1 IINKRONIKE 11 - IsiNdebele 2012 Translation

UDavida uzeswa bona abe yikosi kwa-Israyeli

¹ Woke ama-Israyeli eza kuDavida eRhebroni afese athi kuye: “Siziingazi zakho.

² Eenkhathini ezidlulileko, uSawula asese yikosi, nguwe ogade udosa u-Israyeli ukuya epini. USomnini uZimakho wathi kuwe, ‘Nguwe ozakwelusa abantu bami u-Israyeli begodu nguwe ozakubusa abantu bami u-Israyeli.’ ”

³ Ngaleyondlela boke abaphathi bakwa-Israyeli beza ekosini uDavida eRhebroni. UDavida wenza isivumelwano nabo eRhebroni phambi kwakaSomnini; base bayamzesa-ke waba yikosi phezu kwaka-Israyeli njengombana uSomnini bekathembisa ngaphambilini ngoSamyela.

UDavida uthumba iJerusalema

⁴ UDavida nama-Israyeli woke barhwantela eJerusalema okuyiJebusi. AmaJebusi okubahlali bendawo leyo ngendabuko gade asese lapho.

⁵ Izakhamuzi zeJebusezo zathi kuDavida: “Awuzukungena la!” Khonapho, uDavida wathumba ubuphephelo beZiyoni, okwathi ngemva kwesikhathi baba muMuzi kaDavida.

⁶ UDavida gade athe: “Nanyana ngubani ozakusahlela amaJebusi qangi uzakuba yinduna ekulu yepi.” UJowabi umsa kaTseruya wenyuka qangi, yeke waba yinduna.

⁷ UDavida wangena wahlala ebuphephelweni, kungalokho babizwa bona muMuzi kaDavida.

⁸ Wakha izindlu kiyo yoke indawo ukusukela endundumeni ezombeleze ubuphephelo. Kanti-ke uJowabi yena, wavuselela idorobho elidala.

⁹ UDavida wadlondlobala ngombana uSomnini uMninimandlawoke gade anaye.

Iingorho zakaDavida

¹⁰ Lezi bekuziingorho ezibomaqhuzu zakaDavida ezahlala zithembekile embuswenakhe. Ngizo kanye no-Israyeli woke ezamenza bona abe yikosi njengombana uSomnini uZimu athembisa u-Israyeli.

¹¹ Nanti irhelo leengorho zakaDavida: UYatjhobiyamu umsa kaRhakimoni gade amrholi wesiqhema sabathathu esaziwako. Yena-ke wabulala amadoda amakhulu amathathu epini yinye ngomkhontwakhe.

¹² Hlanu kwakhe bekungu-Eliyazari umsa kaDodo umArhorhi ogade angomunye wesiqhema sabathathu.

¹³ Yena gade anoDavida ePasi-Damimi lokha amaFilista ahlangene lapho ngepi. Kuyindawo lapha bekunesimu egcwele ibhali. Amabutho wama-Israyeli athi lokha nabalekela amaFilista,

¹⁴ u-Eliyazari wajama phakathi kwesimu wayivikela. Wamadlha amaFilista phasi ngapha nangapha. USomnini wakwehlisa njalo-ke ukuhlula okukhulu.

¹⁵ Ngelinye ilanga kwaphuma iingorho ezintathu kezimatjhumi amathathu, zehlela kuDavida edwaleni eliserholweni le-Adulamu, khonapho ipi yamaFilista yayihlome emrhobeni wamaRafa.

¹⁶ UDavida gade angerholweni ngesikhatheso, umkhambathi wamaFilista useBhethe-Lehema.

¹⁷ Nje-ke uDavida womela amanzi bewathi: “Uthi ngomile na, inga kungaba nomuntu ongayongikhelela amanzi wokusela emthonjeni ohlanu kwesango leBhethe-Lehema!”

