1 KWEBEKORINTE 15 - IsiNdebele 2012 Translation

Ukuvuka kwakaKrestu

¹ Bazalwana, ngithanda ukunikhumbuza ngevangeli engalitjhumayela kini, enalamukelako nenidzimelele kilo.

² Ngilo ivangeleli enisindiswa ngalo nanikakarela elizwini enganitjhumayeza lona. Nakungasinjalo, nizabe nikholelwe ilizwe.

³ Engakwamukelako ngakudlulisela kini ngombana kuyinto yokuthoma eqakathekileko kobana uKrestu wafela izono zethu ukuya ngokwemitlolo,

⁴ wabulungwa, wavuka kabafileko ngelanga lesithathu, njengombana imitlolo isitjho.

⁵ Wabonakala kuPitrosi, godu wabonakala kubapostoli abalitjhumi nambili.

⁶ Ngemva kwalapho, wabonakala kubazalwana abangaphezu kwamakhulu amahlanu ngesikhathi esisodwa, inengi labo elisaphilako, nanyana-ke abanye sebalala nje.

⁷ Godu wabonakala kuJakopo, ngemva kwalapho wabonakala kibo boke abapostoli.

⁸ Ekugcineni wabonakala nakimi mina onjengaloyo obelethwe ngendlela engakajayeleki.

⁹ Ngitjho ngombana ngingomncancani kubapostoli, nje-ke abengikafaneli nokubizwa bona ngimpostoli ngombana ngahlukumeza ibandla lakaZimu.

¹⁰ Kodwana ngebanga lesirhawu sakaZimu ngingilokhu engingikho begodu isirhawu sakhe kimi azange sibe lilize. Awa, ngasebenza khulu kunabo boke, kodwana bekungasimi, bekusirhawu sakaZimu ebesinami.

¹¹ Nje-ke nanyana bekungimi namkha bekungibo, leli ngilo ivangeli esilitjhumayelako begodu ngilo enalikholwako.

Ukuvuka kwabafileko

¹² Nakube uKrestu utjhunyayelwa bona uvusiwe kabafileko, bangatjho njani-ke abanye benu bonyana akukho ukuvuka kwabafileko na?

¹³ Kodwana nakube akukho ukuvuka kwabafileko, khona-ke kutjho bona noKrestu azange avuswe.

¹⁴ Nje-ke nakube uKrestu azange avuswe, khona-ke ukutjhumayela kwethu kulilize lakolize, nokukholwa kwenu kunjalo.

¹⁵ Ngaphezu kwalapho, kutjho bona sifunyaniswa sibofakazi bamanga ngoZimu ngombana sifakaze ngaye bonyana wavusa uKrestu kabafileko.

¹⁶ Ngitjho ngombana nakube abafileko abavuswa, khona-ke kutjho bona noKrestu azange avuswe.

¹⁷ Nje-ke nakube uKrestu azange avuswe, kukhomba bona ukukholwa kwenu kulilize lakolize, nisahlezi ezonweni zenu.

¹⁸ Yeke nalabo esele balala bakuKrestu kutjho bona balahlekile-ke.

¹⁹ Nakube ithemba lethu kuKrestu lingelokuphila lokhu kwaphela, khona-ke singebokulilelwa ukudlula boke abantu.

²⁰ Kodwana ngambala uKrestu uvusiwe kabafileko, yena osithelo sokuthoma sabaleleko.

²¹ Njengombana ukufa kweza ngomuntu, kunjalo nokuvuka kwabafileko kuza ngomuntu.

²² Njengombana ku-Adamu boke bayafa, ngokunjalo kuKrestu boke bazakuvuswa.

²³ Kodwana omunye nomunye ngedlhego lakhe: Kuzokuthoma uKrestu ntangi bese kuthi nabuyako, kuvuke labo abangebakhe.

²⁴ Nje-ke isiphetho sizakufika lokha nanikela umbuso kuZimu uBaba ngemva kobana atjhabalalise yoke imibuso, ubukhosi namandla

²⁵ ngombana kumele abuse bekufike lapha arabhalalisa khona zoke izitha zakhe ngaphasi kweenyawo zakhe.

²⁶ Isitha sokugcina esizokubhujiswa, kukufa

²⁷ ngombana umtlolo uthi: “Ubeke koke ngaphasi kweenyawo zakhe.” Nje-ke nawuthi “yoke into” ibekwe ngaphasi kwakhe, kuyakhanya bonyana lokhu akufaki uZimu phakathi, okunguye obeka zoke izinto ngaphasi kwakaKrestu.

²⁸ Nasele enze lokhu, yeke iNdodana ngokwayo izakwenziwa bona ibe ngaphasi koZimu okunguye obeka zoke izinto ngaphasi kwayo ukuze kuthi yena Zimu abe ngongaphezu kwakho koke.

²⁹ Alo-ke nakube akukho ukuvuka kwabafileko, bazokwenzanjani labo ababhabhadiselwa abafileko na? Nakube abafileko abakazokuvuswa nakanye, kubayini abantu babhajadiswe ngenca yabo na?

