1 KWEBEKORINTE 9 - IsiNdebele 2012 Translation

Amalungelo wompostoli

¹ Angikakhululeki na? Angisuye umpostoli na? Angikaboni uJesu iKosi yethu na? Nina anisiwo umphumela womsebenzami eKosini na?

² Nanyana ngingeze ngaba mpostoli kabanye kodwana kini khona nginguye! Ngitjho ngombana nina nisigibo sobupostoli bami eKosini.

³ Lokhu kukuziphendulela kwami kilabo abangisolako.

⁴ Asinalungelo lokugonywako nokuselwako na?

⁵ Asinalungelo lokukhamba nomfazi okholwako njengombana kwenza abanye abapostoli kanye nabafowabo leKosi kanye noKhefasi na?

⁶ Namkha ngimi noBharinabhasi kwaphela ekumele sisebenzele ukudla na?

⁷ Ngubani osebenza njengejoni ngeendleko zakhe na? Ngubani otjala isidiribe kodwana angagomi amadiribaso na? Ngubani owelusa umhlambi kodwana angaseli ibisi lawo na?

⁸ Kghani ngitjho lokhu ngokususela ebantwini na? Umthetho awutjho njalo nawo na?

⁹ Kutloliwe emthethweni kaMosi kwathiwa: “Ungafaki ikomo isifonyo nayibhula amabele.” Kghani uZimu ukhathalela iinkomo na?

¹⁰ Kanti bekangakaqalisi kithi lokha nakhuluma lokhu na? Iye, lokhu kwatlolelwa thina ngombana lokha umlimi nalimako nombhuli nabhulako, lokho bakwenza ngethemba lokobana bazokwabelwa isivuno.

¹¹ Nakube sitjele imbewu kaMoya hlangana nani, kubudisi bonyana sivune kwenyama kini na?

¹² Nakube abanye banelungelo lokondliwa phakathi kwenu, thina asikafaneli samukele ngaphezu kwalokho na? Kodwana azange khesilisebenzise ilungelweli. Esikhundleni salokho sinyamezelele yoke into kunobana siliye ivangeli lakaKrestu.

¹³ Anazi bona labo abasebenza ngethempelini bafumana ukudla kwabo ethempelini nalabo abalotjha e-aldarini babelana lokho okulethwe e-aldarini na?

¹⁴ Ngokunjalo-ke iKosi ikubekile bona labo abatjhumayela ivangeli bafanele bafumane isondlo sabo evangelini.

¹⁵ Kodwana mina angizange ngisebenzise nalinye lamalungelo la. Nokho angitloli lokhu ngethemba lokobana nizangenzela izintwezo. Kungaba ngcono ngife kunobana umuntu angemuke ukuzikhakhazisa lokhu.

¹⁶ Nokho nangitjhumayela ivangeli, angikwazi ukuzikhakhazisa ngombana ngikatelelekile bona ngitjhumayele. Maye mina nakube angitjhumayeli ivangeli!

¹⁷ Nakube ngitjhumayela ngokuzithandela kwami, nginomvuzo; nakube angikwenzi ngokuzithandela, kutjho bona ngiphetha lokho engikuphathisiweko.

¹⁸ Alo-ke umvuzo wami uyini na? Sengilokhu kokuthi ekutjhumayeleni ivangeli, ngilitjhumayela simahla, ngalokho angisebenzisi ilungelo lami ekulitjhumayeleni.

¹⁹ Ngitjho ngombana nanyana ngikhululekile begodu ngingasilikhoboka lomuntu, ngazenza ikhoboka labo boke ukuze ngizuze abanengi.

²⁰ KumaJuda ngaba njengomJuda ukuze ngizuze amaJuda. Kilabo abangaphasi komthetho, ngaba njengongaphasi komthetho (nanyana mina ngokwami ngingasingaphasi komthetho) ukuze ngizuze labo abangaphasi komthetho.

²¹ Kilabo abanganamthetho, ngaba njengonganamthetho (nanyana ngingakatjhaphuluki emthethweni kaZimu, ngisemthethweni kaKrestu) ukuze ngizuze labo abanganamthetho.

²² Kilabo ababuthakathaka, ngaba buthakathaka ukuze ngizuze ababuthakathaka. Ngibe ngikho koke kibo boke abantu ukuze kuthi ngeendlela zoke ngisindise abathileko.

²³ Koke lokhu ngikwenzela ivangeli ukuze nami ngibe nesabelo eembusisweni zalo.

²⁴ Anazi bona emgijimweni boke abagijimi bayagijima, kodwana umvuzo munye na? Gijima ngendlela yokobana ufunyane umvuzo.

²⁵ Boke abaphalisana emdlalweni bathoma ngokuzithabulula ngokuncamileko. Benza lokho ukuze bamukele isihlohlo esingekhe sabambelela; kodwana thina sikwenza kobana sizuze isihlohlo sesiphelani.

²⁶ Yeke angigijimi njengomuntu ovathazelako; angilwi njengomuntu ofutha ummoya.

²⁷ Awa, ngiyawukhandla umzimbami ngiwenze ikhoboka ukuze kuthi ngemva kobana ngitjhumayeze abanye, mina ngokwami ngingakhuthi ekwamukeleni umvuzo.