1 KWEBEKORINTE 3 - IsiNdebele 2012 Translation

Ukukhalinywa kokuhlukana ebandleni

¹ Eqinisweni bazalwana, bengingekhe ngakhuluma nani njengabantu bakaMoya, kodwana bengizakukhuluma nani njengabantu benyama, iye, abasesemasana kuKrestu.

² Nganondla ngebisi, ingasi ngokudla okuqinileko ngombana beningakakulungeli. Iye, nanje anikakulungeli

³ ngombana nisesebabantu benyama. Ngitjho ngombana nakhu kusesekhona umona nokucabana phakathi kwenu. Anisibo benyama naninjalo na? Anikaziphathi njengabantu abangakakhetheki na?

⁴ Angithi omunye uthi: “Mina ngingewakaPowula.” Omunye athi: “Mina ngingewaka-Apholo.” Alo, anisibabantu abangakakhetheki naninjalo?

⁵ Ubegade ayini-ke u-Apholo loyo? UPowula yena uyini nje? Angithi sebaziinceku nje enakholwa ngazo kwaphela njengombana iKosi yabapha ngamunye umsebenzabo!

⁶ Mina ngatjala imbewu, u-Apholo wayisezela, kodwana nguZimu owayikhulisako.

⁷ Nje-ke bobabili, otjalako nosezelako abasililitho kodwana nguZimu yedwa okhulisako.

⁸ Umuntu otjalako nosezelako banomnqopho munye, omunye nomunye uzokuvuzwa ukuya ngokomsebenzakhe.

⁹ Thina sisebenza ndawonye singebakaZimu, nina niyisimu kaZimu begodu nimumakho kaZimu.

¹⁰ Ngomusa uZimu angiphe wona, ngabeka isisekelo njengomakhi onekghono, nje-ke kukhona othileko owakhela phezu kwaso. Kodwana omunye nomunye kumele ayelele bona wakha njani.

¹¹ Ngitjho ngombana akekho omunye ongabeka isisekelo ngaphandle kwaloyo osele asibekile, okunguJesu Krestu.

¹² Nakube kukhona umuntu owakha phezu kwesisekelwesi, asebenzise igolide, isiliva, amatje abizako, iingodo, utjani namkha iinhlanga,

¹³ umsebenzakhe uzokubonakaliswa ngalokho ongikho ngombana ilanga elikhethekileko lizowudalula. Uzokwambulwa ngomlilo begodu umlilo uzokuzizinya ubunjalo bomsebenzi womuntu.

¹⁴ Nangabe umsebenzi womuntu owakhelwe esisekelweni uyadzimelela, uzakwamukeliswa umvuzo.

¹⁵ Nakube uyatjha, uzakuloba; nokho yena ngokwakhe uzakusinda kodwana abe njengomuntu ophunyurhe emalangabini.

¹⁶ Kghani anazi bona nina nilithempeli lakaZimu nokobana uMoya kaZimu uhlala ngaphakathi kwenu na?

¹⁷ Loyo ochitha ithempeli lakaZimu, uZimu uzomchitha ngombana ithempeli lakaZimu licwengile.

¹⁸ Ningazikhohlisi. Nakube nanyana ngubani wenu udlumbana bona uhlakaniphile ngokwesilinganiso sesikhathesi, kumele abe sidlhadlha ukuze abe ngohlakaniphileko.

¹⁹ Ngitjho ngombana ukuhlakanipha kwephaseli kubudlhadlha phambi kwakaZimu ngombana kutloliwe kwathiwa: “Ubamba abahlakaniphileko ebuqilini babo.”

²⁰ Umtlolo godu ubuye uthi: “USomnini uyazi bona imikhumbulo yabahlakaniphileko ililize.”

²¹ Yeke, akungasabakhona ukuzigqaja ngomuntu ngombana koke kungekwenu

²² nanyana kungaba nguPowula, u-Apholo, uKhefasi namkha iphasi, ukuphila, ukufa, isikhathi sanje namkha esizako; koke kungekwenu.

²³ Kodwana nina ningebakaKrestu noKrestu ungewakaZimu.