1 KWEBEKORINTE 12 - IsiNdebele 2012 Translation

Iimphiwo zakaMoya

¹ Yeke mayelana neemphiwo zakaMoya, bazalwana angithandi bona ningabi nelwazi.

² Niyazi bona lokha nanisesebarhedeni, nathelelwa ngommoya wokudurha kobana nidlhemadlheme ngemva kweenthombembazwa ezingakhulumiko.

³ Ngalokho-ke ngiyanitjela bonyana akakho ongakhuluma ngoMoya kaZimu athi: “UJesu akanikelelwe!” Godu akakho umuntu ongathi: “UJesu uyiKosi”, ngaphandle kobana atjho lokho ngoMoya oCwengileko.

⁴ Kunemihlobo eyahlukeneko yezipho kodwana ngoMoya munye.

⁵ Kunemisebenzi eyahlukeneko, kodwana ngeKosi yinye.

⁶ Kunokusebenza okuhlukeneko, kodwana yena uZimu loyo nguye okwenza koke kibo boke abantu.

⁷ Nje-ke omunye nomunye unikelwe ukuzibonakalisa kwakaMoya ukuze kusizeke woke umuntu.

⁸ Omunye uphiwe ngoMoya umlayezo wokuhlakanipha, omunye uphiwe umlayezo welwazi ngaye uMoya loyo.

⁹ Omunye uphiwe ukukholwa ngaye uMoya loyo, omunye uphiwe ezinye izipho zokuphilisa ngaye uMoya loyo.

¹⁰ Omunye uphiwe amandla wemikarisomraro, omunye uphiwe ukuphorofida, omunye uphiwe ukuhlukanisa imimoya, omunye uphiwe ukukhuluma ngamalimi ahlukeneko, kanti omunye uphiwe ukurhumutjha amalimi lawo.

¹¹ Koke lokhu kumsebenzi kaMoya munye, begodu unikela omunye nomunye njengokubona kwakhe.

Umzimba munye unezitho ezinengi

¹² Umzimba munye, nanyana unezitho ezinengi. Godu nanyana unezitho ezinengi, zibumba umzimba owodwa. Kunjalo-ke nangoKrestu

¹³ ngombana soke sabhajadiswa ngoMoya munye emzimbeni munye nanyana ungabamJuda namkha umGirigi, ikhoboka namkha otjhaphulukileko begodu soke saphiwa uMoya munye kobana sisele kuye.

¹⁴ Nje-ke umzimba awukakhiwa ngesitho esisodwa kodwana ngezitho ezinengi.

¹⁵ Nange inyawo lingathi: “Njengombana ngingasiso isandla nje, mina angisingewomzimba”, ngalokho angeze kwalenza bona lingabi yingcenye yomzimba.

¹⁶ Godu nange indlebe ingathi: “Njengombana ngingasililihlo nje, angisingewomzimba”, ngalokho angeze kwayenza bona ingabi yingcenye yomzimba.

¹⁷ Nakube umzimba woke bewungaba lilihlo, bewuzokuba kuphi umuzwa wokuzwa na? Nakube umzimba woke bewungaba yindlebe, bewuzokuba kuphi umuzwa wokunukelela na?

¹⁸ Kodwana uZimu uhlele izitho zomzimba, esinye nesinye sazo saba ngendlela afuna bona sibe ngayo.

¹⁹ Nabegade zoke njalo zisisitho sinye, umzimba bewuzokuba kuphi na?

²⁰ Njengombana kunje, izitho zinengi, kodwana umzimba munye.

²¹ Ilihlo angekhe latjho esandleni lathi: “Wena angikudingi” nehloko angeze yathi eenyaweni: “Nina anginidingi.”

²² Esikhundleni salokho, izitho zomzimba ezibonakala inga zibuthakathaka, ziqakatheke khulu.

²³ Kanti-ke nezitho esicabanga bonyana azikahlonipheki kangako, sizihlonipha khulu. Izitho ezinganasithunzi ziphathwa ngeenhloni khulu,

²⁴ khisibe lezo ezinesithunzi azidingi ukuphathwa ngokukhethekileko. UZimu uhlanganise amalungu womzimba bewahloniphisa khulu izitho ezithathelwa phasi

²⁵ ukuze kungabikhona ukwahlukana emzimbeni, kodwana izitho zawo zikhathalelane ngokulinganako.

²⁶ Nangabe isitho esisodwa siyatlhaga, zoke ezinye zitlhaga kanye naso; nangabe isitho esisodwa siyahlonitjhwa, zoke ezinye zithaba naso.

²⁷ Nje-ke nina nimzimba kaKrestu, omunye nomunye wenu uyingcenye yawo.

²⁸ Ebandleni, uZimu ujamise koke ngerherho, ukuthoma ngabapostoli, kulandele abaphorofidi, kuze abafundisi bese kuba ngabenza imikarisomraro nalabo abaneemphiwo zokuphilisa, labo abakghona ukusiza abanye, labo abaneemphiwo zokuphatha kanye nalabo abaneemphiwo zokukhuluma ngamalimi ahlukeneko.

²⁹ Boke babapostoli na? Babaphorofidi boke na? Babafundisi boke na? Benza imikarisomraro boke na?

³⁰ Baneemphiwo zokuphilisa boke na? Boke bakhuluma ngamalimi na? Boke bayarhumutjha na?

³¹ Kodwana tjhisekelani iimphiwo ezikulu. Nje-ke ngizonikhombisa indlela ezidlula zoke.