1 IINKRONIKE 16 - IsiNdebele 2012 Translation

Umfaji wesivumelwano ubekwa ngetendeni

¹ Bathatha umfaji kaZimu bawungenisa ngetendeni uDavida agade alihlomele wona. Banikela ngemihlabelo yokutjhiswa neyetjhebiswano phambi kwakaZimu.

² Kuthe lokha uDavida nakaqeda ukunikela ngemihlabelo yokutjhiswa neyetjhebiswano, wabusisa abantu ebizweni lakaSomnini.

³ Wanikela omunye nomunye umuntu wembaji nowengubo kwa-Israyeli isikwa esindulungu, amakwapa wesundu nawediribe.

⁴ Wakhetha amanye amaLevi bona alotjhe phambi komfaji wakaSomnini, abonge, akhalele abe adumise uSomnini uZimu wakwa-Israyeli.

⁵ U-Asafa gade ayihloko, alandelwe nguZakariya. UJehiyeli, uTjhemiramothi, uJerhiyeli, uMatitiya, u-Eliyabu, uBhenaya, u-Obede-Edomu noJehiyeli bekufuze badlale imihlobohlobo yamaharibha. U-Asafa gade kufuze azwakalise iiwahlo;

⁶ uBhenaya noJarhaziyeli abaphristi bebafuze bavuthele njalonjalo iimporompita phambi komfaji wesivumelwano sakaZimu.

Irhubo lokudumisa uSomnini

⁷ Bekumhlokho lokha uDavida nanikela kokuthoma u-Asafa nesiqhema sakhe irhubo lokudumisa uSomnini elithi:

⁸ Dumisani uSomnini, nibize ibizo lakhe; nazise izenzo zakhe phakathi kwezizwe.

⁹ Mvumeleni ingoma, nimdlalele; babazani zoke izenzo zakhe ezikarisako.

¹⁰ Zikhakhaziseni ebizweni lakhe elicwengileko; yenzani iinhliziyo zabafuna uSomnini zithokoze.

¹¹ Funani uSomnini namandlakhe; nifunisise ubuso bakhe njalonjalo.

¹² Khumbulani iimangaliso azenzileko, imikarisomraro neemiso azikhulumileko

¹³ nina nzukulwana zaka-Israyeli inceku kaSomnini, nina madodana kaJakopo okhethiweko wakhe.

¹⁴ USomnini unguZimethu; iimiso zakhe zembethe iphasi loke.

¹⁵ USomnini ukhumbula isivumelwano sakhe isiphelani, nelizwi ayala ngalo iinzukulwana eziziinkulungwana:

¹⁶ isivumelwano asenza no-Abrahamu, nesifungo asenza no-Isaka.

¹⁷ Wasiqinisa kuJakopo saba mthetho, ku-Israyeli saba sivumelwano isiphelani.

¹⁸ Wathi: “Jakopo ngizakunikela iKanana ibe sisabelo selifa lakho.”

¹⁹ Lokha basesembalwa ngesibalo, iye, baseselidlanzana begodu baziinkhonzi kilo

²⁰ bazulazula izizwe ngezizwe, bandinda nemibuso ngokuhlukahlukana.

²¹ USomnini akhange avumele noyedwa bona abagandelele; nangebanga labo wakhalima amakhosi,

²² wathi: “Ningathinti abazesiweko bami, ningahlunguphazi abaphorofidi bami.”

²³ Khalelani ingoma kuSomnini nina phasi loke, memezelani isindiswakhe imihla ngemihla.

²⁴ Zwakalisani iphazimulwakhe ezizweni, iimangaliso zakhe phakathi kwabantu boke;

²⁵ ngombana mkhulu uSomnini, mbala ufanele ukudunyiswa, wesatjwa ngaphezu kwabo boke abozinyana.

²⁶ Iye, boke abozinyana bezizwe babosingazimu, kodwana uSomnini yena wenza amazulu.

²⁷ Iphazimulo nobukhosi kuphambi kwakhe, amandla netokozo kusesigodlweni sakhe.

²⁸ Nina zizwe, hloniphani uSomnini, nivume iphazimulo namandlakhe;

²⁹ ninikele ibizo lakhe ihlonipho emfaneleko. Lethani umnikelo bese niza phambi kwakhe; khothamelani uSomnini nembethe izambatho ezihloniphekileko;

³⁰ thuthumelani phambi kwakhe nina zizwe zoke zephasi. Iye, iphasi linzinzile, angekhe lasikinywa,

³¹ nje-ke amazulu akathokoze, iphasi lihlokome; izizwe azitjelwe kuthiwe: “USomnini uyabusa!”

³² Ilwandle alibhodle nakho koke okungendenalo; ummango awujekezele nakho koke okukiwo.

³³ Nje-ke imithi yehlathi izakukhalela phambi kwakaSomnini, ngombana uyeza bona abuyisele koke esigeni.

³⁴ Dumisani uSomnini ngombana ulungile; iye, ithando lakhe ngelanini nanini.

³⁵ Yeke thandazani nithi: “Sisindisa Zimu wesindiswethu! Senyule hlangana nezizwe bonyana sidumise ibizo lakho elicwengileko, sibabaze iphazimulwakho.

³⁶ USomnini uZimu wakwa-Israyeli akaphakanyiswe bekube nini nanini.” Boke abantu bathi: “Amen! USomnini akadunyiswe!”

Ukubulungeka komsebenzi wethaberinakeli

³⁷ UDavida watjhiya u-Asafa nabafowabo phambi komfaji wesivumelwano sakaSomnini bonyana balotjhe uZimu lapho isiphelani. Bekufuze balotjhe ngokweendingo zemihla ngemihla.

³⁸ Watjhiya no-Obede-Edomu anabafowabo abamatjhumi asithandathu nabunane. U-Obede-Edomu umsa kaJedutuni noRhosa bekubalindi.

³⁹ UDavida watjhiya uTsadokhi umphristi nabanye abaphristi abakanye naye phambi kwethaberinakeli lakaSomnini elisendundumeni eGibiyoni,

⁴⁰ kobana banikele imihlabelo yokutjhiswa kuSomnini phezu kwe-aldari njalo ekuseni nantambama mlibe. Bekufuze kwenziwe koke okutlolwe emthethweni kaSomnini ayala ngawo u-Israyeli.

⁴¹ Abanye abagade banabo bekunguHemani noJedutuni nenengi labagade bakhethwe ngokomthetho bonyana babe ngabazokudumisa uSomnini bathi: “Iye, ithando lakhe lijame isiphelani.”

⁴² UHemani noJedutuni gade baneemporompita neewahlo kanye nemihlobohlobo yeenliliswa ebegade babhinela ngazo uZimu. Amadodana kaJedutuni gade abalindisango lethaberinakeli.

⁴³ Yeke boke abantu baphadlhalala kwaba ngiloyo naloyo waya kwakhe, uDavida naye wabuyela kwakhe bonyana abusise indlwakhe.