¹⁸ Yeke iingorho ezintathwezo zaratha hlangana kwamaFilista, zafese zakha amanzi emthonjeni ohlanu kwesango leBhethe-Lehema, zawaletha kuDavida. Kodwana uDavida wala ukuwasela, esikhundleni salokho wawathulula phambi kwakaSomnini,

¹⁹ wathi: “Somnini, angeze bengithome! Kuzakuba ngathi ngisela iingazi zabantu abadele ukuphila kwabo. Iye, babeke ubuphilo babo engozini ngokungilethela wona.” Yeke uDavida akhange awasele. Zazinjalo-ke iindaba zeengorho ezintathwezi.

²⁰ U-Abitjhayi umnakwabo kaJowabi bekayikulu yesiqhema samatjhumi amathathu. Wabulala abantu abamakhulu amathathu ngomkhontwakhe. Ngalokho waduma njengeengorho ezintathu ezakhelela uDavida amanzi.

²¹ Waduma khulu bewadlula iingorho ezimatjhumi amathathu. Waba yindunazo, kodwana idumo lakhe akhange lidlule lezintathu.

²² UBhenaya weKhabitsiyeli umsa kaJehoyada, isihlabani sengorho, gade adume ngezinto ezinengi. Yena wamadlha amadoda amabili okuthiwa “mabhubezi wakwaMowabi.” Nguye godu owangena ngemgodini wabulala ibhubezi mhlana kukhithika igabhogo.

²³ Godu wamadlha itsitsirimba yomGibhide, ipesewula yendoda ephakeme ngamamitha amabili nesiquntu. UmGibhide gade anomkhonto owawufana nompherho womaluki esandleni sakhe, kodwana uBhenaya wamdumela kunjalo ngentonga. Wahluthula umkhonto esandleni somGibhide wambulala ngawo.

²⁴ Zazinjalo-ke iindaba zakaBhenaya umsa kaJehoyada; naye waduma njengeengorho ezintathu.

²⁵ Wahlonitjhwa khulu phakathi kwabamatjhumi amathathu, kodwana akhange abalwe kilabo abathathu. UDavida wambeka bonyana alawule amancusakhe.

²⁶ Ezinye zeengorho bekungu-Asayeli umnakwabo kaJowabi, u-Elirhanana umsa kaDodo weBhethe-Lehema,

²⁷ uTjhamothi umHarori, uRheletsi umPeloni,

²⁸ u-Ira umsa ka-Ikhetjhi weTekhowa, u-Abiyezeri we-Anatothi,

²⁹ uSibekayi umRhutjhathi, u-Ilayi umArhorhi,

³⁰ uMaherayi umNethofathi, uRheledi umsa kaBhana umNethofathi,

³¹ u-Itayi umsa kaRibayi weGibeya kwaBhenjamini, uBhenaya umPiratoni,

³² uRhurayi wemilanjaneni yeGatjhi, u-Abiyeli umAribhathi,

³³ u-Azimavethi umBharharumu, u-Eliyarhiba umTjhaliboni,

³⁴ uHatjhemu umGizoni, uJonathani umsa kaTjhage umHarari,

³⁵ u-Arhiyamu umsa kaSakari umHarari, u-Elifali umsa ka-Uri,

³⁶ uRheferi umMekera, u-Arhija umPeloni,

³⁷ uRhetsiro umKarameli, uNarayi umsa ka-Ezibhayi,

³⁸ uJuweli umnakwabo kaNathani, uMibirhari umsa kaHagiri,

³⁹ uTselekhi umAmoni, uNarharayi umBerothi usonkhande kaJowabi umsa kaTseruya,

⁴⁰ u-Ira umJitri, uGarebi umJitri,

⁴¹ u-Uriya umHethi, uZabadi umsa ka-Arhilayi,

⁴² u-Adina umsa kaTjhiza ogade ayihloko yakwaRubeni oweza namadoda amatjhumi amathathu,

⁴³ uRhanani umsa kaMaka, uJotjhafathi umMitini,

⁴⁴ u-Uziya umAtjhitera, uTjhama noJehiyeli amadodana kaRhothamu umAroweri,

⁴⁵ uJediyeli umsa kaTjhimri, nomnakwabo uJorha umTitsi,

⁴⁶ u-Eliyeli umMarhavi, uJeribhayi noJotjhaviya amadodana ka-Elinamu, uJitima umMowabi,

⁴⁷ u-Eliyeli, u-Obede noJasiyeli umTsoba.