1 KWEBEKORINTE 16 - IsiNdebele 2012 Translation

Umnikelo obuthelelelwa abantu bakaZimu

¹ Malungana nomnikelo obuthelelelwa abantu bakaZimu, yenzani njengalokho engakutjela amabandla weGalatiya.

² Elangeni leSabatha, omunye nomunye wenu akabekele ngeqadi inani elithileko ukuya ngokwenzuzo yakhe ukuze kuthi nangizako ngifunyane woke umnikelo sele ubuthelelwe.

³ Nangifikako ngizakukhupha iincwadi zokwethula labo enibakhethileko bona base isipho senu eJerusalema.

⁴ Nangabe nami kufanele bona ngikhambe, bazangiphekelela.

Ikhambo lakaPowula

⁵ Ngizakuza kini lapho eKorinte emva kokudabula eMasedoniya ngombana ngihlose ukudabula khona eMasedoniya.

⁶ Kungenzeka ngihlalahlale nani isikhatjhana, mhlamunye bengiqede ubusika boke ngilapho ukuze ningisize ekhambeni lami nanyana kuphi lapha ngiya khona.

⁷ Angifuni ukunibona ngidlula nje, kodwana ngirhuluphela bona ngizakuba nesikhathi sokuhlala nani, iKosi nayivumako.

⁸ Kodwana ngizokuhlala e-Efesu bekufike iPentekoste

⁹ ngombana ngivulelwe umnyango omkhulu wokusebenza ngepumelelo, kanti-ke banengi nabaphikisana nami.

¹⁰ UThimothi nafika lapho kini, qinisekisani bonyana akunalitho alesabako ngombana wenza umsebenzi weKosi njengami.

¹¹ Yeke akungabikhona namunye omnyazako! Nasele akhamba, mlayeliseni ngokuthula abuyele kimi ngombana ngimlindele kanye nabazalwana.

¹² Malungana nomzalwana wethu u-Apholo: Ngimkhuthaze ngamandla bona eze kini kanye nabazalwana. Ubengakazimiseli ukuza njenganje, kodwana uzakuza nafunyene ithuba.

Isiphetho

¹³ Hlalani niqaphile, nijame nidzimelele ekukholweni, nibe nesibindi, niqine.

¹⁴ Koke enikwenzako, kwenzeni ngethando.

¹⁵ Bazalwana, ngiyanincenga njengombana nisazi bonyana umndeni kaStefana ube ngewokuthoma ukwamukela ukukholwa e-Arhaya, begodu uzinikele khulu emsebenzini wabacwengileko,

¹⁶ zithobeni ebantwini abanjalo nakibo boke abanye abahlanganyela emsebenzini lo.

¹⁷ Ngithabe tle ngokufika kwakaStefana, uFortunatu no-Arhayiko ngombana banikele ngalokho ebeninganakho.

¹⁸ Bawuvuselele ummoyami kanye newenu, nje-ke bahlonipheni abanjalo.

¹⁹ Ayanilotjhisa amabandla wesifundeni se-Asiya. U-Akhwila noPriska banilotjhise khulu eKosini nebandla elihlanganyela emzinabo nalo linilotjhisile.

²⁰ Boke abazalwana abalapha bayanilotjhisa. Lotjhisanani ngokukhethekileko.

²¹ Mina Powula ngitlola ukulotjhisa lokhu ngesami isandla.

²² Nangabe umuntu akathandi iKosi, akanamathelwe manikelela. Yewuze Kosi!

²³ Umusa weKosi uJesu Krestu awube nani.

²⁴ Ithando lami kini noke kuKrestu Jesu.