1 IINKRONIKE 20 - IsiNdebele 2012 Translation

Ukuthunjwa kweRabha

¹ Kwathi nakuthoma umnyaka lokha amakhosi naphuma ipi, uJowabi waphuma nebutho lamajoni ukuyokulwa. Wabhubhisa inarha yakwa-Amoni, waragela phambili wavimbezela iRabha. UDavida yena wasala eJerusalema. UJowabi wasahlela iRabha wayitjhiya imarubhi.

² UDavida wathatha isihlohlo ebegade sisehloko yekosi yakwa-Amoni. Ubudisi baso bebumakhilogremu amatjhumi amathathu nane begodu ngaphakathi kwaso bekunelitje eliligugu. Sathweswa uDavida. UDavida wathatha ipango enengi yedorobhelo.

³ Wakatelela abantu bedorobhelo bona bamsebenzele: Wabasebenzisa ngeensarha, ngamapeke wesimbi nangamazembe. Wenza lokhu kiwo woke amadorobho wama-Amoni. UDavida nebutho lakhe loke babuyela eJerusalema.

Ipi namaFilista

⁴ Emva kwalokho kwaqubuka ipi namaFilista eGezeri. Ngesikhatheso uSibekayi weRhutjha wabulala uSipayi owabe ayitsitsirimba. Ngalokho amaFilista aguqiswa.

⁵ Kenye ipi namaFilista, u-Elirhanani umsa kaJayiri wabulala uLarhimi ongumnakwabo kaGoliyathi umGathi. Umphini womkhontwakhe wawufana nompherho womaluki.

⁶ Nakenye godu ipi eyaba seGathi, kwakunendoda ede enemino esithandathu esandleni ngasinye namazwani asithandathu enyaweni ngalinye, okumatjhumi amabili nane sekukoke. Naye gade ayitsitsirimba.

⁷ Wathi lokha natlhorholoja ama-Israyeli, uJonathani umsa kaTjhimeya omnakwabo kaDavida wayibulala.

⁸ Lezo bekuziinzukulwana zakaRafa weGathi, ezabulawa nguDavida neenduna zakhe.