1 IINKRONIKE 23 - IsiNdebele 2012 Translation

UDavida uhlela amaLevi kobana alotjhe ngethempelini

¹ Kuthe lokha uDavida nasele amdala angasakhanuki litho, wabeka indodanakhe uSolomoni bona ibe yikosi yakwa-Israyeli.

² Wahlanganisa boke abarholi bakwa-Israyeli, abaphristi kanye namaLevi.

³ Wabala amaLevi abasele aneminyaka ematjhumi amathathu nokudlula. Bekuziinhloko zamadoda aziinkulungwana ezimatjhumi amathathu nabunane.

⁴ UDavida wathi: “Phakathi kwamadoda la, iinkulungwana ezimatjhumi amabili nane zizakuqalana nokulotjha ngethempelini lakaSomnini, iinkulungwana ezisithandathu kube ziinkhulu nabagwebi,

⁵ iinkulungwana ezine zibe balindisango bese kuthi iinkulungwana ezine zona zidumise uSomnini ngeenliliswa engazenzela bona adunyiswe ngazo.”

⁶ UDavida wahlukanisa amaLevi ngeenqhema ukuya ngokwemindeni kaGeritjhoni, uKhehathi noMerari.

⁷ Emndenini kaGeritjhoni kwavela imindeni kaLadani noTjhimeyi.

⁸ Iinzukulwana zakaLadani bekumindeni kaJehiyeli ogade angoqakatheke khulu, uZethamu noJuweli; kwaba mindeni emithathu.

⁹ Endodaneni kaJuweli enguTjhimeyi kwavela imindeni kaTjhelomithi, uRhaziyeli noHarana; kwaba mindeni emithathu.

¹⁰ Iinzukulwana zakaTjhimeyi bekumindeni kaJarhathi, uZina, uJewutjhi noBheriya. Imindeni emine le gade iziinzukulwana zakaTjhimeyi.

¹¹ Umndeni kaJarhathi gade ungoqakathekileko, ulandelwe ngewakaZina. UJewutjhi noBheriya akhange babe namadodana amanengi, yeke babalwa njengomndeni munye banikelwa umsebenzi munye.

¹² Iinzukulwana zakaKhehathi bekumindeni emine elandelako: u-Amramu, uJitsihari, uRhebroni no-Uziyeli.

¹³ Amadodana ka-Amramu kungu-Aroni noMosi. U-Aroni wahlukaniselwa bonyana esikhathini soke yena nesizukulwana sakhe baphathe iminikelo ezilwako. Bebamele batjhise itjhwalo phambi kwakaSomnini, bamlotjhe bebamemezele isibusiso ebizweni lakhe isiphelani.

¹⁴ Iinzukulwana zakaMosi umuntu kaZimu zabalwa nengcenye yekoro yakaLevi.

¹⁵ Amadodana kaMosi bekunguGeritjhomu no-Eliyezeri.

¹⁶ Eenzukulwaneni zakaGeritjhomu, uTjhebuyeli gade angoqakatheke khulu.

¹⁷ URerhabiya gade ayihloko yeenzukulwana zaka-Eliyezeri. U-Eliyezeri gade anganawo amanye amadodana, kodwana uRerhabiya waba namadodana amanengi.

¹⁸ Eenzukulwaneni zakaJitsihari, uTjhelomithi gade angoqakatheke khulu.

¹⁹ Eenzukulwaneni zakaRhebroni, uJeriya gade angoqakatheke khulu, wesibili kungu-Amariya, wesithathu kunguJarhaziyeli, uJekhameyamu angowesine.

²⁰ Eenzukulwaneni zaka-Uziyeli, uMika gade angoqakatheke khulu, kulandele uYitjhiya.

²¹ Iinzukulwana zakaMerari bekumindeni kaMarhili noMutjhi. Amadodana kaMarhili bekungu-Eliyazari noKhitjhi.

²² U-Eliyazari wahlongakala anganawo amadodana, anabentazana kwaphela. Abentazanabo bathathwa bomnakwabo okumadodana kaKhitjhi.

²³ Iinzukulwana zakaMutjhi bekumindeni kaMarhili, u-Ederi noJeremothi; kwaba mindeni emithathu.

²⁴ Laba-ke bekumindeni yamaLevi ebekumele basebenze ngethempelini lakaSomnini. Boke ebebangaphezu kweminyaka ematjhumi amabili ubudala babalwa, amabizwabo abe atloliswa eenqhemeni zomsebenzi ngaphasi kweenhloko zemindeni.

²⁵ Kwaba njalo ngombana uDavida wathi: “USomnini uZimu wakwa-Israyeli unikele abantu bakhe ukuphumula begodu uhlala eJerusalema isiphelani,

²⁶ yeke amaLevi nawo akusafuneki ahlale athwele ithaberinakeli nanyana enye into esetjenziselwa ukulotjha uSomnini.”

²⁷ Ngokuya ngomyalo wokugcina kaDavida, amaLevi gade abalwe kusukela kwabaneminyaka ematjhumi amabili ubudala nanyana ukudlula.

²⁸ Umsebenzi wamaLevi bekukusiza iinzukulwana zaka-Aroni ekulotjheni ngethempelini lakaSomnini: ukutjheja iinrhodlo zethempeli namarhayisi, ukuhlanza zoke izinto ezikhethekileko nokwenza eminye imisebenzi ephathelene nokulotjha endlini kaZimu.

²⁹ Bebatjheja izikwa ezibekwa etafuleni, iflowuru esefiweko yomnikelo weenthoro, izikwa ezirhwamuzelako, izikwa zedendeleko, ihlama nokulinganisa iinthako.

³⁰ Bekufuze njalo ekuseni bathokoze bebadumise uSomnini, nantambama benze soneso.

³¹ Godu bekufuze benze njalo ngaso soke isikhathi lokha nakutjhiselwa uSomnini imihlabelo yokutjhiswa, ngamaSabatha, ngeminyanya yokuthwasa kwenyanga nangemigidi ejanyisiweko. Bekumele njalo nje isibalo esibekiweko samaLevi silotjhe ngethempelini lakaSomnini.

³² Ngendlela leyo amaLevi enza imisebenzawo ngetendeni lokuhlangana nangendaweni ecwengileko. Enza lokhu asiza abafowabo okuziinzukulwana zaka-Aroni malungana nokulotjha ngethempelini lakaSomnini.