1 IINKRONIKE 27 - IsiNdebele 2012 Translation

Iinqhema zamabutho

¹ Kwenziwa irhelo lama-Israyeli ngokweenhloko zemindeni, iinduna zeenkulungwana, zamakhulu kanye nabatjheji bazo. Labo basebenzela ikosi uDavida mayelana nakho koke okuphathelene neenqhema zamabutho. Iinqhemezo gade zisemsebenzini inyanga nenyanga bekube mnyaka woke. Esinye nesinye isiqhema gade sinamadoda aziinkulungwana ezimatjhumi amabili nane. Irhelwelo belijame bunje:

² Phezu kwesiqhema sokuthoma enyangeni yokuthoma bekunguYatjhobamu umsa kaZabidiyeli. Esiqhemeni sakhe bekunamadoda aziinkulungwana ezimatjhumi amabili nane.

³ UYatjhobamu gade asizukulwana sakaPeretsi begodu ayinduna yeenkhulu zoke zebutho enyangeni yokuthoma.

⁴ Phezu kwesiqhema senyanga yesibili bekunguDodayi umArhorhi. Esiqhemeni sakhe ebesinamadoda aziinkulungwana ezimatjhumi amabili nane bekunoMikhilothi ikosana.

⁵ Induna yesiqhema sesithathu senyanga yesithathu bekunguBhenaya umsa kaJehoyada umphristi omkhulu. Esiqhemeni sakhe bekunamadoda aziinkulungwana ezimatjhumi amabili nane.

⁶ UBhenaya lo, ngogade ayingorho yamatjhumi amathathu begodu aphethe abamatjhumi amathathu. Indodanakhe u-Amizabadi gade asesiqhemeneso.

⁷ Induna yesiqhema sesine senyanga yesine bekungu-Asayeli umnakwabo kaJowabi. Indodanakhe uZebadiya nguye owamlandelako ngokuphatha. Esiqhemeni sakhe bekunamadoda aziinkulungwana ezimatjhumi amabili nane.

⁸ Induna yesiqhema sesihlanu senyanga yesihlanu bekunguTjhamuthi umJizrarhi. Esiqhemeni sakhe bekunamadoda aziinkulungwana ezimatjhumi amabili nane.

⁹ Induna yesiqhema sesithandathu senyanga yesithandathu bekungu-Ira umsa ka-Ikhetjhi umTekhowa. Esiqhemeni sakhe bekunamadoda aziinkulungwana ezimatjhumi amabili nane.

¹⁰ Induna yesiqhema sekhomba senyanga yekhomba bekunguRheletsi umPeloni wakwa-Efrayimu. Esiqhemeni sakhe bekunamadoda aziinkulungwana ezimatjhumi amabili nane.

¹¹ Induna yesiqhema sobunane senyanga yobunane bekunguSibekayi umRhutjha wakwaZarirhi. Esiqhemeni sakhe bekunamadoda aziinkulungwana ezimatjhumi amabili nane.

¹² Induna yesiqhema sethoba senyanga yethoba bekungu-Abiyezeri umAnatothi wakwaBhenjamini. Esiqhemeni sakhe bekunamadoda aziinkulungwana ezimatjhumi amabili nane.

¹³ Induna yesiqhema setjhumi senyanga yetjhumi bekunguMarayi umNethofa wakwaZarirhi. Esiqhemeni sakhe bekunamadoda aziinkulungwana ezimatjhumi amabili nane.

¹⁴ Induna yesiqhema setjhumi nanye senyanga yetjhumi nanye bekunguBhenaya umPiratoni wakwa-Efrayimu. Esiqhemeni sakhe bekunamadoda aziinkulungwana ezimatjhumi amabili nane.

¹⁵ Induna yesiqhema setjhumi nambili senyanga yetjhumi nambili bekunguRhelidayi umNethofa womndeni ka-Otiniyeli. Esiqhemeni sakhe bekunamadoda aziinkulungwana ezimatjhumi amabili nane.

Abaphathi beenkoro zakwa-Israyeli

¹⁶ Phezu kweenkoro zakwa-Israyeli bekungilaba: KebakwaRubeni bekungu-Eliyezeri umsa kaZikiri, kwaSimiyoni kunguTjhefathiya umsa kaMaka,

¹⁷ kwaLevi kunguRhatjhabiya umsa kaKhemuyeli, kwa-Aroni kunguTsadokhi,

¹⁸ kwaJuda kungu-Elihu omunye wabomnakwabo kaDavida, kwa-Isakari kungu-Omri umsa kaMikayeli,

¹⁹ kwaZebuloni kunguYitjhimaya umsa ka-Obadiya, kwaNafitali kunguJerimothi umsa ka-Azriyeli,

²⁰ kuma-Efrayimu kunguHosiya umsa ka-Azaziya, esiquntwini sekoro yakwaManase kunguJuweli umsa kaPhedaya,

²¹ kwesinye isiquntu sekoro yakwaManase ngeGiliyadi kunguJido umsa kaZakariya, kwaBhenjamini kunguJasiyeli umsa ka-Abineri,

²² kwaDani kungu-Azariyeli umsa kaJerorhamu. Lezo-ke bekuziinkhulu phezu kweenkoro zakwa-Israyeli.

²³ UDavida akhange abale amadoda aneminyaka ematjhumi amabili namkha ngaphasi kwaleyo ngombana uSomnini uZimu gade athembise bona uzakwenza u-Israyeli abe mnengi njengeenkwekwezi zomkayi.

²⁴ UJowabi umsa kaTseruya wathoma ukubala amadoda kodwana wangaqeda ukuwabala. Ngenca yokubala lokho u-Israyeli wehlelwa manikelela, nesibalweso akhange besisangena encwadini yemilando yekosi uDavida.

Iinkhulu emsebenzini wekosi uDavida

²⁵ U-Azimavethi umsa ka-Adiyeli gade aphethe amagugu wesigodlo. UJonathani umsa ka-Uziya aphethe iinlulu ngeemfundeni okutjho emadorobheni, emizaneni neenthaleni zabalindi.

²⁶ U-Ezri umsa kaKelubi gade aphethe iinsebenzi zemasimini.

²⁷ UTjhimeyi umRama gade aphethe iimvande zesidiribe. UZabidi umTjhifimi aphethe umkhiqizo weemvande zesidiribe okutjho ibulungelo lewayini.

²⁸ UBhali-Rhanani umGederi aphethe imithi ye-oliva neyamakhiwani wommango eentatjaneni zenarha yangetjingalanga. UJowatjhi aphethe ibulungelo lamafutha we-oliva.

²⁹ UTjhirithayi umTjharoni aphethe imihlambi yeenkomo efula ngeTjharoni. UTjhafathi umsa ka-Adilayi aphethe imihlambi yeenkomo yangemirhobeni.

³⁰ U-Obili umItjhimayeli aphethe amakamela. UJerhideya umMeronothi aphethe abodumbana.

³¹ UJazizi umHagiri aphethe imihlambi yezimvu neembuzi. Boke labo gade kubaphathi bepahla yekosi uDavida.

³² UJonathani usonghwanakhe lakaDavida gade amluleki, amumuntu onomkhumbulo obanzi begodu amtloli. Yena noJerhiyeli umsa kaRhakimoni gade batjheje amadodana wekosi.

³³ U-Arhitofeli gade amluleki wekosi; uRhutjhayi umAriki yena amnganayo.

³⁴ U-Arhitofeli walandelwa nguJehoyada umsa kaBhenaya kwase kuba ngu-Abiyatari. UJowabi yena waba yinduna yebutho lesigodlo.