1 KWEBEKORINTE 10 - IsiNdebele 2012 Translation

Ukukhalinywa ngabosingazimu

¹ Yeke angithandi bazalwana bona ningabi nelwazi lokobana abakhokho bethu boke bebangaphasi kwelifu begodu boke bayama elwandle.

² Boke babhabhadiselwa kuMosi ngelifini bangelwandle.

³ Boke bagoma ukudla kunye kwakaMoya,

⁴ basela isiselo sinye sakaMoya ngombana basela edwaleni lakaMoya ebelibaphekelela. Idwalelo belinguKrestu.

⁵ Nanyana kunjalo uZimu azange athokoze ngenengi labo; iindumbu zabo zarhatjheka kilo loke irhalawumba.

⁶ Izintwezi zenzeka kobana zibe sibonelo ukusikhandela bona singabeki iinhliziyo zethu ezintweni ezimbi njengombana benza bona.

⁷ Ningabi balotjhi babosingazimu njengombana abanye babo benza ngombana kutloliwe kwathiwa: “Abantu bahlala phasi bagoma bebasela, basikima bagida.”

⁸ Asingenzi izenzo zokukhohlakala ngokwamabhayi njengombana abanye babo benza, bekwathi ngelanga linye kwabhujiswa iinkulungwana ezimatjhumi amabili nantathu zabo.

⁹ Asingayilingi iKosi, njengombana abanye babo benza, babulawa ziinyoka.

¹⁰ Godu ningarhononi njengombana abanye babo benza, babulawa yingilozi ebhubhisako.

¹¹ Izintwezi zabehlela zaba sibonelo bezatlolwa njengesiyeleliso kithi thina esele sifikelwe kuphela kweenkhathi.

¹² Nje-ke nawudlumbana bona ujame udzimelele, yelela bona ungawi.

¹³ Akunasilingo esiniwisileko ngaphandle kwalokho okujayelekileko ebantwini. Nje-ke uZimu uthembekile; angeze avume bona nilingwe ngaphezu kwamandlenu. Kodwana nanilingwako, uzaninikela nendlela yokuphepha ukuze nijamelane naso.

¹⁴ Nje-ke, bangani bami abathandekako, balekelani ukulotjha abosingazimu.

¹⁵ Ngikhuluma nabantu abavuthiweko, ziboneleni nina lokho engikutjhoko.

¹⁶ Ikapho yokuthokoza esithokoza ngayo, ayisiyo yokuzibandakanya eengazini zakaKrestu na? Isikwa esisihlephulako akusiso sokuzibandakanya emzimbeni kaKrestu na?

¹⁷ Njengombana kunesikwa sinye nje, simzimba munye nanyana sibanengi ngombana soke sihlanganyela isikwa esisodwa.

¹⁸ Khumbulani abantu bakwa-Israyeli: Kanti labo abagoma umhlabelo abahlanganyeli e-aldarini na?

¹⁹ Alo, ngitjho bona umhlabelo owenzelwe usingazimu ulilitho namkha usingazimu ulilitho na?

²⁰ Awa, nginqophe ekutheni imihlabelo yabarhedeni yenzelwe amadimoni; ingasi uZimu. Nje-ke angithandi bona nihlanganyele namadimoni.

²¹ Angekhe nasela ikapho yeKosi godu nibuye nisele neyamadimoni. Angeze naba nehlanganyelo etafuleni leKosi nelamadimoni.

²² Kghani sifuna ukuvusa isikhwele seKosi na? Sinamandla kunayo na?

²³ “Koke kuvumelekile” kodwana akusikho koke okusizako. Iye, “koke kuvumelekile” kodwana akusikho koke okwakhako.

²⁴ Akungabikhona ozifunela ubuhle bakhe, kodwana akafune nekwabanye.

²⁵ Gomani koke okuthengiswa esilarheni ngaphandle kokubuza imibuzo ngonembeza

²⁶ ngombana: “Iphasi nakho koke okukilo ngekwakaSomnini.”

²⁷ Nangabe ongakholwako animemela ekudleni, nithanda ukuya, gomani nanyana yini ebekwa phambi kwenu ngaphandle kokubuza imibuzo kanembeza.

²⁸ Kodwana nangabe omunye uthi kini: “Lokhu kuhlatjelwe abosingazimu,” ningabe nisakugoma ngebanga laloyo otjho njalo nangebanga lakanembeza,

²⁹ unembeza womunye umuntu, angitjho unembeza wenu. Ngitjho ngombana ilungelo lami lizakugwetjelwani ngonembeza womunye umuntu na?

³⁰ Nangabe ngihlanganyela ekudleni ngokuthokoza, kubayini ngifanele ngilahlwe ngebanga lalokho engithokoza uZimu ngakho na?

³¹ Nje-ke nanyana niyagoma namkha niyasela namkha nenza nanyana yini, kwenzeni koke mayelana nedumo lakaZimu.

³² Ningabangeli namunye bona akhubeke, kungaba mJuda, umGirigi namkha ibandla lakaZimu

³³ njengombana nami ngilinga ukuthokozisa woke umuntu ngazo zoke iindlela. Angizifuneli mina ubuhle kodwana ubuhle babanengi ukuze basindiswe.