1 UJWANISI 1 - IsiNdebele 2012 Translation

Ilizwi lokuphila

¹ Lokho ebekukhona ekuthomeni, esakuzwako, sakubona ngamehlwethu, sakuqala besakuthinta ngezandla zethu, sinitjhumayeza khona mayelana nelizwi lokuphila.

² Ukuphilokho kwabonakaliswa, sakubona nje-ke sifakaza ngakho; sitjhumayela kini ukuphila okungapheliko ebegade kukuBaba, nje-ke kwambulwa kithi.

³ Simemezela kini lokho esakubona besakuzwa ukuze nani nibe nobudlelwano nathi. Ubudlelwano bethu bukuBaba neNdodanenakhe uJesu Krestu.

⁴ Sinitlolela izintwezi ukuze ukuthaba kwethu kuphelele.

UZimu ukukhanya

⁵ Naku umlayezo esawuzwa kuye nesiwumemezela kini: UZimu ukukhanya begodu kuye abukho nakancani ubumnyama.

⁶ Nakube sithi sinobudlelwano naye khibe ngahlanye sikhamba ebumnyameni, sinamanga begodu asenzi okuliqiniso.

⁷ Kodwana nangabe sikhamba ekukhanyeni njengombana naye asekukhanyeni, sinobudlelwano omunye nomunye neengazi zakaJesu iNdodanakhe zisihlanza ezonweni zoke.

⁸ Nasithi asinasono, siyazikhohlisa neqiniso alikho kithi.

⁹ Kodwana nangabe siyazivuma izono zethu, yena uthembekile begodu ulungile kobana asithethelele izono zethu, asihlambulule kikho koke ukungalungi.

¹⁰ Nangabe sithi azange khesone, simenza onamanga nelizwi lakhe alikho kithi.