1 IINKRONIKE 18 - IsiNdebele 2012 Translation

Izipi nombuso kaDavida

¹ Kwathi emva kwalokho uDavida wamadlha amaFilista bewawabusa. Wathumba iGathi nemizanayo wayikhupha ezandleni zamaFilista.

² UDavida waragela phambili wamadlha namaMowabi, aba ziinsebenzi zakhe, athela nemithelo kuye.

³ Ngaphezu kwalokho wamadlha nekosi yeTsoba uHadadi-Ezeri hlanu kweRhamathi, lokha uHadadi-Ezeri nasendleleni bona ayokusungula umbuswakhe magegana nomlambo iYufrathe.

⁴ UDavida wathumba kuye iinkulungwana zeenkarana zepi, iinkulungwana ezilikhomba zabakhweli beenkarana kanye neenkulungwana ezimatjhumi amabili zamajoni weenyawo. Waqunta imisipha yeenjomani wazitjhiyela kwaphela ikhulu leenjomani ezibotjhelwako.

⁵ Kuthe lokha ama-Aramu weDamaseku nakeza bonyana azokusiza uHadadi-Ezeri ikosi yeTsoba, uDavida wamadlha phasi iinkulungwana ezimatjhumi amabili nambili zawo.

⁶ Wajamisa iinqhema zamajoni embusweni wama-Aramu eDamaseku. Ama-Aramu asebenzela uDavida abe athela nemithelo kuye. USomnini wapha uDavida ukuhlula koke lapha akhamba khona.

⁷ UDavida wathatha iinlanda zegolide egade kungezeenduna zakaHadadi-Ezeri waziletha eJerusalema.

⁸ Ukusukela eThibirhathi neKuni ekumimizi egade ingeyakaHadadi-Ezeri, uDavida wabutha lapho ikoporo enengi kwamambala. Emva kwesikhathi ngekoporo leyo uSolomoni wenza ilwandle lekoporo, iinsika zethempeli nezitjana zoke zekoporo.

⁹ Kuthe lokha uTowu ikosi yeRhamathi nakezwa bonyana uDavida uhlule loke ibutho lakaHadadi-Ezeri ikosi yeTsoba,

¹⁰ wathumela uHadoramu indodanakhe ekosini uDavida uyokumbingelela nokumthokozisa ekwahluleni kwakhe ipi kaHadadi-Ezeri ngombana uHadadi-Ezeri bekahlala alwa naye. UHadoramu waphathela uDavida imihlobohlobo yezipho zegolide, zesiliva nezekoporo.

¹¹ Ikosi uDavida yanikela iziphezo kuZimu njengombana bekenzile ngesiliva negolide agade alithumbe kizo zoke izizwe azihlulileko. Izizwezi gade kuma-Edomu, amaMowabi, ama-Amoni, amaFilista nama-Amalekhi.

¹² U-Abitjhayi umsa kaTseruya wamadlha phasi itjhumi nabunane leenkulungwana zabakwa-Edomu ngemrhobeni weTswayi.

¹³ Wajamisa iinqhema zamajoni kwa-Edomu. Ama-Edomu woke asebenzela uDavida. Ngambala uSomnini uZimu wapha uDavida ukuhlula koke lapha akhamba khona.

Iinkhulu zakaDavida

¹⁴ UDavida wabusa phezu kwaka-Israyeli woke, wagweba ngokulungileko boke abeza kuye ngemiraro.

¹⁵ UJowabi umsa kaTseruya gade amphathi webutho; uJehotjhafathi umsa ka-Arhiludi kungusosiba;

¹⁶ uTsadokhi umsa ka-Arhitubi no-Abimeleki umsa ka-Abiyatari bekubaphristi; uTjhavitjha angumabhalana;

¹⁷ uBhenaya umsa kaJehoyada gade aphethe amaKereti namaPeleti; amadodana kaDavida wona bekaziinkhulu ngehlangothini lakayise.