1 KWEBEKORINTE 13 - IsiNdebele 2012 Translation

Ithando lisisipho esikhethekileko

¹ Nanyana ngingakhuluma ngamalimi wabantu namkha weengilozi, kodwana nginganathando, sengifana nekoporo ebanga itjhada namkha isimbi elilako.

² Nanginesiphiwo sokuphorofida, ngikghona ukuzwisisa zoke iimfihlakalo begodu nginelwazi; nginokukholwa okutjhidisa iintaba, kodwana nginganathando, angisililitho.

³ Nangipha abadududu koke enginakho benginikele umzimbami ekutjhisweni, kodwana nginganalo ithando, angisililitho.

⁴ Ithando liyabekezela, ithando linesisa, alinamona, alizikhukhumezi, alizitjhayi;

⁵ aliziphathi ngendlela engakafaneli, alizifuneli kwalo, alinasicasucasu, alibibhi imilandu.

⁶ Ithando alithokoziswa bubumbi kodwana lithabela iqiniso,

⁷ lembesa yoke into, likholwa yoke into, lirhuluphela yoke into begodu linyamezelela koke.

⁸ Ithando alihluleki. Kodwana lapha kuneemphorofido khona, zizakuphela; lapha kunamalimi khona, azakuthuliswa; lapha kunelwazi khona, lizakudlula.

⁹ Ngitjho ngombana sazi ingcenye begodu siphorofida ingcenye,

¹⁰ kodwana nasele kufika ukupheleliswa, ukungakapheleliswa kuyanyamalala.

¹¹ Nangisesemntwana bengikhuluma njengomntwana, ngicabanga njengomntwana, ngizwisisa njengomntwana. Kwathi lokha nangiba yindoda, ngahlukana neendlela zobuntwana.

¹² Kwagadesi sisabona lififi esibonibonini, kodwana ngesikhatheso sizokubonana ubuso nobuso. Okwanje ngazi ingcenye, ngesikhatheso ngizokwazi koke ngokuzeleko njengombana nami ngaziwa ngokuzeleko.

¹³ Nje-ke okuthathu lokhu kujamile: ukukholwa, ithemba nethando. Kodwana okungaphezu kwakho koke lithando.