1 IINKRONIKE 29 - IsiNdebele 2012 Translation

Izipho zokwakha ithempeli

¹ Ikosi uDavida yakhuluma nehlangano yoke yathi: “Indodanami uSolomoni uZimu akhetha yona yodwa, isakhula begodu isengakabi nelizwi. Umsebenzi wokwakha mkhulu ngombana umakho lo akusiwo womuntu kodwana ngewakaSomnini uZimu.

² Ngenze ngamandlami woke ukubonelela ithempeli lakaZimami: Ngibonelele ngegolide mayelana nomsebenzi wegolide, isiliva kokwesiliva, ikoporo kokwekoporo, isimbi kokwesimbi nesigodo kokwesigodo. Godu ngibonelele ngamatje aligugu abomvu nahlaza mayelana nokukghabisa, amatje wemifunda ngemifunda wokwendlala phasi, nemihlobohlobo yamatje aligugu kanye nemabula enengi.

³ Ngaphezu kwakho koke engibonelele ngakho, ngenca yokuthanda kwami ithempeli lakaZimami, nginikela nangalokho okungekwami okuligolide nesiliva mayelana nendlu ecwengileko, ithempeli lakaZimami:

⁴ iinkulungwana ezilikhulu nantathu zamakhilogremu wegolide, neenkulungwana ezimakhulu amabili namatjhumi amane wamakhilogremu wesiliva elicolisiweko bonyana kunamekwe amaboda wemakhiwo,

⁵ igolide kokwegolide nesiliva kokwesiliva, koke okufuze kwenziwe bososino. “Nje-ke ngubani kinapha namhlanje ofuna ukuzahlukanisela uZimu ngokunikela ngehliziyo evumako na?”

⁶ Iinhloko zemindeni, iinkhulu zeenkoro zakwa-Israyeli, iinduna zeenkulungwana nezamakhulu kanye nabaphathi bomsebenzi wekosi uDavida, banikela ngehliziyo evumako.

⁷ Banikelela umsebenzi wethempeli lakaZimu iinkulungwana ezilikhulu namatjhumi alikhomba nanye zamakhilogremu wegolide, iinkulungwana ezilitjhumi zeempaparwana zegolide, iinkulungwana ezimakhulu amathathu namatjhumi amane nambili zamakhilogremu wesiliva, iinkulungwana ezimakhulu asithandathu netjhumi nesithandathu zamakhilogremu wekoporo iingidi ezintathu neenkulungwana ezimakhulu amane namatjhumi amabili nekhomba zamakhilogremu wesimbi.

⁸ Boke abagade banamatje aligugu bawanikela esithaleni samagugu wethempeli lakaSomnini ngaphasi kwesandla sakaJerhiyeli umGeritjhoni.

⁹ Abantu bathokoza khulu ngokunikela kwabo. Iye, banikela ngokuvuma kwehliziyo kuSomnini uZimu. UDavida naye wathaba khulu.

Umthandazo kaDavida

¹⁰ UDavida wadumisa uSomnini phambi kwehlangano yoke wathi: Idumo alibe kuwe Somnini, Zimu wakababethu u-Israyeli, bekube nini nanini.

¹¹ Iye Somnini, ubukhulu namandla ngekwakho, idumo, iphazimulo nobukhosi ngekwakho ngombana koke okusezulwini nephasini kungekwakho. Iye, Somnini, umbuso ungewakho, wena Somnini uphakamile, uyihloko yakho koke.

¹² Umnono nokuhlonitjhwa kuvela kuwe; umbusi wakho koke wena Somnini. Iinkhwepha namandla kulawulwa nguwe; ukukhulisa nokuqinisa kukuwe wedwa.

¹³ Yeke-ke Zimethu, siyakuthokoza, nebizo lakho elibabazekako siyalidumisa.

¹⁴ “Nje-ke bengingubani mina, nesizwe sami besiyini bona singabe sinikele ngehliziyo evumako? Lokhu sikwenze ngombana koke kuvela kuwe Somnini, thina sinikele kwaphela lokho esikuphiwe sisandla sakho.

