1 IINKRONIKE 9 - IsiNdebele 2012 Translation

¹ Boke bakwa-Israyeli gade batlolwe erhelweni egade lisemtlolweni wamakhosi wakwa-Israyeli. Abantu bakwaJuda gade bathunjwe basiwa eBhabheli ngenca yokungathembeki kwabo.

Abahlali beJerusalema

² Ababa ngebokuthoma ukubuyela eendaweni zabo ngemadorobheni bekungabanye bama-Israyeli, abaphristi, amaLevi neensebenzi zethempeli.

³ EJerusalema kwahlala abanye bakwaJuda, bakwaBhenjamini, bakwa-Efrayimu nebakwaManase. Bona bekungilaba:

⁴ u-Utayi, umsa ka-Amihudi omsa ka-Omri, umsa ka-Imri omsa kaBhani osizukulwana sakaPeretsi, umsa kaJuda;

⁵ kebakwaTjhiloni kungu-Asaya olizibulo namadodanakhe;

⁶ kebakwaZerarhi kunguJehiyeli. Isibalo semindeni le besimakhulu amathandathu namatjhumi alithoba.

⁷ BakwaBhenjamini kunguSalu, umsa kaMetjhulamu omsa kaHodaviya, umsa kaHasenuwa;

⁸ uJibineya, umsa kaJerorhamu; u-Ela, umsa ka-Uzi omsa kaMikiri noMetjhulamu, umsa kaTjhafathiya omsa kaRewuyeli, umsa kaJibiniya.

⁹ Iinzukulwana zabantwaba, bezimakhulu alithoba namatjhumi amahlanu nathandathu. Bona bebaziinhloko zemindeni.

^10-13 Abaphristi abagade bahlala eJerusalema kunguJedaya, uJehoyaribi, uJakini, u-Adaya, umsa kaJerorhamu omsa kaPatjhirhuri, umsa kaMalikiya, uMasayi, umsa ka-Adiyeli omsa kaJarhizera, umsa kaMetjhulamu omsa kaMetjhilemithi, umsa ka-Imeri. U-Azariya, umsa kaRhilikiya omsa kaMetjhulamu, umsa kaTsadokhi omsa kaMerayothi, umsa ka-Arhithubi gade asikhulu sendlu kaZimu. Abaphristaba gade baziinhloko zemindeni. Bekumadoda anetlha nanekghono lokwenza umsebenzi wendlu kaZimu. Isibalo semindenabo besiyikulungwana namakhulu alikhomba namatjhumi asithandathu.

¹⁴ AmaLevi agade ahlala eJerusalema kunguTjhemaya, umsa kaRhatjhubi omsa ka-Azrikhamu, umsa kaRhatjhabiya okuziinzukulwana zakaMerari,

¹⁵ uBhakhibhakhari, uRheretjhi, uGalali, uMataniya, umsa kaMika omsa kaZikiri, umsa ka-Asafa,

¹⁶ u-Obadiya, umsa kaTjhemaya omsa kaGalali, umsa kaJedutuni noBherekiya, umsa ka-Asa omsa ka-Elkhana ogade ahlala emizini yamaNethofathi.

¹⁷ Abalindisango abagade bahlala eJerusalema kunguTjhalumu, u-Akhubu, uThalimoni, u-Arhimani nabozakwabo. Ihlokwabo kunguTjhalumu.

¹⁸ Bekube namhlanje basese balindisango ababekwe esangweni lekosi ngepumalanga yethempeli. Lo bekumndeni wabalindisango ukusukela ngesikhathi sokujanyiswa kwekampa yamaLevi erhalawumbeni.

¹⁹ Yeke uTjhalumu umsa kaKhore omsa ka-Ebiyasafu umsa kaKhorarhi nabafowabo abamaKhorarhi, gade baphethe isikhundla sokugada imibunjwana yethempeli njengaboyisemkhulu abagade baqalene nokugada isango lethaberinakeli lakaSomnini.

²⁰ Erhalawumbeni uFiniyasi umsa ka-Eliyazari gade amrholabo noSomnini anaye.

²¹ UZakariya umsa kaTjhalumu gade amlindisango esangweni elikhulu lethempeli.

