1 IINKRONIKE 13 - IsiNdebele 2012 Translation

UDavida ubandameza umfaji wesivumelwano eJerusalema

¹ UDavida wakhulumisana neenduna zakhe zeenkulungwana nezamakhulu, nazo zoke iinhloko.

² Kiyo yoke ihlangano yeenhloko zakwa-Israyeli wathi: “Nakube kuhle kini nebusweni bakaSomnini uZimethu, asiphadlhalaleni sifikise ilizwi kilo loke inengi labafowethu abasemikhawulweni yoke yakwa-Israyeli, nebaphristini nakumaLevi asemizini abelwe yona bona beze bazozihlanganisa nathi.

³ Asihlanganeni ukuze sibuyisele umfaji kaZimu ngakithi ngombana emihleni kaSawula akhange siwukhathalele.”

⁴ Ihlangano yavumelana yoke nesiphakamisweso ngombana abantu boke basibona silungile.

⁵ Ngalokho uDavida wahlanganisa woke u-Israyeli ukusukela ephakgheni lomlambo weGibhide ngesewula ukuya eLebo-Rhamathi ngetlhagwini bona kususwe umfaji kaZimu eKhiriyathi-Jeyarimu.

⁶ UDavida nabantu boke bakwa-Israyeli baya eBhala okuyiKhiriyathi-Jeyarimu yakwaJuda bona bakhuphule lapho umfaji kaZimu onguSomnini ohlala phezu kwamakerubhi; umfaji ogade umanyaniswa nebizo lakhe.

⁷ Bathwala umfaji kaZimu bawususa endlini ka-Abinadaba ngekoloyana etja. U-Uza no-Arhiyo bekubatjhayeli bekoloyana leyo.

⁸ UDavida nawo woke ama-Israyeli gade bagidinga ngamandlabo woke phambi kwakaSomnini. Bebavuma lokha nabancinza imihlobohlobo yamaharibha, bebabetha abosotjherere neewahlo begodu balilisa neemporompita.

⁹ Nabafika eselelweni seKidoni, u-Uza welula isandla bona abambe umfaji ngombana ikoloyana yakhahlumezeka lokha iinkomo nazifika edwalenapho.

¹⁰ Ubukhali bakaSomnini uZimu bavuthela u-Uza, wamradlha phasi ngombana gade athinte umfaji. Wafela khonapho phambi kwakaZimu.

¹¹ UDavida wakhathazeka ngombana uSomnini uphahlaze u-Uza. Yeke wathiya indawo leyo bona yiPeretsi-Uza. Ibizwelo lisajamile nanamhlanjesi.

¹² Mhlokho uDavida wesaba uZimu bewadlumbana wathi: “Alo, ngingawuletha njani umfaji kaZimu kwamapha?”

¹³ Akhange asathatha umfaji bona uye kwakhe, eMzini kaDavida. Kunalokho wawuphambukisela endlini ka-Obede-Edomu umGathi.

¹⁴ Umfaji kaZimu wahlala khonapho nomndeni ka-Obede-Edomu iinyanga ezintathu. Nje-ke uSomnini uZimu wabusisa umndenakhe nakho koke anakho.