¹⁵ Thina siziinkhonzi nemiqhamuka phambi kwakho, njengabo boke abobamkhulu. Imihla yethu ephasini injengethunzi, akukho okujame isiphelani.

¹⁶ Maye Somnini! Yoke ipahla osibonelele ngayo bona sikwakhele ithempeli lebizo lakho elicwengileko, ibuya ezandleni zakho begodu yoke ingeyakho.

¹⁷ Ngiyazi Zimami bona uhlola ihliziyo begodu uthokozela ubuqotho. Iye Somnini, nami nginikele koke lokhu ngobuqotho behliziyo begodu nabantu bakho abakhona lapha ngibabonile bona bakunikelele ngokuthakasa batjhaphulukile.

¹⁸ Somnini, Zimu wabobaba u-Abrahamu, u-Isaka no-Israyeli, yenza abantwaba babe nomkhumbulo lo eenhliziyweni zabo isiphelani. Nqophisa iinhliziyo zabo kuwe Somnini.

¹⁹ Nikela noSolomoni indodanami ihliziyo epheleleko yokulonda imiyalo, iimfuneko neemiso zakho zoke, nokobana enze koke okusemandlenakhe bona akhe umakho engiwuboneleleko.”

²⁰ Nje-ke uDavida wathi kiyo yoke ihlangano: “Dumisani uSomnini uZimenu” Yeke ihlangano yadumisa uSomnini uZimu waboyise. Abantu baguqa bahloma iinhloko phasi phambi kwakaSomnini uZimu naphambi kwakaDavida ikosabo.

²¹ Benza imihlabelo kuSomnini. Ngelanga elilandelako benza imihlabelo yokutjhiswa kuSomnini: ikulungwana yeenkunzi, ikulungwana yamaqama, ikulungwana yeemvana eziduna neenselo zomnikelo ezikhambisana nayo. Godu kwenzelwa woke u-Israyeli imihlabelo eminengi yetjhebiswano.

USolomoni ubekwa babantu bona abe yikosi

²² Badla bebasela bathakasa khulu phambi kwakaSomnini uZimu mhlanokho. USolomoni umsa kaDavida godu wabekwa waba yikosi. Bamzesa njengomrholi emsebenzini kaSomnini uZimu bebazesa noTsadokhi bona abe mphristi omkhulu.

²³ USolomoni wahlala esihlalweni sobukhosi bakaZimu esikhundleni sakayise uDavida. Waba ngophumelelako, nama-Israyeli woke amlalela.

²⁴ Iinkhulu zoke neengorho, ngitjho nawo woke amadodana wekosini uDavida azibophelela ukusekela ikosi uSolomoni.

²⁵ USomnini uZimu wamphakamisa khulu uSolomoni phambi kwama-Israyeli woke. Wamthwesa ubukhosi obudlondlobeleko nobungakhange bube khona nakeyodwa yamakhosi ngaphambilini kwa-Israyeli.

Ukuhlongakala kwakaDavida

²⁶ UDavida umsa kaJese gade ayikosi yakwa-Israyeli woke.

²⁷ Wabusa kwa-Israyeli iminyaka ematjhumi amane. Elikhomba wayibusa eRhebroni, ematjhumi amathathu nantathu kwaba seJerusalema.

²⁸ Wahlongakala asele athukghele khulu; gade anelisekile ngamalanga wokuphila, ngomnono nangedumo. USolomoni indodanakhe wabusa esikhundleni sakhe.

²⁹ Izehlakalo zekosi uDavida, kusukela ekuthomeni bekube sekugcineni zitlolwe emtlolweni wakaSamyela umboni, wakaNathani umphorofidi newakaGadi umboni.

³⁰ Emitlolweni leyo bekulandwa ngakho koke ukubusa kwakhe, izenzo zobungorho bakhe nezehlakalo zoke ezamvelelako yena no-Israyeli kanye nemibuso yeenarha ezinye.