1 KWEBEKORINTE 7 - IsiNdebele 2012 Translation

Imibuzo ngomtjhado

¹ Malungana nalokho eningitlolele khona: Kuhle bona umuntu angathinti umfazi;

² kodwana ngebanga lobufebe esele bandile, kuhle bona leyo naleyo ndoda ibe nomfazi wayo, nomfazi abe nendoda yakhe.

³ Indoda ayanelise umkayo nomfazi enze njalo.

⁴ Umfazi akanalo igunya phezu komzimba wakhe, kodwana yindoda enalo; ngokunjalo nendoda ayinalo igunya phezu komzimba wayo, kodwana mfazi onalo.

⁵ Ningagodlelani, ngaphandle kwalokha nanivumeleneko begodu kungekwesikhatjhana ukuze nizinikele emthandazweni. Ngemva kwalapho-ke nibuye godu nihlangane ukuze uSathana anganilingi ngebanga lokungakwazi kwenu ukuzibamba.

⁶ Lokhu ngikutjho njengokuvumelana, ingasi njengomthetho.

⁷ Bengifisa inga boke abantu bebangaba njengami; kodwana omunye nomunye umuntu unesiphiwo sakhe esibuya kuZimu, omunye unalesi kanti omunye unalesiya.

⁸ Kabangakatjhadi kanye nabahlolokazi ngithi: Kuhle bona bahlale bangatjhadi njengami;

⁹ kodwana nangabe abakghoni ukuzibamba, kumele batjhade ngombana kungcono ukutjhada kunokutjhiswa yikanuko.

¹⁰ Kilabo abatjhadileko nginomyalo (ongabuyi kimi, kodwana obuya eKosini) othi: Umfazi akangahlukani nendoda yakhe;

¹¹ kodwana nakube uyahlukana nayo, akahlale angakatjhadi njalo nakungasi njalo akabuyelane nendoda yakhe. Nendoda ayingatlhali umkayo.

¹² Kabanye ngithi (kutjho mina, akutjho iKosi): Nangabe umzalwana unomfazi ongakholwako, ovumako ukuhlala naye ije angakholwa njalo, akangamtlhali.

¹³ Nangabe umfazi unendoda engakholwako begodu ivuma ukuhlala naye ije ingakholwa njalo, akangayitlhali.

¹⁴ Ngitjho ngombana indoda engakholwako icwengisiwe ngomfazi wayo kanti nomfazi ongakholwako ucwengisiwe ngendodakhe ekholwako. Nakungasinjalo abantwana babo bebazakuba bantwana abangakahlambuluki, kodwana nje-ke bahlambulukile.

¹⁵ Kodwana nakube ongakholwako uyatlhala, akatlhale. Indoda namkha umfazi okholwako akakabotjhelelwa nakunjalo. UZimu usibizele ekuphileni ngokuthula.

¹⁶ Wazi ngani mfazi bona indoda yakho ingasindiswa ngawe na? Wazi ngani, wena ndoda bonyana umkakho angasindiswa ngawe na?

¹⁷ Omunye nomunye kumele ahlale endaweni iKosi embeke kiyo epilweni begodu nalapho uZimu ambizele khona. Lo-ke mthetho engiwubekako kiwo woke amabandla.

¹⁸ Kukhona umuntu obesele asokiwe lokha nabizwako na? Akangabi njengongakasoki. Ukhona obegade angakabi ukusoka lokha nabizwako na? Akahlale anjalo angasoki.

¹⁹ Ukusoka akusililitho nokungasoki akusililitho. Ukugcina imiyalo kaZimu ngikho okuqakathekileko.

²⁰ Omunye nomunye kumele ahlale angilokho ebegade angikho lokha uZimu nambizako.

²¹ Bewulikhoboka lokha nawubizwako na? Akungakutshwenyi lokho, nanyana-ke nange unethuba lokukhululeka kuhle bona wenze njalo.

²² Loyo obegade alikhoboka lokha nabizwa yiKosi, umumuntu weKosi okhululekileko; ngokunjalo nogade akhululekile lokha nabizwako, ulikhoboka lakaKrestu.

²³ Nathengwa ngenani eliphezulu, yeke ningabi makhoboka womuntu.

²⁴ Bazalwana, woke umuntu, njengombana anokuziphendulela kuZimu, akahlale ebujameni uZimu ambiza akibo.

²⁵ Nje-ke mayelana namatlawu: Anginawo umyalo obuya eKosini, kodwana ngigweba njengaloyo othembekako ngokomusa weKosi.

²⁶ Ngebanga lobudisi esele bukhona lobu, ngicabanga bona kuhle ukuzihlalela njengombana ninjalo.

²⁷ Utjhadile na? Ungatlhali. Awukatjhadi na? Ungasafuna umfazi.

²⁸ Kodwana nangabe uyathatha, awukenzi isono ngalokho, netlawu nalendako, alikoni ngalokho. Into nje kukobana loyo otjhadako uzokuqalana nemiraro eminengi epilweni, nje-ke ngilinga ukunibabalela kilokho.

²⁹ Engikutjhoko bazalwana kukobana isikhathi sifitjhani. Ukusuka gadesi, labo abanabafazi kumele baphile inga abanabafazi;

³⁰ abazilileko babe njengabangakazili, abathabileko babe njengabangakathabi; abathenga okuthileko kube inga akusikho kwabo;

³¹ abasebenzisa izinto zephasi babe njengabangakanamatheli kizo. Ngitjho ngombana iphaseli ngokwesibumbeko salo sanje, liyadlula.

³² Ngifuna bona ningatshwenyeki ngalitho. Indoda engakathathi ikhathalela iindaba zeKosi, ifuna ukwazi bona ingayithabisa njani iKosi.

³³ Kodwana ethetheko ikhathalela iindaba zephaseli, ifuna ukwazi bona ingamthabisa njani umkayo.

³⁴ Ipilo yayo ihlukene phakathi. Nomfazi ongakendi namkha itlawu likhathalela iindaba zeKosi: Ihloso yalo kuzinikela eKosini ngomzimba nangomphefumulo. Kodwana nakumfazi owendileko ukhathalela iindaba zephaseli, ufuna ukwazi bona angayithabisa njani indoda yakhe.

³⁵ Ngitjho lokhu ukuze nisizeke, ingasi ukuniqabela kodwana ukuze niphile ngendlela efaneleko ninokuzinikela okupheleleko eKosini.

³⁶ Nakube umuntu udlumbana bona wenza okungakafaneli malungana netlawu alibonileko, nalo nakube iminyaka yalo iyakhamba begodu lizizwela bona sele lifuna ukwenda, umuntu loyo akenze okufaneleko. Akoni ngalokho, abatjhade.

³⁷ Kodwana umuntu oqede nomkhumbulwakhe, ongakagandeleleki kodwana okghona ukujamela ilizwi lakhe, noqede nomkhumbulwakhe bona angendisi itlawu lakhe, naye loyo wenza kuhle.

³⁸ Naloyo owendisa itlawu lakhe wenza kuhle, kodwana ongalendisiko wenza kuhle khulu.

³⁹ Umfazi ubopheleleke endodeni yakhe qobana isaphila. Kodwana indoda yakhe yahlongakala, utjhaphulukile bona angenda nanyana kiyiphi ayithandako, kwaphela nakube iyakholwa eKosini.

⁴⁰ Ngesingami, kuhle bona ahlale anjalo angabe asenda, nokho ngiyacabanga bonyana nami nginoMoya kaZimu.