1 KWEBEKORINTE 1 - IsiNdebele 2012 Translation

Ukulotjhisa

¹ UPowula obizelwe ekubeni mpostoli kaKrestu Jesu ngokwentando kaZimu kanye nomfowethu uSosithenesi,

² kilo ibandla lakaZimu eKorinte, kilabo abacwengisiweko kuKrestu Jesu bebabizelwa ekucwengeni, bakanye nabo boke abakizo zoke iindawo, ababiza ibizo leKosi uJesu Krestu oyiKosabo neyethu:

³ Akube kini umusa nokuthula okuvela kuZimu uBaba neKosini uJesu Krestu.

Isibusiso esivela kuKrestu

⁴ Ngihlala ngimthokoza uZimu ngani ngebanga lomusa wakhe eninikelwe wona kuKrestu Jesu,

⁵ ukuze kuthi ezintweni zoke ninjinge ngokwekulumo nangelwazi lenu loke

⁶ ngombana ubufakazi bethu ngoKrestu baqiniswa kini.

⁷ Ngalokho azange nitlhayelelwe ngitjho nangesisodwa isipho sakaMoya ekulindeni kwenu ngokuncama ukubonakaliswa kweKosi uJesu Krestu.

⁸ IKosi izoniqinisa bekube sekupheleni ukuze ningabi nomlandu ngelanga leKosi yethu uJesu Krestu.

⁹ Uthembekile uZimu owanibizela ebudlelwaneni neNdodana yakhe, uJesu Krestu iKosi yethu.

Ukwahlukana kwebandla leKorinte

¹⁰ Ngiyanirabhela bazalwana ngebizo leKosi yethu uJesu Krestu bona noke nivumelane ukuze kungabikhona ukwahlukana phakathi kwenu. Bumbanani ngokupheleleko ngomkhumbulo munye nangombono munye.

¹¹ Ngitjho ngombana bazalwana bami, ngibikelwe yindlu kaRhilowesi bona kukhona ukunghwarana phakathi kwenu.

¹² Kuthiwa omunye nomunye wenu ukhuluma kwakhe uthi: “Mina ngingewakaPowula”, omunye athi: “Mina ngingewaka-Apholo”, omunye athi: “Mina ngingewakaKhefasi”, omunye athi: “Mina ngingewakaKrestu”.

¹³ Kghani uKrestu lo sele ahlukaniswe phakathi na? UPowula wakhe wanifela esiphambanweni? Nabhajadiswa ebizweni lakaPowula na?

¹⁴ Nanje ngiyamthokoza uZimu ngombana azange ngibhabhadise namunye wenu ngaphandle kwakaKrisposi noGayusi.

¹⁵ Ngalokho akungabikhona noyedwa ozahle asithi batjho wabhajadiswa ebizweni lami.

¹⁶ Iye, ngabhabhadisa nomndeni kaStefana, ngaphezu kwalokho-ke angikhumbuli ngibhabhadisana nabanye abantu.

¹⁷ UKrestu azange angithume bona ngizokubhabhadisa kodwana bona ngitjhumayele ivangeli, ingasi ngamezwi wokuhlakanipha kwabantu ukuze isiphambano sakaKrestu singakghuthulwa amandla waso.

UKrestu umamandla nobuhlakani bakaZimu

¹⁸ Umlayezo wesiphambano ubudlhadlha kilabo ababhubhako, kodwana kithi esisindiswako umamandla kaZimu.

¹⁹ Ngitjho ngombana umtlolo uthi: “Ukuhlakanipha kwezazi ngizokutjhabalalisa, ngidide ukulemuka kwabahlakaniphileko.”

²⁰ Alo, siphike-ke isihlakaniphi na? Siphi isazimthetho? Uphi umazizoke walesisikhathi na? UZimu akakenzi ukuhlakanipha kwephaseli kwaba budlhadlha na?

²¹ Njengombana ekuhlakanipheni kwakaZimu, iphasi ngokuhlakanipha kwalo alizange limazi, yeke kwamthabisa uZimu bona kuthi ngobudlhadlha obutjhunyayelwako asindise labo abakholwako.

²² AmaJuda afuna iimbonakaliso zemikarisomraro, amaGirigi wona afuna ukuhlakanipha,

²³ nanyana kunjalo thina sitjhumayela uKrestu abethelwe esiphambanweni; okusiqabo emaJudeni nobudlhadlha kabatjhili,

²⁴ kodwana kilabo uZimu ababizileko, abamaJuda namaGirigi, sitjhumayela uKrestu omamandla kaZimu nokuhlakanipha kwakaZimu.

²⁵ Ubudlhadlha bakaZimu buhlakaniphile kunokwazi kwabantu nobuthakathaka bakaZimu bunamandla kunamandla wabantu.

²⁶ Khumbulani bona beninjani nanibizwako bazalwana. Inengi lenu beningakahlakaniphi ukuya ngokwesilinganiso sabantu; beningasibanengi ebenikwazi ukukhuluma, beningasibanengi ebenibelethelwe ekuhloniphekeni.

²⁷ UZimu wakhetha izinto ezibonakala zibudlhadlha emehlweni wephasi ukuhlazisa abahlakaniphileko; uZimu wakhetha izinto zephaseli ezibuthakathaka ukuhlazisa abanamandla.

²⁸ Iye, wakhetha lokho okuqalelwa phasi kwephaseli nokunyazekako, wakhetha nalokho okungekho ukuze achithe okukhona.

²⁹ Ngalokho-ke akungabikhona noyedwa ozazigqaja phambi kwakhe.

³⁰ Kungebanga lakhe kobana nibe kuKrestu Jesu kithi obe kuhlakanipha okuvela kuZimu, okutjho ukulunga kwethu, ukucwenga kanye nokuhlengwa kwethu

³¹ njengombana kutloliwe kwathiwa: “Akuthi loyo ozikhakhazisako, azikhakhazise eKosini.”