³⁰ Nakungithi-ke khona kubayini sizifake engozini umzuzu nomzuzu na?

³¹ Mina ngifa ngamalanga, iye, ngitjho njalo bazalwana kanjengombana ngambala ngizigqaja ngani kuKrestu Jesu iKosi yethu.

³² Nakube bengilwa neembandana ezinelunya e-Efesu ngebanga lomuntu tle, bengizakuthi ngizuzeni nje? Nakube abafileko angeze bavuswa, khona-ke asizaliseni ikulumo ethi: “Asigomeni, sisele ngombana ngomuso siyokufa.”

³³ Ningakhohliswa! “Ukujayelana nabantu abakhohlakeleko konakalisa isimilo esihle.”

³⁴ Qaqulukani njengombana nifanele, nilise ukona ngombana kukhona abathileko abangayeleli uZimu. Ngitjho lokhu khona nizakhe khenizikhuze.

³⁵ Kodwana omunye angase abuze athi: “Abafileko bavuswa njani na? Bazokuvuka ngomzimba onjani na?”

³⁶ Ubudlhadlha obungaka! Okutjalileko angeze kwamila ngaphandle kobana kufe qangi.

³⁷ Lokha nawutjalako, awutjali umzimba ngesingawo kodwana utjala imbewu kwaphela kungaba mhlambe ngeyekoroyi namkha okhunye nje.

³⁸ UZimu nguye onikela imbewu leyo umzimba njengokuhlosa kwakhe. Unikela omunye nomunye umhlobo wembewu umzimba wayo.

³⁹ Inyama yoke ayifani: Abantu bamhlobo othileko wenyama, iinlwana ziimhlobo omunye, iinyoni nazo ziimhlobo omunye neenhlambi ngokunjalo.

⁴⁰ Ikhona-ke nemizimba yezulwini nemizimba yephasini, kodwana ukuphazimula kwemizimba yezulwini kukodwa, nokuphazimula kwemizimba yephasini nakho kukodwa.

⁴¹ Ikhona iphazimulo yelanga, nenye iphazimulo yenyezi godu nenye iphazimulo yeenkwekwezi ngombana iinkwekwezi ziyahlukahlukana ngephazimulo.

⁴² Kuzokuba njalo-ke ngokuvuka kwabafileko. Okutjalwako kuyabola, okuvuswako akuboli.

⁴³ Kutjalwa ngokudelwa, kuvuswa ngephazimulo. Kutjalwa ngobuthakathaka, kuvuswa ngamandla.

⁴⁴ Kutjalwa kumzimba wenyama, kuvuswa kumzimba wommoya. Nakube kukhona umzimba wenyama, kukhona nomzimba wommoya.

⁴⁵ Ngokunjalo kutloliwe kwathiwa: “Umuntu wokuthoma u-Adamu, waba sibunjwa esiphilako,” u-Adamu wokugcina waba nguMoya ophilisako.

⁴⁶ KoMoya akusikho okweza qangi, kodwana ngokwemvelo, ngemva kwalapho-ke kwaba ngokoMoya.

⁴⁷ Umuntu wokuthoma wavela ethulini lephasi, wesibili wavela ezulwini.

⁴⁸ Indlela angayo umuntu wephasi, banjalo nalabo abangebephasi. Indlela angayo umuntu wezulwini, banjalo nalabo abangebezulwini.

⁴⁹ Njengombana sinomfuziselo womuntu wephasi, ngokunjalo sizokuba nomfuziselo womuntu wezulwini.

⁵⁰ Ngiyatjho kini bazalwana ngithi inyama neengazi angekhe kwalidla ilifa lombuso kaZimu, nokubolako angekhe kwalidla ilifa lokungaboliko.

⁵¹ Lalelani nginitjele nasi ifihlakalo: Asizukulala soke, kodwana soke sizokutjhugululwa

⁵² ngomzuzwana, iye, ngokuphazima kwelihlo, nakulila iporompita yokugcina. Kuzokulila iporompita, abafileko bavuswe bangasenakho ukubola bese siyatjhugululwa-ke.

⁵³ Lokhu okubolako kumele kuzembathise okungaboliko bese kuthi okubhubhako kuzembathise okungabhubhiko.

⁵⁴ Nasele okubolako kwembathiswe okungaboliko, nokubhubhako sekwembathiswe okungabhubhiko, sizakuzaliseka-ke isitjho esitloliweko esithi: “Ukufa kurhiribidelwe kuhlula.”

⁵⁵ “Kufa kuphi ukuhlula kwakho na? Kufa, liphi iliva lakho na?”

⁵⁶ Iliva lokufa sisono, namandla wesono mthetho.

⁵⁷ Kodwana akathokozwe uZimu osipha ukuhlula ngeKosi yethu uJesu Krestu.

⁵⁸ Ngalokho-ke bazalwana bami abathandekako, dzimelelani. Akungabi nento eninyakazisako. Hlalani njalo nizinikele ngokupheleleko emsebenzini weKosi ngombana niyazi bonyana ukuzikhandla kwenu eKosini akusingelize.