1 IINKRONIKE 12 - IsiNdebele 2012 Translation

Abasekeli bakaDavida

¹ Lawa-ke madoda eza kuDavida eTsikhilagi lokha nasazithukusileko ngenca kaSawula umsa kaKhitjhi. Wona bekaphakathi kweengorho ezazibasizi bakhe epini.

² KebakwaBhenjamini emndenini kaSawula kweza amadoda abosomisubela akwaziko ukudumuza ngomsebe begodu nakghona ukujikijela ngesarwayi ngazo zombili.

³ Iinduna zabo bekungu-Arhiyezeri noJowatjhi okumadodana kaTjhema umGibeya. Abanye abeza kuDavida bekunguJezuweli noPelethi amadodana ka-Azimavethi, uBheraka, uJehu umAnatothi,

⁴ uYitjhimaya umGibiyoni, ayingorho phakathi kwamatjhumi amathathu, godu amrholi wabamatjhumi amathathu. Abanye bekunguJoromiya, uJarhaziyeli, uJorhanana, uJozabadi umGedera,

⁵ u-Eluzayi, uJerimothi, uBhehaliya, uTjhemariya noTjhefathiya umRharufi,

⁶ u-Elikhana, uYitjhiya, u-Azareli, uJowezeri, uYatjhobiyamu umKhorarhi,

⁷ uJuweli noZebadiya amadodana kaJerorhamu weGedori.

⁸ Abanye bamaGadi batlherela kuDavida ebuphephelweni bakhe erhalawumbeni. Gade kuziingorho, ezinelemuko lepi begodu zihlome ngeenhlangu nemikhonto. Bezisabeka njengamabhubezi, zeqa njengamaqina eentabeni.

⁹ U-Ezeri gade ayihloko, u-Obadiya kungowesibili ngokwesikhundla, wesithathu kungu-Eliyabu,

¹⁰ uMitjhimana kungowesine, wesihlanu kunguJoromiya,

¹¹ u-Atayi kungowesithandathu, wekhomba kungu-Eliyeli,

¹² uJorhanani kungowobunane, wethoba kungu-Elizabhadi,

¹³ uJoromiya kungowetjhumi, kuthi uMakibhanayi abe ngowetjhumi nanye.

¹⁴ AmaGadi la bekuziinduna zepi: iinduna zekhulu neenduna zekulungwana.

¹⁵ Kwaba ngiwo ayama iJordani ngenyanga yokuthoma mhlana igcwele ithwele iingodo. Abalekisa boke abantu abagade bahlala ngemrhobeni, abatjhingisa ngepumalanga nangetjingalanga yomlambo.

¹⁶ BakwaBhenjamini abathileko namanye amadoda wakwaJuda beza kuDavida ebuphephelweni bakhe.

¹⁷ UDavida waphuma wayobahlangabeza wafese wathi kibo: “Nakube nize kimi ngokuthula bona nizongisiza, khona sizakuba yirhara nomncamo. Kodwana nakube nize bona ningiyengele esitheni sami ukube izandla zami azinamlandu, sengasuthi uZimu wabobaba angakubona lokho anigwebe.”

¹⁸ Nje-ke, kwehlela uMoya phezu kwaka-Amasayi induna yamatjhumi amathathu, wathi: “Davida, singabakho! Msa kaJese sinawe! Nako umnono, umnono phezu kwakho! Umnono phezu kwabasizi bakho! Iye, uZimakho akusize!” Yeke uDavida wabamukela wabenza abarholi beviyo lakhe lokusahlela.

¹⁹ Amanye amadoda wakwaManase atlherela kuDavida lokha nakakhamba namaFilista bona alwe noSawula. (Eqinisweni uDavida nabantu bakhe akhange awasize amaFilista ngombana kwathi ngemva kokobana ababusi beemfunda zamaFilista sebakhulumisene bambuyisela emuva. Badlumbana bathi: “Phela nange umrhali lo angatlherela ekosinakhe uSawula, soke sifile.”)

²⁰ Naka amadoda wakwaManase atlherela kuDavida lokha nakaya eTsikhilagi: ngu-Adinarha, uJozabadi, uJediyeli, uMikayeli, uJozabadi, u-Elihu noTsiletayi ebegade kuziinduna zekulungwana zakwaManase.