²² Sebaboke labo abakhethwa bona babe balindisango emibunjwaneni yethempeli, bebamakhulu amabili anetjhumi nambili. Gade bahlala emizanenabo lapha bebatloliswe khona. UDavida nomboni uSamyela ngibo abenza isikhundla somlindisango bona sibe ngesesiphelani ethempelini.

²³ Ukusukela ngesikhatheso amaKhorarhi gade agada amasango wendlu kaSomnini ngokuya ngedlhego lawo.

²⁴ Abalindisango bebangemahlangothini womane wethempeli: ngepumalanga, ngetjingalanga, ngesewula nangetlhagwini.

^25-26 Abarholi abane babalindisango ababalwe ngehla gade baneenkhundla ezisiphelani ethempelini, kodwana abalindisango abangemizaneni bekumelwe banande beza ethempelini amalanga alikhomba ukuzokusizana nabarholabo. Labo-ke bekumaLevi begodu bebanikelwe ukuqala amarhayisi namadladla wendlu kaZimu.

²⁷ Bekuthi nabatjhayisako balale endlini kaZimu ngombana bebamele bayigade bebavule namasangwayo njalo ekuseni.

²⁸ Abanye babo gade baqale ipahla egade isetjenziselwa ukulotjha ethempelini. Gade babala iimpahlezo lokha nazingeniswako nalokha nazikhutjhwako.

²⁹ Abanye bebanikelwe umsebenzi wokutjheja enye ipahla yangethempelini okutjho ipahla ecwengileko, iflowuru esefiweko, iwayini, amafutha we-oliva, itjhwalo namakha.

³⁰ Kodwana bekubaphristi abathileko kwaphela ebegade bavunyelwe ukwenza umvango wamakha.

³¹ UMatitiya umLevi olizibulo lakaTjhalumu umKhorarhi, gade abekwe bona abe mukiniyi wesikwa somnikelo.

³² Abanye babomnakwabo abamaKhehathi gade baphethe umsebenzi wokulungisa isikwa esibekwa etafuleni qobe liSabatha.

³³ Labo abagade babavumi, baziinhloko zemindeni yamaLevi, bebahlala emalawini wethempeli lokha nabatjhayisileko ngombana gade kufuze bafunyanwe eduze nabafunwako ubusuku nemini.

³⁴ Boke labo bebaziinhloko zemindeni yamaLevi. Ngokuya ngokweenzukulwana, iinhloko zemindenezi bezihlala eJerusalema.

Aboyisemkhulu neenzukulwana zakaSawula

³⁵ EGibiyoni gade kuhlala uJehiyeli umsunguli weGibiyoni. Ibizo lomkakhe bekunguMaka.

³⁶ Amadodanakhe bekungu-Abidoni izibulo, uTsuri, uKhitjhi, uBhali, uNeri, uNadabi,

³⁷ uGedori, u-Arhiyo, uZakariya noMikhilothi.

³⁸ UMikhilothi wabeletha uTjhimiyamu. Nabo gade bahlala eduze kweenhlobo zabo eJerusalema.

³⁹ UNeri wabeletha uKhitjhi; uKhitjhi wabeletha uSawula. USawula wabeletha uJonathani, uMaliki-Tjhuwa, u-Abinadaba no-Etjhi-Bhali.

⁴⁰ Indodana kaJonathani bekunguMeribi-Bhali. UMeribi-Bhali wabeletha uMika.

⁴¹ Amadodana kaMika kunguPitoni, uMeleki, uTarhireya no-Arhazi.

⁴² U-Arhazi wabeletha uJara; uJara wabeletha u-Alemethi, u-Azimavethi noZimri. UZimri wabeletha uMotsa.

⁴³ UMotsa wabeletha uBhiniya onguyise kaRefaya uyise ka-Eliyasa onguyise ka-Atseli.

⁴⁴ U-Atseli gade anamadodana asithandathu, amabizwawo bekungu-Azrikhamu, uBhokeru, u-Itjhimayeli, uTjheyariya, u-Obadiya noRhanani. Boke labo bekumadodana ka-Atseli.