1 KWEBEKORINTE 6 - IsiNdebele 2012 Translation

Ukuziphatha kwabazalwana

¹ Nangabe omunye wenu unombango nomunye, vane athathe umbango lowo awuse kabangakholwako esikhundleni sokobana awulethe kabacwengileko na?

² Anazi bonyana abacwengileko bazokugweba iphasi na? Yeke nakube nina nizokugweba iphasi, anikalungeli ukugweba amacala amancani na?

³ Anazi bona sizokugweba iingilozi na? Kangangani-ke izinto zepilo le na?

⁴ Ngalokho-ke naninombango ngeendaba ezinjalo, vane nikhethe ngitjho namadoda aqalelwa phasi ebandleni kobana abe bagwebi na?

⁵ Ngitjho lokhu ukuze nibe neenhloni. Kuyakghoneka bona kungabikhona umuntu phakathi kwenu ohlakaniphe ngokwaneleko, ongabhalelwa kugweba umbango phakathi kwamakholwa na?

⁶ Kodwana esikhundleni salokho, umzalwana ugijimela ebandla ayokumangalela omunye umzalwana, koke lokho nikwenza phambi kwabantu abangakholwako!

⁷ Khona lokho ukufunyaneka nimangalelana kutjho khona bona senahlulwa kade. Kubayini ningafuni ukoniwa? Kubayini ningavumi ukudlelezelwa?

⁸ Esikhundleni salokho, nina ngokwenu niyadlelezela beniphosise, koke lokho nikwenza kabanye abazalwana benu.

⁹ Kghani anazi bona abakhohlakeleko abazukulidla ilifa lombuso kaZimu na? Ningakhohliswa: abaziphethe kumbi ngokomseme, abalotjha abosingazimu, abahlobongako, iintjhatjha zamadoda, abaduna abalalanako,

¹⁰ amasela, abamarhamaru, iindakwa, abathukanako nabasozisako abazukulidla ilifa lombuso kaZimu.

¹¹ Abanye benu beninjalo, kodwana nahlanzwa, nacwengiswa, nalungisiswa ebizweni leKosi uJesu Krestu nangoMoya kaZimethu.

Sebenzisani imizimba yenu ukudumisa uZimu

¹² Koke kuvumelekile kimi, kodwana akusikho koke okulisizo. Koke kuvumelekile kimi, kodwana akukho nakhunye okuzangibusa.

¹³ Ukudla kungekwesisu, nesisu singesokudla, kodwana uZimu uzokubhubhisa kokubili. Umzimba awusingewokuziphatha kumbi ngokomseme, kodwana ungoweKosi neKosi ingeyomzimba.

¹⁴ Ngamandlakhe uZimu wavusa iKosi ekufeni, nje-ke nathi uzosivusa.

¹⁵ Anazi bona imizimba yenu izizitho zomzimba kaKrestu ngenyama na? Alo-ke, ngithathe izitho zakaKrestu ngiyozihlanganisa nezengwadla na? Awa, nakanye!

¹⁶ Kghani anazi bona loyo ozihlanganisa nengwadla uba nyamanye nayo na? Angithi kuthiwa: “Ababili bazakuba nyamanye.”

¹⁷ Kodwana loyo ozihlanganisa neKosi, uba mmoya munye nayo.

¹⁸ Balekelani imikhuba yokuziphatha kumbi ngokomseme. Zoke ezinye izono umuntu azenzako zingaphandle komzimbakhe, kodwana loyo owona ngokwamabhayi wonakalisa umzimbakhe.

¹⁹ Anazi bona imizimba yenu ilithempeli lakaMoya oCwengileko ongaphakathi kwenu, enimamukele kuZimu nokobana anisingebenu na?

²⁰ Nathengwa ngenani eliphezulu, ngalokho-ke hloniphani uZimu ngemizimba yenu.