²¹ Ngibo abasiza uDavida ukusahlela isiqhema semigulukudu ngombana gade baziingorho boke begodu baziinduna zebutho.

²² Imihla ngemihla amadoda eza bonyana asize uDavida, bekwafika lapha sele kunebutho elikhulu, iye ibuthokazi elingangobaba.

²³ Naka amanani wamadoda eza ahlomile kuDavida eRhebroni bona azokuphendulela umbuso kaSawula kuye njengombana uSomnini atjhwile:

²⁴ KebakwaJuda abagade bahlomele ipi ngesihlangu nomkhonto, bebaziinkulungwana ezisithandathu namakhulu abunane;

²⁵ kebakwaSimiyoni ekuziingorho zepi bebaziinkulungwana ezilikhomba nekhulu;

²⁶ kebakwaLevi kuziinkulungwana ezine namakhulu asithandathu;

²⁷ sekufakwe noJehoyada omrholi womndeni wakwa-Aroni anamadoda aziinkulungwana ezintathu namakhulu alikhomba

²⁸ noTsadokhi isokana lengorho anabarholi abamatjhumi amabili nambili bomndenekhabo;

²⁹ kebakwaBhenjamini emndenini kaSawula bebaziinkulungwana ezintathu (bekube sikhatheso inengi labakwaBhenjamini lathembeka endlini kaSawula);

³⁰ kebakwa-Efrayimu ekuziingorho ezidumileko emindenini yekhabo, bebaziinkulungwana ezimatjhumi amabili namakhulu abunane;

³¹ kebakwaManase, okutjho isiquntu sabo, bebaziinkulungwana ezilitjhumi nabunane; bathunywe ngokomthetho bonyana bazokubeka uDavida abe yikosi;

³² kebakwa-Isakari, bebaziinduna ezimakhulu amabili zineenhlobo ezingaphasi kwazo; iindunezi bezinelemuko leenkhathi zokwenza izinto;

³³ kebakwaZebuloni, ebebalungele ukuya epini, bebahlome ngemihlobohlobo yeenhlabano, babilelwa ziingazi begodu banehloso yinye yokusiza uDavida; bona gade kumadoda aziinkulungwana ezimatjhumi amahlanu;

³⁴ kebakwaNafitali gade kuziinduna eziyikulungwana, zinamadoda aziinkulungwana ezimatjhumi amathathu nalikhomba ahlome ngeenhlangu nemikhonto;

³⁵ kebakwaDani ebebalungele ukuya epini bebaziinkulungwana ezimatjhumi amabili nabunane namakhulu asithandathu;

³⁶ kebakwa-Atjheri ebebalungele ukuya epini, bebaziinkulungwana ezimatjhumi amane;

³⁷ kebakwaRubeni, bakwaGadi nesiquntu sabakwaManase ukusuka ngepumalanga yeJordani bekumadoda aziinkulungwana ezilikhulu namatjhumi amabili, ahlome ngemihlobohlobo yeenhlabano.

³⁸ Woke lawo gade kumadoda wepi, alungele ukulwa; eza eRhebroni azinikele ngeenhliziyo kobana azokubeka uDavida abe yikosi ngaphezu kwaka-Israyeli woke. Nenengi loke lakwa-Israyeli belinehliziyo yinye yokubeka uDavida bona abe yikosi.

³⁹ Amadoda lawo ahlala eRhebroni amalanga amathathu aditjhe noDavida, asidla begodu asela ngombana abafowabo bakwaJuda bebabenzele imiphako.

⁴⁰ Ngitjho nabafowabo ababuya kude njengakwa-Isakari, kwaZebuloni nakwaNafitali beza baletha ukudla ngabodumbana, ngamakamela, ngemimeyila nangeenkabi. Bekunikelwe ngokwaneleko iflowuru, amakwapa wamakhiwani, amakhekhe wamakwapa wediribe, iwayini, amafutha we-oliva, iinkomo nezimvu ngombana gade kunokuthokoza kwa-Israyeli.