1 IINKRONIKE 15 - IsiNdebele 2012 Translation

Umfaji wesivumelwano ulethwa eJerusalema

¹ UDavida wazakhela izindlu eMzini kaDavida, walungisa nendawo yomfaji kaZimu bewawuhlomela netende.

² Nje-ke wathi: “Akakho namunye ongathwala umfaji kaZimu ngaphandle kwamaLevi ngombana uSomnini wakhetha wona bonyana athwale umfaji kaZimu nokobana alotjhe phambi kwakhe isiphelani.”

³ UDavida wahlanganisa woke ama-Israyeli eJerusalema ngombana bekafuna ukuletha umfaji kaZimu eJerusalema lapha gade asele awulungisele khona.

⁴ Wabiza iinzukulwana zaka-Aroni namaLevi bona zihlangane ndawonye:

⁵ emndenini kaKhehathi bekunamadoda alikhulu namatjhumi amabili arholwa ngu-Uriyeli;

⁶ emndenini kaMerari bekunamadoda amakhulu amabili namatjhumi amabili arholwa ngu-Asaya;

⁷ emndenini kaGeritjhomu bekunamadoda alikhulu namatjhumi amathathu arholwa nguJuweli;

⁸ emndenini ka-Elitsafani bekunamadoda amakhulu amabili arholwa nguTjhemaya;

⁹ emndenini kaRhebroni bekunamadoda amatjhumi abunane arholwa ngu-Eliyeli;

¹⁰ emndenini ka-Uziyeli bekunamadoda alikhulu netjhumi nambili arholwa ngu-Aminadaba.

¹¹ Nje-ke uDavida wabiza uTsadokhi no-Abiyatari abaphristi, kanye no-Uriyeli, u-Asaya, uJuweli, uTjhemaya, u-Eliyeli no-Aminadaba amaLevi,

¹² wathi kibo: “Ngini iinhloko zemindeni yamaLevi. Nje-ke nina nabafowenu amaLevi, zihlambululeni bonyana nilethe umfaji kaSomnini uZimu wakwa-Israyeli lapha ngiwulungiselele khona.

¹³ Ngombana akhange niwuthwale bona niwulethe kwekuthomeni, yeke uSomnini uZimethu usibhokele ngobukhali. Iye, akhange sibuze kuye bona singenza njani njengombana kujanyisiwe.”

¹⁴ Nje-ke abaphristi namaLevi bazihlambulula ukuze bakhuphule umfaji kaSomnini uZimu wakwa-Israyeli.

¹⁵ AmaLevi athwala umfaji kaZimu ngeengodo emahlombawo, kwaba njengombana uMosi awayalile ngokuya ngelizwi lakaSomnini.

¹⁶ Godu uDavida watjela iinhloko zamaLevi bona zikhethe abafowazo ababavumi bonyana bakhalele iingoma zethabo, babethe neenliliswa okumihlobohlobo yamaharibha neewahlo.

^17-21 Nje-ke amaLevi akhetha uHemani umsa kaJuweli, u-Asafa umsa kaBherekiya no-Etani umsa kaKhutjhaya. U-Asafa gade angewomndeni kaHemani. U-Etani umfowabo gade angewomndeni kaMerari. Abavumi abathathwaba gade bafanele balilise iiwahlo zekoporo. Isiqhema sesibili naso esimndeni gade kunguZakariya umsa kaJaziyeli, uTjhemiramothi, uJerhiyeli, u-Uni, u-Eliyabu, uBhenaya, uMaseya, uMatitiya, u-Elifelehu, uMikhiniya, u-Obede-Edomu noJehiyeli, abalindi. Esiqhemenesi, uZakariya, uTjhemiramothi, uJerhiyeli, u-Uni, u-Eliyabu, uMaseya noBhenaya gade bafanele balilise amaharibha ngesinara esiphezulu. UMatitiya, u-Elifelehu, uMikhineya, u-Obede-Edomu, uJehiyeli kanye no-Azaziya bekufuze basize ukudlala iharibha elinye elineenara ezibunane.

²² UKenaniya ongomunye wabarholi bamaLevi gade amyeleli oqalene nokuthuthwa komfaji. Wanikelwa umsebenzi lo ngombana gade anelemuko lawo.

²³ UBherekiya no-Elkhana gade babalindi bomfaji.

²⁴ Abaphristi uTjhebaniya, uJotjhafathi, uNetaneli, u-Amasayi, uZakariya, uBhenaya no-Eliyezeri gade kufuze bavuthele iimporompita phambi komfaji kaZimu. U-Obede-Edomu noJerhiya nabo gade kufuze babe balindi bomfaji.

²⁵ Yeke uDavida nabaphathi bakwa-Israyeli kanye neenduna zekulungwana, bakhamba bayokunyusa umfaji wesivumelwano sakaSomnini endlini ka-Obede-Edomu ngegido elikhulu.

²⁶ UZimu wasiza amaLevi kikho koke. AmaLevi agade athutha umfaji wesivumelwano sakaSomnini, enza umhlabelo weenkunzi ezilikhomba namaqama angako.

²⁷ UDavida gade ambethe iphuraphura yelineni njengawo woke amaLevi athwala umfaji, nanjengabavumi noKenaniya ogade amyeleli wabavumi abathutha umfaji. Godu uDavida gade aleke ngenaka lobuphristi.

²⁸ Nje-ke woke u-Israyeli waletha umfaji wesivumelwano sakaSomnini ngomkhulungwana wehlokomo, ngomdumo wepalapala neporompita, isiwahlo nangeenliliswa zemihlobohlobo yamaharibha.

²⁹ Kwathi lokha umfaji wesivumelwano sakaSomnini nawusangena eMzini kaDavida, uMikali indodakazi kaSawula wahlola ngefesidere. Uthe nakabona ikosi uDavida igida ithamba, wayinyaza.