1 IINKRONIKE 14 - IsiNdebele 2012 Translation

Isigodlo nabantwana bakaDavida

¹ URhiramu ikosi yeTirosi wathumela iinthunywa kuDavida kanye neengodo zomsedari, abacozi belitje nababazi beengodo bona bakhele uDavida isigodlo.

² UDavida walemuka bona uSomnini uZimu umjamise bona abe yikosi kwa-Israyeli nokobana uphakamise umbuswakhe ngebanga labantu bakaSomnini, u-Israyeli.

³ EJerusalema uDavida wathatha abanye abafazi bambelethela amadodana nabentazana abanye.

⁴ Naka amabizo wabantwana abelethelwa bona eJerusalema: NguTjhamuwa, uTjhobabi, uNathani, uSolomoni,

⁵ uJibirhari, u-Elitjhuwa, u-Elifelethi,

⁶ uNoga, uNefegi, uJafiya,

⁷ u-Elitjhama, uBheliyada no-Elifelethi.

UDavida uhlula amaFilista

⁸ Kuthe lokha amaFilista nakezwa bona uDavida uzeswe waba yikosi yama-Israyeli woke, aphuma ngendlwana bona ayomzuma. Lokha uDavida nakezwa ngalokho, waphuma bona awahlangabeze.

⁹ Kwathi amaFilista sele afikile bona amlalele emrhobeni wamaRafa,

¹⁰ uDavida wabuza kuZimu wathi: “Ngingawasahlela amaFilista la na? USomnini uzowanikela esandleni sami na?” USomnini wamphendula wathi: “Iye, yewukhambe ngizowanikela esandleni sakho.”

¹¹ Nje-ke uDavida neviyo lakhe bakhuphukela eBhali-Peratsimu, wafese wawahlula lapho. Wabe wathi: “Ngesandla sami uSomnini urhurhule izitha zami njengamanzi agobhoza arhurhule koke.” Ngebangelo, indawo leyo yabizwa bona yiBhali-Peratsimu.

¹² AmaFilista abaleka atjhiya abosingazimu bawo lapho; uDavida wayala bona babatjhise ngomlilo.

¹³ AmaFilista abuya godu alalela uDavida emrhobeni.

¹⁴ UDavida wabuza kuZimu godu, uZimu wamphendula wathi: “Ungakhuphuki unqophe kiwo, kodwana yewuwazombe ngemuva bese uwasahlela ngaphambi kwemithi yebhalisamu.

¹⁵ Masinyana-nje nawizwa itjhada lamagadango ngaphezu kwemithi yebhalisamu, nje-ke phuma usahlele ngombana uZimu uzabe akhamba phambi kwakho bona amadlhe ibutho lamaFilista.”

¹⁶ UDavida wenza njengombana uZimu amyalile, barhayila amaFilista yoke indlela ukusukela eGibiyoni bekwaba seGezeri.

¹⁷ Lanaba njalo-ke idumo lakaDavida enarheni yoke, noSomnini wenza bonyana izizwe zoke zimesabe.