1 IINKRONIKE 26 - IsiNdebele 2012 Translation

Abalindi bethempeli

¹ Iinqhema zabalindisango bezijame bunje: Emndenini kaKhorarhi bekunguMetjhelemiya umsa kaKhore osizukulwana saka-Asafa.

² Amadodana kaMetjhelemiya bekunguZakariya izibulo, alanywa nguJediyaheli, wesithathu kunguZebadiya, wesine kunguJatiniyeli,

³ wesihlanu kungu-Elamu, wesithandathu kunguJehorhanani wekhomba kungu-Eliyehowenayi.

⁴ Amadodana ka-Obede-Edomu bekunguTjhemaya olizibulo alanywa nguJehozabadi, wesithathu kunguJowarhi, wesine kunguSakari, wesihlanu kunguNetaneli,

⁵ wesithandathu kungu-Amiyeli, wekhomba kungu-Isakari noPewuletayi wobunane. UZimu gade ambusisile u-Obede-Edomu.

⁶ UTjhemaya umsa ka-Obede-Edomu naye gade anamadodana. Amadodana lawo bekabarholi emndenini kayise ngombana gade kuziingorho.

⁷ Amadodana kaTjhemaya bekungu-Otini, uRefayeli, u-Obede no-Elizabadi; iinhlobo zakaTjhemaya u-Elihu noSemakiya bekumadoda anekghono.

⁸ Zoke iinzukulwana zaka-Obede-Edomu lezo, zona namadodanazo nabafowazo bekumadoda anetlha nanamandla ekusebenzeni. Sezizoke bezimatjhumi asithandathu nambili.

⁹ UMetjhelemiya gade anamadodana nabafowabo, kumadoda anekghono. Bebalitjhumi nabunane sebaboke.

¹⁰ URhosa osizukulwana sakaMerari gade anamadodana alandelako: uTjhimri (owathi nanyana angasilo izibulo, uyise wamenza ihloko yomndeni),

¹¹ alanywa nguRhilikhiya, wesithathu kunguThebaliya, wesine kunguZakariya. Amadodana nabafowabo kaRhosa bebalitjhumi nantathu.

¹² Iinqhema zabalindisangwezi, ngokurholwa ziinduna zazo, gade zenza imisebenzi yokulotjha ethempelini lakaSomnini njengombana gade kwenza iinhlobo zazo.

¹³ Isango nesango lenzelwa ifumbe ngokwemindeni emikhulu nemincani ngokufanako.

¹⁴ Kwathi lokha nakuphoswa iimfumbe, zawa ngendlela le: Ifumbe yesango langepumalanga yadla uTjhelemiya. Ifumbe yesango langetlhagwini yadla indodana kaTjhelemiya uZakariya obegade amluleki ohlakaniphileko.

¹⁵ Ifumbe yesango langesewula yadla u-Obede-Edomu. Ifumbe yeenlulu yadla amadodanakhe.

¹⁶ Ifumbe yesango langetjingalanga nendleleni ekhuphukela esangweni leTjhalekethi yadla uTjhupimu noRhosa. Iindlwana zabalindaba bezisemaduzana.

¹⁷ Imihla ngemihla bekugada amaLevi asithandathu ngepumalanga yethempeli, amane ngetlhagwini, amane ngesewula. Isilulu ngasinye besigadwa babantu ababili.

¹⁸ Abane bagada indlela eya emathurini ngetjingalanga yethempeli, ababili bagada ngemathurini.

¹⁹ Labo-ke bekuziinqhema zabalindisango ebegade baziinzukulwana zakaKhorarhi noMerari.

Abaphathisikhwama nezinye iinkhulu

²⁰ AmaLevi amanye gade aqalene nokuphathwa kweenlulu zethempeli lakaZimu neenlulu zeminikelo ekhethekileko.

²¹ Iinlulwezi bezisesandleni seenhloko zomndeni kaLadani osizukulwana sakaGeritjhoni ngoJerhiyeli.

²² UZetamu umsa kaJerhiyeli noJuweli umnakwabo gade balawula iinlulu zethempeli lakaSomnini.

²³ Godu bezisesandleni semindeni ka-Amrami, uJitsihari, uRhebroni no-Uziyeli:

²⁴ UTjhebuyeli isizukulwana sakaGeritjhoni umsa kaMosi gade asikhulu esengamele amagugu.

²⁵ U-Eliyezeri umnakwabo kaTjhebuyeli bekunguyise kaRerhabiya onguyise ka-Isaya, uyise kaJoramu, onguyise kaZikiri, uyise kaTjhelomithi.

²⁶ UTjhelomithi lo neenhlobo zakhe gade bengamele yoke iminikelo ekhethekileko eyahlukaniselwa yikosi uDavida, iinhloko zemindeni, iinduna zeenkulungwana, iinduna zamakhulu kanye nezinye iinduna zamabutho.

²⁷ Enye yepango eyahlangulwa epini bayinikelela ukutjhejwa kwethempeli lakaSomnini.

²⁸ Yoke into eyahlukaniselwa nguSamyela umboni, noSawula umsa kaKhitjhi, u-Abineri umsa kaNeri noJowabi umsa kaTseruya nazo zoke izinto ezazihlukaniselweko, gade zisesandleni sakaTjhelomithi neenhlobo zakhe.

²⁹ Emndenini kaJitsihari uKenaniya neenzukulwana zakhe gade banikelwe umsebenzi ongaphandle kwethempeli kilo loke lakwa-Israyeli kobana babe batjheji nabagwebi.

³⁰ Emndenini kaRhebroni uRhatjhabiya neenhlobo zakhe okumadoda anekghono ayikulungwana namakhulu alikhomba, gade batjheje umsebenzi wezokuphathwa kwa-Israyeli ngetjingalanga yeJordani okutjho ukuphelelisa yoke imisebenzi kaZimu neyekosabo.

³¹ Emndenini kaRhebroni uJeriya gade ayihloko. Kwathi ngomnyaka wamatjhumi amane wokubusa kwakaDavida, kwenziwa irhubhululo, kwafunyanwa hlangana kweenzukulwana nemindeni yakwaRhebroni amadoda aziingorho eJazeri eGiliyadi.

³² Iinhlobo zakaJeriya gade kumadoda anekghono. Iinhloko zemindenazo beziziinkulungwana ezimbili namakhulu alikhomba. Wona-ke ikosi uDavida yawabeka phezu kwebakwaRubeni, bakwaGadi naphezu kwesiquntu sekoro yabakwaManase mayelana nazo zoke iindaba zakaZimu nekosabo.