1 IINKRONIKE 5 - IsiNdebele 2012 Translation

Iinzukulwana zakaRubeni

^1-3 URubeni gade alizibulo laka-Israyeli. Kodwana wasilaphaza umbhede kayise, yeke amalungelo wobuzibulo bakhe anikelwa amadodana kaJosefa umsa ka-Israyeli nanyana yena gade angabalwa ebuzibulweni. UJuda waba namandla ukudlula abafowabo, khulukhulu umrholi owavela kuye, kodwana ilungelo lobuzibulo laba ngelakaJosefa. Amadodana kaRubeni izibulo laka-Israyeli bekunguRhanokhi, uPalu, uRhetsironi noKarimi.

⁴ Iinzukulwana zakaJuweli ngilezi: uJuweli anguyise kaTjhemaya onguyise kaGogi, uyise kaTjhimeyi

⁵ onguyise kaMikha, uyise kaReyaya onguyise kaBhali,

⁶ uyise kaBhera owadingiswa nguTigilathi-Pileseri ikosi ye-Asiriya. UBhera lo, gade amrholi wekoro yakwaRubeni.

⁷ Abafowabo kaBhera ngokuya ngemindenabo njengombana itlolwe ngokulandelana kwayo bekungilaba: uJehiyeli oyihloko, uZakariya

⁸ noBhela umsa ka-Azazi omsa kaTjhema umsa kaJuweli. Umndeni kaBhela wahlala enarheni ye-Aroweri ukuya eNebo neBhali-Mewoni.

⁹ Ngepumalanga ikoro kaRubeni yahlala ukuyela ngemkhawulweni werhalawumba nganeno komlambo iYufrathe ngombana ifuywayo beyandile sele iminyana enarheni yeGiliyadi.

¹⁰ Bekusemihleni kaSawula lokha bakwaRubeni nabasahlela amaHagari bebawahlula. Bahlala emizinawo yamatende esifundeni soke sangepumalanga yeGiliyadi.

Iinzukulwana zakaGadi

¹¹ Iinzukulwana zakaGadi gade zihlala eBhatjhani ukuya ngeSaleka endaweni eseduze nebakwaRubeni.

¹² UJuweli gade ayihloko eBhatjhani, kulandele uTjhafamu bese kuza uJanayi noTjhafathi.

^13-15 EGiliyadi u-Arhi umsa ka-Abidiyeli omsa kaGuni gade ayihloko yemindeni egade irholwa nguMikhayeli, uMetjhulamu, uTjheba, uJorayi, uJakani, uZiya no-Ebhere, bebalikhomba sebaboke. Labo bekumadodana ka-Abirhayili umsa kaRhuri omsa kaJarowarhi umsa kaGiliyadi omsa kaMikhayeli umsa kaYetjhitjhayi omsa kaJarhido umsa kaBhuzi.

¹⁶ AmaGadi gade ahlala emizaneni yeGiliyadi neBhatjhani kanye nemirhuleni yeTjharoni ukuya ngemaphethelwenayo.

¹⁷ Yoke imindeni le beyitloliswe erhelweni leenzukulwana ngesikhathi sokubusa kwakaJotamu ikosi yakwaJuda noJerobhowamu ikosi yakwa-Israyeli.

Izipi zangepumalanga yeJordani

¹⁸ BakwaRubeni, bakwaGadi nesiquntu sekoro yakwaManase gade baneengorho ezibandulelwe ukulwa ngesabula nesihlangu kanye nangomsebe; banekghono lepi. Bebanamatjhumi amane nane weenkulungwana namakhulu alikhomba anamatjhumi asithandathu wabantu ebebalungele ipi.

¹⁹ Balwa nebakwaHagari, okutjho iinkoro zamaJethuri, amaNafitjhi namaNodabi.

²⁰ UZimu wabasiza wanikela bakwaHagari nabo boke abanabo ezandleni zabo ngombana balila kuye ngesikhathi sepi. Waphendula imithandazwabo ngombana gade bamthemba.

²¹ Bathumba ifuyo yabakwaHagari: iinkulungwana ezimatjhumi amahlanu weenkamela, iinkulungwana ezimakhulu amabili namatjhumi amahlanu wezimvu, iinkulungwana ezimbili zabodumbana kanye nabantu abalikhulu leenkulungwana.

²² Inengi labantu laradlhwa phasi lafa ngombana ipi beyingeyakaZimu. Bahlala enarheni leyo bekwaba sikhathi sokuthunjwa kwabo.

Isiquntu sekoro yakwaManase

²³ Isiquntu sekoro yakwaManase besisinengi khulu. Besihlala enarheni yeBhatjhani ukuya ngemikhawulweni yangetlhagwini yeBhali-Rherimoni, neentabeni zeSeniri neRherimoni.

²⁴ Iinhloko zemindenaso bekungu-Eferi, uYitjhi, u-Eliyeli, u-Azriyeli, uJoromiya, uHodaviya noJarhidiyeli. Bekuziingorho, iinhloko zemindeni ezinedumo.

²⁵ Kodwana bebangakathembeki kuZimu waboyisemkhulu, badlhemadlhema ngemva kwabosingazimu babantu benarha leyo, abantu uZimu ababhubhisa phambi kwabo.

²⁶ Nje-ke uZimu wakwa-Israyeli wavusa ummoya kaPhuli ikosi ye-Asiriya (ogade asaziwa ngelikaTiligathi-Pilineseri). UPhuli wadingisa bakwaRubeni, bakwaGadi nesiquntu sekoro yakwaManase wabahlalisa eRhalarhi, eRhabori, eHara nangemlanjeni iGozani. Basese lapho nanamhlanje.