1 KWEBEKORINTE 5 - IsiNdebele 2012 Translation

Ukuhlobonga ebandleni

¹ Eqinisweni kubikiwe bonyana kukhona ukuziphatha kumbi ngokwamabhayi phakathi kwenu, begodu okumhlobo ongenzekiko ngitjho naphakathi kwabarhedeni. Indoda ingena emabhayini nomkayise!

² Kodwana ngapha nina niyazigqaja! Bekungakameli bona niphathwe ziinhloni, beningasaba nobudlelwano nomuntu owenze lokhu na?

³ Nanyana ngingekho kini siqu sami kodwana nginani ngommoya begodu sele ngimgwebile loyo owenze lokho njengombana bengizakwenza njalo nabegade ngiphakathi kwenu.

⁴ Lokha nanihlangene ebizweni leKosi uJesu, nami ngibekhona ngommoya, namandla weKosi uJesu abe khona,

⁵ nikelani indoda leyo kuSathana ukuze kubhujiswe imvelo yesono bese ummoyayo ubulungeke ngelanga leKosi.

⁶ Ukuzikhukhumeza kwenu akukalungi. Anazi bonyana isibiliso esincani sibilisa yoke ihlama na?

⁷ Lahlani isibiliso esidala ukuze nibe yihlama etja enganasibiliso, njengombana ninjalo, ngombana uKrestu oyimvana yethu yePhasika wenziwe umhlabelo.

⁸ Ngalokho-ke asibulungeni umnyanya lo, kungabi ngesibiliso esidala, ekusibiliso seswili nokukhohlakala, kodwana kube sisikwa esinganasibiliso, isikwa sobuqotho neqiniso.

⁹ Encwadini enganitlolela yona nganikhalima bonyana ningajayelani nabantu abaziphatha kumbi ngokwamabhayi.

¹⁰ Angikhulumi ngabangakholwako abaziphethe kumbi, abamarhamaru, ababogalajana nabalotjha abosingazimu ngombana nange kunjalo bekuzakufuneka bonyana nisuke ephasinapha.

¹¹ Kodwana gadesi nginitlolela bonyana ningahlanganyeli nananyana ngubani ozibiza ngomzalwana kodwana khibe uziphethe kumbi ngokwamabhayi, omarhamaru, olotjha abosingazimu, othukanako, osidakwa noneswili. Nakungonjalo ningalingi nigome naye.

¹² Nginandabani nokugweba labo abangaphandle kwebandla na? Akukameli nigwebe abangebandleni na?

¹³ UZimu uzabagweba labo abangaphandle. Angithi umtlolo uthi: “Qotjhani umuntu okhohlakeleko phakathi kwenu.”