ Lo, myalo enawuzwa kusukela ekuthomeni wokobana kufuze sithandane.

¹² Singafani noKayini ogade angewakaSathana ngokubulala umfowabo. Enjephana wambulalelani na? Kungombana izenzo zakhe bezizimbi kodwana zomfowabo zilungile.

¹³ Ningarareki bazalwana lokha ilizwe nalinizondako.

¹⁴ Siyazi bona sesiphumile ekufeni singene ekuphileni ngombana sithanda abazalwana. Loyo onganathando usahlezi ekufeni.

¹⁵ Nanyana ngubani ozonda umzalwana wakhe, umbulali; niyazi bona akunambulali onokuphila okungapheliko.

¹⁶ Ithando silazi ngokuthi yena wadela ukuphila kwakhe ngebanga lethu. Nje-ke nathi kufanele sidele ukuphila kwethu ngebanga labanye.

¹⁷ Alo, ithando lakaZimu lingahlala njani emuntwini othi anomnotho wephaseli, abone umzalwana wakhe aswela kodwana angabi nesisa kuye na?

¹⁸ Bantwana, asingabi nethando ngamezwi namkha ngekulumo kodwana ngeqiniso nangezenzo.

¹⁹ Ngalokho sizakwazi bona singebeqiniso begodu iinhliziyo zethu sizazithulisa phambi kwakhe

²⁰ lokha nazisilahlako ngombana uZimu mkhulu kuneenhliziyo zethu begodu wazi koke.

²¹ Bathandekako, nakube iinhliziyo zethu azisilahli, sinesibindi phambi kwakaZimu,

²² samukeliswa koke esikubawa kuye ngombana silonda imiyalwakhe besenze lokho okumthokozisako.

²³ Nje-ke naku umyalo: Kufuze sikholwe ebizweni leNdodanakhe uJesu Krestu begodu sithandane njengombana asiyala.

²⁴ Labo abalonda imiyalwakhe bahlala kuye naye uhlala kibo. Ngalokho siyazi bona uhlala kithi ngoMoya asiphe yena.