1 KWEBEKORINTE 14 - IsiNdebele 2012 Translation

Iimphiwo zokuphorofida nezamalimi

¹ Tjhisekelani ukuba nethando bese nirhuluphela iimphiwo zakaMoya, khulukhulu isiphiwo sokuphorofida.

² Loyo okhuluma ngamalimi akakhulumi nabantu kodwana ukhuluma noZimu. Akunamuntu omzwako; ukhuluma iimfihlakalo emmoyenakhe.

³ Kodwana loyo ophorofidako ukhuluma nabantu ukuze baqine amandla, bakhuthazeke bebaduduzeke.

⁴ Loyo okhuluma ngamalimi, uzakha yena emmoyeni, kodwana ophorofidako wakha ibandla.

⁵ Ngithanda bona omunye nomunye wenu akhulume ngamalimi, kodwana kungcono bona niphorofide. Loyo ophorofidako mkhulu kunaloyo okhuluma ngamalimi, ngaphandle kwanange awarhumutjha ukuze ibandla lakheke.

⁶ Nje-ke bazalwana, nange ngisiza kini ngifike ngikhulume ngamalimi, kuzonisiza ngani lokho na? Akunisizi ngalitho, ngaphandle kwanange nginilethela isambulo, ilwazi, isiphorofido namkha ilizwi lokuyala.

⁷ Ngitjho nezintweni ezingaphiliko ezenza itjhada njengenghwani namkha iharibha, umuntu uzakwazi njani bona zilila ngayiphi indlela nakube akukho ukuhlukanisa ngomdumo na?

⁸ Godu nakube iporompita ayizwakali kuhle bona ibiza abantu bonyana baye epini, ngubani ozazilungiselela ipi na?

⁹ Ngokunjalo-ke nani, nakube anikhulumi okuzwakalako ngamalimi wenu, bazakuzwa njani abanye abantu bona nithini na? Nizabe nikhulumela emmoyeni.

¹⁰ Kunamalimi okungazazeki bonyana manengi ephasinapha, kodwana akukho nalinye lawo elinganahlathululo.

¹¹ Nje-ke nakube angizwisisi okutjhiwo ngiloyo okhulumako, kutjho bona ngiliphandle kiloyo okhulumako, naye uliphandle kimi.

¹² Kunjalo nakini. Njengombana nitjhisekela ukwamukela iimphiwo zakaMoya nje, rhuluphelani khulu lezo ezakha ibandla.

¹³ Ngalokho-ke nanyana ngubani okhuluma ngamalimi, kufanele athandaze bonyana akghone ukuhlathulula lokho akukhulumako.

¹⁴ Ngitjho ngombana nangithandaza ngamalimi, kuthandaza ummoyami, kodwana umkhumbulwami awuhlanganyeli kilokho.

¹⁵ Alo ngizakwenzanjani na? Ngizokuthandaza ngommoyami, ngithandaze nangomkhumbulwami, ngizokuvuma ngommoyami godu ngivume nangomkhumbulwami.

¹⁶ Nakube udumisa uZimu ngommoyakho, angatjho njani loyo ozifunyana ahlangana nalabo abangazwisisiko ukuthi: “Amen” ekuthokozeni kwakho njengombana angazi bona uthini na?

¹⁷ Kungenzeka bona uthokoze ngokwaneleko, kodwana omunye umuntu akakheki ngalokho.

¹⁸ Ngiyamthokoza uZimu bona ngikhuluma ngamalimi ukunedlula noke nje.

¹⁹ Kodwana nangisebandleni, ngikhetha ukukhuluma amezwi abe mahlanu azwisisekako ukuyala abanye, kunobana ngikhulume amezwi alitjhumi leenkulungwana ngelimi elingaziwako.

²⁰ Bazalwana, lisani ukucabanga njengabantwana. Iye, malungana nobumbi, yibani masana, kodwana nibe ngabakhulileko ngengqondo.

²¹ Emthethweni kutloliwe kwathiwa: “Ngabantu bamalimi atjhili nangeembhena zamaphandle, ngizokukhuluma nabantwaba kodwana khonapho abazukungizwa. Kutjho uSomnini.”

²² Nje-ke amalimi alitshwayo kabangakholwako, ingasi kabakholwako; kodwana ukuphorofida kungokwabakholwako, ingasi abangakholwako.

²³ Yeke nakube ibandla loke liyahlangana bese woke umuntu ukhuluma ngamalimi, khonapho kungene abangazwisisiko namkha abangakholwako, abazukucabanga bona niyarhapha na?

²⁴ Kodwana nange ongakholwako namkha omunye ongazwisisiko, angena khibe woke umuntu uyaphorofida, boke bazamenza azibone asisoni begodu alahlwe ngunembeza

²⁵ bekuthi iimfihlo zehliziywakhe zivele etjhatjhalazini. Ngaleyondlela uzakuguqa phasi adumise uZimu arhuwelele athi: “Ngambala uZimu uphakathi kwenu.”

Ukulotjha okufaneleko

²⁶ Alo, sizakuthini bazalwana na? Lokha nanihlanganako, omunye nomunye akabe nerhubo, ilizwi lokufundisa, umbono, ilimi namkha irhumutjho lalo. Koke lokhu akwenzelwe ukuqiniswa kwebandla.

²⁷ Nakube kukhona ukukhuluma ngamalimi, akukhulume babili namkha babe bathathu batjhidelane, kuthi oyedwa arhumutjhe.

²⁸ Nakube akekho orhumutjhako, okhulumako loyo akathule ebandleni, akhulumele ngehliziyweni noZimu.

²⁹ Akukhulume abaphorofidi ababili namkha abathathu, abanye bahlolisise lokho okutjhiwoko.

³⁰ Nakube kufika isambulo kiloyo ohlezi phasi wokuthoma akathule

³¹ ngombana ningaphorofida noke ngokudlhegana ukuze woke umuntu afunyane umlayezo kanye nokukhuthazwa.

³² Imimoya yabaphorofidi ithobela abaphorofidi

³³ ngombana uZimu akasinguZimu wesiphithiphithi, kodwana ungowokuthula. Njengakiwo woke amabandla wabacwengileko,

³⁴ abafazi abathule emabandleni. Abakavunyelwa ukukhuluma kodwana kufanele bazithobe njengombana kusitjho umthetho.

³⁵ Nakube kukhona abafuna ukukwazi, ababuze emadodeni wabo emakhaya ngombana kulihlazo bona umfazi akhulume ebandleni.

³⁶ Konjephana ilizwi lakaZimu livele ngani na? Namkha lifikelele nina kwaphela na?

³⁷ Nakube umuntu udlumbana bona umphorofidi namkha unesiphiwo sakaMoya, akamukele bona lokhu enginitlolela khona kumyalo weKosi.

³⁸ Nakuphayela eqadi lokhu, naye uzokuphayelwa eqadi.

³⁹ Ngalokho-ke bazalwana, tjhisekelani ukuphorofida, ningakuvimbeli ukukhuluma ngamalimi!

⁴⁰ Kodwana koke akwenziwe ngendlela efaneleko nehlelekileko.