1 KWEBEKORINTE 11 - IsiNdebele 2012 Translation

¹ Ngilingisani njengombana nami ngilingisa uKrestu.

Mayelana nokuthwala ehloko

² Ngiyanibuka ngombana ningikhumbula ezintweni zoke begodu nibambelela eemfundisweni njengombana ngazidlulisela kini.

³ Kodwana ngifuna nazi bonyana ihloko yenye nenye indoda nguKrestu, ihloko yomfazi yindoda, kanti ihloko kaKrestu nguZimu.

⁴ Enye nenye indoda ethandaza namkha ephorofida igubuzese ihloko irhubutjha ihlokwayo.

⁵ Kodwana omunye nomunye umfazi othandaza namkha ophorofida angakagubuzesi ihloko urhubutjha ihlokwakhe, sekufana nalokha ihlokwakhe nayigudiweko.

⁶ Nangabe umfazi akagubuzesi ihlokwakhe, kumele agude begodu nakube kulihlazo kobana umfazi arhune namkha agude, kumele agubuzese ihlokwakhe.

⁷ Indoda ayikafaneli ukugubuzesa ihlokwayo ngombana imfanekiso nedumo lakaZimu; kodwana umfazi ulidumo lendoda.

⁸ Ngitjho ngombana indoda ayizange ivele emfazini kodwana mfazi owavela endodeni.

⁹ Indoda azange yadalelwa umfazi kodwana mfazi owadalelwa indoda.

¹⁰ Ngebangelo namkha ngebanga leengilozi umfazi kumele abe netshwayo lokuphathwa ehlokwakhe.

¹¹ EKosini nokho umfazi akakazijameli ayedwa ngaphandle kwendoda, nendoda ayikazijameli iyodwa ngaphandle komfazi.

¹² Njengombana umfazi wavela endodeni, ngokunjalo nendoda ibelethwa mfazi. Kodwana koke kubuya kuZimu.

¹³ Ziboneleni nina ngokwenu bona kufanele umfazi athandaze uZimu angakagubuzesi ihlokwakhe na?

¹⁴ Imvelo ngokwayo ayinifundisi bonyana nakube indoda ineenhluthu ezide kulihlazo kiyo,

¹⁵ kodwana umfazi naneenhluthu ezide kulidumo kuye na? Uphiwe iinhluthu ezide bona zibe sisembeso sakhe.

¹⁶ Nakube ukhona ofuna ukuphika ikani ngalokhu, asinawo omunye umkhuba onjalo thina kanye namabandla akuZimu.

Isidlo seKosi

¹⁷ Emiyalweni elandelako, anginakho ukunibonga ngombana imihlangano yenu ibanga umonakalo kunobana ibange ubuhle.

¹⁸ Kokuthoma nje ngizwa batjho nanihlanganako njengebandla, kuba khona ukuhlukana phakathi kwenu, begodu ngithanda ukukukholwa lokho.

¹⁹ Kufanele kube khona ukuhlukana phakathi kwenu ukuze kubonakale bona ngibaphi abaneqiniso.

²⁰ Lokha nanihlanganako, kusuke kungasiso isidlo seKosi enisigomako

²¹ ngombana nanigomako, omunye nomunye wenu uragela phambili agome ngaphandle kokulindela abanye. Omunye uhlala alambile kanti omunye uyadakwa.

²² Kanti aninamakhaya lapha ningagomela beniselele khona na? Namkha ninyaza ibandla lakaZimu benirhubutjhe labo abanganalitho na? Ngizakuthini kini na? Nginibuke ngalokho na? Nakanye!

²³ Ngakwamukela eKosini lokho engikudlulisela kini kokuthi: IKosi uJesu ngobusuku eyakhatjhelwa ngabo, yathatha isikwa,

²⁴ kwathi sele ithokozile kuZimu, yasihlephula yathi: “Lokhu mzimba wami onikelwe nina, kwenzeni lokhu ukuze ningikhumbule.”

²⁵ Ngokunjalo, ngemva kobana sele bagomile, yabuye yathatha ikapho yathi: “Ikapho le isivumelwano esitjha eengazini zami. Kwenzeni lokhu njalo lokha naniyiselako ukuze ningikhumbule.”

²⁶ Yeke njalo lokha nanigoma isikwa lesi benisele nekapho le, nimemezela ukufa kweKosi kufikela beyibuye.

²⁷ Ngalokho-ke loyo ogoma isikwa lesi namkha asele ikapho yeKosi ngokungakafaneli, uzakuba nomlandu wokona emzimbeni kanye neengazini zeKosi.

²⁸ Umuntu kumele azihlolisise ngaphambi kobana agome isikwa abe asele nekapho.

²⁹ Loyo ogomako abe asele ngaphandle kokuhlukanisa umzimba weKosi, uzigomela abe aziselele umlandu.

³⁰ Kungebangelo abanengi phakathi kwenu babuthakathaka begodu bayagula kanti inengi lenu sele lilele.

³¹ Kodwana nakube besizigweba thina, besingeze sagwetjwa.

³² Nasigwetjwa yiKosi, siyakhalinywa ukuze singalahlwa kanye nephasi.

³³ Ngalokho-ke bazalwana, lokha nanihlanganako kobana nigome, lindanani.

³⁴ Nakube kukhona olambileko, akagome ekhaya ukuze kuthi nanihlanganako kungabi ngokokugwetjwa. Mhla ngibuyako ngizaninikela eminye imiyalo.