1 KWEBEKORINTE 2 - IsiNdebele 2012 Translation

Itjumayelo ngoKrestu obethelweko

¹ Lokha nangifika kini bazalwana, azange ngize ngobugagu bokukhuluma namkha ngokuhlakanipha nangimemezela ubufakazi bakaZimu kini

² ngombana ngaqunta ukungazi ilitho ngaphandle kwakaJesu Krestu, iye, yena abethelwe esiphambanweni.

³ Ngize kini ngobuthakathaka nangokwesaba kanye nangokuqhaqhazela okukhulu.

⁴ Umlayezwami kanye nokutjhumayela kwami bekungasi ngamezwi wokuhlakanipha nayengako, kodwana bekuveza amandla kaMoya

⁵ ukuze ukukholwa kwenu kungadzimeleli ekuhlakanipheni kwabantu kodwana emandleni kaZimu.

Ukuhlakanipha okuvela kuMoya

⁶ Nokho-ke siyawukhuluma umlayezo wokuhlakanipha nasiphakathi kwabakhulileko, kodwana ingasi ukuhlakanipha kwephaseli namkha kwababusi besikhathesi, abazakubhubha baphele.

⁷ Awa, sikhuluma ukuhlakanipha okufihlakeleko kwakaZimu. Iye, ukuhlakanipha ebekufihliwe nalokho uZimu akubekele iphazimulwethu ngaphambi kokuthoma kwesikhathi.

⁸ Akakho ebabusini besikhathini lesi okulemukileko lokho ngombana nakube bebakulemukile, bebangekhe babethele iKosi yephazimulo.

⁹ Kodwana kutloliwe kwathiwa: “Akunalihlo elakubonako, akunandlebe eyakuzwako, akunamkhumbulo owakubambako lokho uZimu akulungiselele labo abamthandako.”

¹⁰ Ngalokho uZimu ukwambulile lokho kithi ngoMoyakhe.

¹¹ Ngubani hlangana nabantu owazi imikhumbulo yomuntu ngaphandle kommoya womuntu ongaphakathi kwakhe na? Ngokunjalo-ke, akunamuntu owazi imizindlo kaZimu ngaphandle kwakaMoya kaZimu.

¹² Asikamukeli ummoya wephasi kodwana samukele uMoya obuya kuZimu ukuze sizwisise lokho uZimu asiphe khona ngesihle.

¹³ Ngilokho-ke esikukhulumako, kungasi ngamezwi esiwafundiswe ngokuhlakanipha komuntu kodwana ngamezwi esiwafundiswe nguMoya, sizwakalisa iqiniso ngamezwi kaMoya.

¹⁴ Umuntu onganaMoya akamukeli izinto ezivela kuMoya kaZimu ngombana zibudlhadlha kuye. Angeze azizwisise ngombana zizwisiswa ngokukaMoya.

¹⁵ Umuntu kaMoya uhlolisisa koke kodwana yena ngokwakhe akakhambi ngokuhlolwa babantu.

¹⁶ Ngitjho ngombana umtlolo uthi: “Ngubani owakhe wazi umkhumbulo kaSomnini kobana angabe amfundise na?” Nokho-ke thina sinomkhumbulo kaKrestu.