1 UJWANISI 2 - IsiNdebele 2012 Translation

UKrestu umsizi wethu

¹ Bantwana bami, nginitlolela lokhu ukuze ningoni. Kodwana nakube kukhona owonako, sinomkhulumeli kuBaba, nguJesu Krestu olungileko;

² yena uyihlawulo yezono zethu, ingasi zethu kwaphela kodwana nezono zephasi loke.

³ Nje-ke ngalokhu siqinisekile bona siyamazi yena nakube silonda imiyalwakhe.

⁴ Loyo othi: “Ngiyamazi,” kodwana angalondi imiyalwakhe, unamanga begodu neqiniso alikho kuye.

⁵ Kodwana loyo olonda ilizwi lakhe, mbala ithando lakaZimu liphelelisiwe kuye. Lokhu ngikho okusenza siqiniseke bona sikuye.

⁶ Loyo othi uhlala kuZimu kufanele akhambe njengoJesu.

Umyalo omutjha

⁷ Bathandekako, anginitloleli umyalo omutjha, kodwana nginitlolela omdala ebeninawo kusukela ekuthomeni; umyalo omdala ngiwo umlayezo eseniwuzwile.

⁸ Nje-ke kwanjesi nginitlolela umyalo omutjha oliqiniso kuye nakini ngombana ubumnyama buyadlula nomkhanyo wamambala sewuyabonakala.

⁹ Loyo othi usemkhanyweni khisibe uzonda umzalwana, usesebumnyameni.

¹⁰ Kodwana othanda umzalwana uphila ekukhanyeni begodu akunalitho elingamenza akhutjwe.

¹¹ Kodwana ozonda umzalwana usebumnyameni; ukhamba ebumnyameni begodu akazi lapho aya khona ngombana ubumnyama bumphophazile.

¹² Ngitlolela nina bantwana ngombana izono zenu zilitjalelwe ngebanga lebizo lakhe.

¹³ Ngitlolela nina bobaba ngombana niyamazi wekuthomeni. Ngitlolela nina lutjha ngombana nimehlulile okhohlakeleko.

¹⁴ Ngitlolele nina bantwana ngombana niyamazi uBaba. Ngitlolele nina bobaba ngombana niyamazi wekuthomeni. Ngitlolele nina lutjha ngombana ninamandla nelizwi lakaZimu lihlezi kini nokhohlakeleko nimehlulile.

¹⁵ Ningathandi iphasi namkha izinto zephasi. Nakube umuntu uthanda iphasi, ithando lakaBaba alikho kuye

¹⁶ ngombana koke kwephaseli kuziinkanuko zenyama, iinkanuko zamehlo nokuzigqaja ngepilo. Koke lokhu akuveli kuBaba kodwana ephasini.

¹⁷ Iphasi neenkanuko zalo kuyadlula; kodwana loyo owenza intando kaZimu unokuphila okungapheliko.

Isiyeleliso ngabaphika uKrestu

¹⁸ Bantwana, sekusikhathi sokuphela, njengombana nizwile bona owaphika uKrestu uyeza; nje-ke abaphika uKrestu abanengi sebafikile. Ngalokho siyazi bona sekusikhathi sokuphela.

¹⁹ Baphuma kithi, kodwana bekungasibo bethu; ngombana nakube bekungabethu bebazokuhlala nathi. Kodwana ngokuphuma kwabo kithi kutjengisa tjhatjhalazi bonyana akakho namunye wabo ogade kungowethu.

²⁰ Kodwana nina nazeswa ngiloyo oCwengileko, yeke ninelwazi loke.

²¹ Nje-ke ngiyanitlolela, ingasi ngombana ningalazi iqiniso, kodwana ngombana nilazi, begodu niyazi bona akunamanga avela eqinisweni.

²² Alo-ke, ngubani onamanga, nakungasi ngiloyo ophikako bona uJesu unguKrestu na? Loyo-ke ungophika uKrestu, uphika uYise neNdodana.

²³ Akakho ophika iNdodana onoYise; woke ovuma iNdodana unaye noYise.

²⁴ Lokho enakuzwa ekuthomeni akuhlale kini. Nakube lokho enakuzwako kusukela ekuthomeni kuhlala kini, khona nizakuhlala kuYise neNdodaneni.

²⁵ Lokhu ngilokho asethembise khona, okutjho ipilo engapheliko.

²⁶ Nginitlolela izintwezi mayelana nalabo abathanda ukunilahlekisa.

²⁷ Nakungini, izeso enalamukela kuye lihlala kini, ngalokho anidingi kobana nanyana ngubani anifundise. Kodwana njengombana izeso lakhe linifundisa ngezinto zoke, kuliqiniso akusiwo amanga, yeke njengombana linifundisile, hlalani kuye.

²⁸ Nje-ke bantwana, hlalani kuye ukuze kuthi nakabonakaliswako sibe nesibindi, iye, singadaniswa phambi kwakhe ekufikeni kwakhe.

²⁹ Nakube niyazi bona ulungile, nizakwazi bonyana ngiloyo naloyo owenza kuhle, ubelethwe nguye.