1 IINKRONIKE 17 - IsiNdebele 2012 Translation

Isithembiso sakaZimu kuDavida

¹ Kuthe lokha uDavida nasele ahlezi anzinzile esigodlweni sakhe, wathi kuNathani umphorofidi: “Akhusuqale, mina ngihlezi ngesigodlweni somsedari ukube umfaji wesivumelano sakaSomnini wona usele ngetenjaneni.”

² UNathani waphendula uDavida wathi: “Ikosami ayenze ngokubona kwayo ngombana uZimu unayo.”

³ Ngobusukobo ilizwi lakaSomnini lafika kuNathani lathi:

⁴ “Khamba uyokutjela incekwami uDavida bonyana nakhu okutjhiwo nguSomnini, ‘Akusuwe ozongakhela indlu kobana ngihlale kiyo.

⁵ Mina akhange khengihlale ngendlini kusukela mhlana ngikhupha u-Israyeli eGibhide bekube namhlanje. Bengiseze ngigega netende kusukela kwelinye ukuya kwelinye, ngigelagela ethaberinakelini.

⁶ Kiyo yoke indawo lapha bengikhamba khona no-Israyeli, nakhe nangizwa ngikhuluma komunye wabarholi engabayala bona beluse abantu bami ngambuza bonyana kubayini angangakheli indlu yomsedari na?’

⁷ Nje-ke tjela incekwami uDavida uthi, ‘Nakhu okutjhiwo nguSomnini uMninimadlawoke: Mina ngakususa emadlelweni, ekweluseni umhlambi, ngakwenza bona ube mphathi wabantu bami u-Israyeli.

⁸ Ngibe nawe nanyana kukuphi lapha uya khona, ngaphelisa nezitha zakho zoke phambi kwakho. Nje-ke ube ngomunye wabadumileko ephasini.

⁹ Ngizokulungiselela isizwe sami u-Israyeli indawo, ngisinzinzise ukuze sibe nekhaya laso singasaphazamiseki. Iinkhohlakali azisoze zisasigandelela njengombana zenza ekuthomeni,

¹⁰ nanjengombana zenza soloku ngakhetha ababusi phezu kwabantu bami u-Israyeli. Nezitha zakho zoke ngizaziguqisa. Ngimemezela kuwe bona ngimi engizakwakhela indlu.

¹¹ Lokha amalangakho sele aphelile sewuphumule kiboyihlomkhulu, ngizakuvusa isizukulwana sakho, omunye wamadodanakho. Ngizakuqinisa ubukhosi bakhe.

¹² Nguye-ke ozangakhela indlu, ngizakunzinzisa isihlalo sakhe isiphelani.

¹³ Ngizakuba nguyise yena abe yindodanami. Angisoze ngasusa ithando lami kuye njengombana ngalisusa kiloyo okhambe ngaphambi kwakho.

¹⁴ Ngizambeka ngaphezu kwabantu bami nangaphezu kombuswami isiphelani. Nesihlalo sakhe sizakujama isiphelani.’ ”

¹⁵ UNathani wabikela uDavida woke amezwi wesambulo.

Ukuthokoza kwakaDavida

¹⁶ Nje-ke uDavida wangena ngetendeni wahlala phasi phambi komfaji kaSomnini wathi: “Hawu Somnini, Zimami! Bengiyini mina nomndenami bonyana ungabe ungibeke ezingeni elingaka?

¹⁷ Kwangasuthi lokho bekungakaneli phambi kwakho, wena Zimu, wakhuluma godu nangelikusasa lomndeni wencekwakho. Iye, ungikhethile mina, thuli lehlabathi njengombana kutjho incwadi yomyalwakho, wangiphakamisa Somnini, Zimami.

¹⁸ Alo-nje, incekwakho uDavida beyingathini okhunye ngehlonipho engaka ngombana wena, Somnini nguwe owazi incekwakho.

¹⁹ Ngebanga lencekwakho nangentandwakho wenze izinto ezikulwezi bewenza bona zazeke.

²⁰ Akakho onjengawe! Njengombana sezwa ngeendlebe zethu, akakho uZimu ngaphandle kwakho.

²¹ Ngubani-ke onjengabantu bakho u-Israyeli, isizwe ekukuphela kwaso ephasini uZimu aphuma ukuyosihlenga bonyana sibe babantu bakhe? Wazenzela idumo ngokwenza imikarisomraro emikhulu neyesabekako ngokuqotjha izizwe phambi kwabantu bakho owabahlenga eGibhide.

²² Wenza u-Israyeli bonyana abe sisizwe sakho isiphelani begodu wena Somnini, waba nguZimakhe.

²³ Nje-ke Somnini, qinisa isithembiso owasenza ngencekwakho kanye nendlwayo isiphelani; wenze njengombana wathembisa.

²⁴ Ibizo lakho lizakunzinza belibe likhulu isiphelani bese abantu bathi, ‘USomnini uMninimandlawoke, obizwa bona unguZimu ka-Israyeli, mbala nguye uZimu ka-Israyeli!’ Nendlu yencekwakho uDavida izakujama inzinze phambi kwakho.

²⁵ Wena Zimami, wembulile encekwinakho bonyana uzayakhela indlu. Ngalokho incekwakho ifunyene isibindi sokuthandaza phambi kwakho.

²⁶ Iye, wena Somnini unguZimu! Incekwakho uyithembise intwehle le.

²⁷ Njengombana kube kuhle ukubusisa indlu yencekwakho, akube njalo phambi kwakho isiphelani. Lokha wena Somnini nawuyibusisako, izakubusiseka nini nanini.”