1 IINKRONIKE 21 - IsiNdebele 2012 Translation

UDavida ubala amadoda wepi

¹ Umjamelani ogade afuna ukubangela u-Israyeli inyakanyaka watjitjizela uDavida bona abale ama-Israyeli.

² UDavida wathi kuJowabi neenduna zamabutho: “Khambani niyokubala ama-Israyeli kusukela eBheritjheba ngesewula ukuya eDani ngetlhagwini. Nibuye-ke nizongitjela umphumela bona ngazi bonyana mangaki.”

³ Kodwana uJowabi wathi: “Kubayini-ke ikosami ifune ukwazi lokhu? UZimu angandisa isibalo samabuthwakhe sibuyelelwe ngamakhulukhulu kunalokhu esingikho kwanje? Kosami, Ndabezitha, amabutho lawo akasisesandleni sakho na? Alo, kubayini u-Israyeli kufuze athwale umlandu ngebanga lesenzwesi?”

⁴ Kodwana uJowabi wabindeka ngependulo yekosi uDavida. Yeke waphuma wadabula kilo loke lakwa-Israyeli, emva kwalokho wabuyela eJerusalema.

⁵ UJowabi wabikela uDavida isibalo samadoda wepi: Kilo loke lakwa-Israyeli bekunesigidi nekhulu leenkulungwana lamadoda akwazi ukulwa ngesabula, sekuhlanganiswe neenkulungwana ezimakhulu amane namatjhumi alikhomba wakwaJuda.

⁶ Kodwana uJowabi akhange afake bakwaLevi nebakwaBhenjamini esibalweni sakhe ngombana gade akghabhudlhwa myalo wekosi uDavida.

⁷ Begodu into leyo yaba yimbi phambi kwakaZimu; ngebangelo wamadlha u-Israyeli.

⁸ Nje-ke uDavida wathi kuZimu: “Maye mina, ngone khulu ngokwenza into enje. Maye mina, ngonile ngesenzo samesi. Ngiyabawa, libalela umlandu wencekwakho. Ubudlhadlha abelatjhwa.”

⁹ USomnini uZimu wathi kuGadi umboni kaDavida:

¹⁰ “Khamba uyokutjela uDavida bonyana nakhu okutjhiwo nguSomnini, ‘Ngikwendlalela nanzi izinto ezintathu, khetha yinye yazo ekufuze ngikuhlunguphaze ngayo.’ ”

¹¹ Nje-ke uGadi waya kuDavida wafese wathi kuye: “Nakhu okutjhiwo nguSomnini, ‘Zikhethele:

¹² iminyaka emithathu yendlala namkha iinyanga ezintathu usoloko ubaleka izitha zakho zikutsepunya ngesabulazo, nanyana amalanga amathathu wesabula kaSomnini okutjho isifo esizakwembatha inarha lokha ingilozi kaZimu ibhubhisa yoke imikhawulo yakwa-Israyeli.’ Yeke khetha ndoda bonyana kufuze ngibuyisele liphi kongithumileko.”

¹³ UDavida wathi kuGadi: “Ngisenyakanyakeni nanginje. Kungcono ngiwele ezandleni zakaSomnini ngombana yena umusakhe mkhulu; ngingaba yini ezandleni zabantu.”

¹⁴ Yeke uSomnini warhadla u-Israyeli ngesifo, kwabhubha iinkulungwana ezimatjhumi alikhomba zamadoda.

¹⁵ Nje-ke uZimu wathumela ingilozi ebhubhisako bonyana ibhubhise iJerusalema. Kodwana kwathi ingilozi isathi yenza lokho, uZimu wacabanga godu. Warhawuka ngebanga lamatlhuwo wathi engilozini leyo: “Kahle! Kwanele kwanjesi.” Ngesikhatheso ingilozi kaSomnini beyijame eselelweni saka-Orinani umJebusi.

¹⁶ UDavida waqala phezulu wabona ingilozi kaSomnini ijame emkayini phakathi kwezulu nephasi, iphethe isabulayo erhwatjhwiweko iyelulele eJerusalema. Nje-ke uDavida kanye nabaphathi bomuzi bembatha iinzilo bawa ngobuso ehlabathini.

¹⁷ UDavida wathi kuZimu: “Zimami, ngimi oyale bonyana kubalwe amadoda wepi. Yeke ngimi okhohlakeleko ngokwenza isono esingaka. Abantwaba sezizimvu nje. Boneni kangaka? Maye Somnini, Zimami, yeke isandla sakho asibe phezu kwami nomndenami, kodwana isifo asingehleli abantu bakaZimu.”

¹⁸ Ingilozi kaSomnini yatjela uGadi bonyana ayokutjela uDavida akhuphuke ayokwakhela uSomnini i-aldari eselelweni saka-Orinani umJebusi.

¹⁹ Yeke uDavida wakhuphukela eselelweni saka-Orinani njemgombana uGadi amtjelile ngokuya ngelizwi lakaZimu.

²⁰ U-Orinani gade abhula ikoroyi, uthe lokha najika ngesileyi wabona ingilozi. Amadodanakhe amane agade anaye esaba, azifihla.

²¹ Wathi u-Orinani nakaqalako wabona uDavida asiza kuye. Wasuka eselelweni wehla wafese waguqa phambi kwakaDavida wahloma ihloko phasi.

²² UDavida wathi kuye: “Ngithengisela iselelo sakhwesi ukuze ngakhele uSomnini uZimu i-aldari khonapho. Ngalokho isifo sizakusuka ebantwini. Mina ngizakukhokhela sona ngemali ezeleko.”

²³ Kodwana u-Orinani wathi kuDavida: “Awa, ikosi ingasithatha. Begodu ikosi ingenza njengombana ithanda. Mina ngizakunikela iinkabi bona zibe mhlabelo wokutjhiswa bese kuthi iingodo zeenleyi ngizinikele zibe ziinkuni, nekoroyi yona ibe mnikelo weenthoro. Koke lokhu kuzakuba sisipho.”

²⁴ Ikosi uDavida yamphendula yathi: “Awa mntabantu! Ngizakukhoka inani elipheleleko. Angikwazi ukuthathela uSomnini uZimu okungokwakho nanyana nginikele umhlabelo wokutjhiswa ngalokho engikufunyene ngesihle.”

²⁵ Yeke uDavida wakhokhela indawo leyo ku-Orinani ngamakhilogremu alikhomba wegolide.

²⁶ UDavida wakhela uSomnini i-aldari lapho bewanikela imihlabelo yokutjhiswa neyetjhebiswano. Wathandaza kuSomnini, uSomnini wamphendula ngomlilo ovela ezulwini wehlela e-aldarini lokutjhisa imihlabelo.

²⁷ Nje-ke uSomnini wakhuluma nengilozi, yona yabuyisela isabulayo ngesikhwameni sayo.

UDavida ukhetha indawo abe alungiselele nokwakhiwa kwethempeli

²⁸ Ngesikhatheso uDavida nakalemuka bonyana uSomnini uphendule umthandazwakhe ngeselelweni saka-Orinani umJebusi, wathoma ukunikela imihlabelo khonapho.

²⁹ Itende lokuhlanganela egade lenziwe nguMosi erhalawumbeni, ne-aldari lokutjhisa imihlabelo bekusese sendundumeni eGibiyoni,

³⁰ kodwana uDavida akhange aphumelele ukuya lapho bonyana abuze kuZimu ngombana gade esaba isabula yengilozi kaZimu.