1 AMAKHOSI 9 - IsiNdebele 2012 Translation

UZimu uziveza kuSolomoni kwesibili

¹ Kwathi bona uSolomoni aqede ukwakha ithempeli lakaSomnini kanye nesigodlo, bewenza koke agade ahlose ukukwenza,

² uSomnini waziveza kuye kwesibili njengombana aziveza kuye eGibiyoni.

³ USomnini wathi kuye: “Ngiwuzwile umthandazo nokurabhela kwakho okwenze phambi kwami; ngilicwengisile ithempeli olakhilekweli ngokubeka ibizo lami lapho isiphelani. Ihliziywami namehlwami kuzakuhlala kulapho.

⁴ “Wena-ke nawukhamba phambi kwami ngehliziyo epheleleko nangokuhlonipheka njengombana uyihlo uDavida enza bese wenza koke engikuyala ngakho bewulonde imithetho neemiso zami,

⁵ ngizakunzinzisa isihlalo sakho sobukhosi phezu kwaka-Israyeli njengombana ngathembisa uyihlo uDavida lokha nangithi, ‘Angeze wabhalelwa kukuba nendoda engahlala esihlalweni sobukhosi bakwa-Israyeli.’

⁶ “Kodwana nange wena namkha amadodanakho ningihlanukela bese aniphethi imiyalo nemithetho engininikele yona, nigijime niyokulotjha abosingazimu benibakhothamele,

⁷ ngizokususa u-Israyeli enarheni engimnikele yona bengifulathele nethempeli engilicwengisele ibizo lami. U-Israyeli uzakuba sisaga nesiphoqo hlangana nabo boke abantu.

⁸ Ithempeleli lizakuba liqubi leququ. Woke umuntu odlula ngendlela uzalikhuza ababaze athi, ‘Alo, kubayini uSomnini enze into enje enarhenapha nethempelinapha?’

⁹ Abantu bazakuphendula bathi, ‘Awa musi, angithi bahlanuke uSomnini uZimabo owakhupha aboyise eGibhide, badlhemadlhema ngemva kwabosingazimu, babakhothamela bebabalotjha. Ngikho uSomnini abehlisele ihlekelele engaka nje.’ ”

Imisebenzi eminye yakaSolomoni

^10-11 USolomoni kwamthatha iminyaka ematjhumi amabili ukwakha imakhiwo emibili, okulithempeli lakaSomnini nesigodlo sakhe. Ngesikhatheso uRhiramu ikosi yeTirosi wahlinzeka uSolomoni ngazo zoke iingodo zomsedari nezomsayipurusi nangegolide ukuya ngendlela agade atlhoga ngakhona. Kwathi nakuqedwa ukwakhiwa, ikosi uSolomoni yathatha amatjhumi amabili wamadorobho aseGalile yawanikela uRhiramu ikosi yeTirosi.

¹² Kodwana kwathi lokha uRhiramu nasuka eTirosi athi uyokubona amadorobho awaphiwe nguSolomoni lawo, wafika wadana.

¹³ Wabuza wathi: “Anjani nje amadorojanyana ongiphe wona la, mntanthu?” Wawabiza bona yinarha yeKhabhulu, okulibizo elawanamathela bekwaba kunamhlanjesi.

¹⁴ URhiramu gade athumele igolide ebelingaba makhilogremu angaphezu kweenkulungwana ezine ekosini uSolomoni nakwakhiwako.

¹⁵ Naku umlando wokukatelela ngomsebenzi owahlonywa yikosi uSolomoni bona kwakhiwe ithempeli lakaSomnini, isigodlo sakhe, indunduma nomthangala ozombeleze iJerusalema, neRhatsori, iMegido kanye neGezeri:

¹⁶ UFaro ikosi yeGibhide gade asahlela bewathumba iGezeri. Wayithungelela ngomlilo. Wabulala abahlali bayo abamaKhanana wayinikela indodakazakhe, umfazi kaSolomoni, yaba sisipho sayo somtjhado.

¹⁷ Yeke uSolomoni wavuselela iGezeri. Godu wakha neBhethe-Rhoroni engenzasi,

¹⁸ iBhalathi neTadimori eserhalawumbeni enarhenakhe,

¹⁹ nawo woke amadorobhakhe agade abeka kiwo ipahla nemizi lapha bekuhlala khona iinkarana neenjomani. Wakha nanyana yini ayethanda ukuyakha eJerusalema, eLibhanoni nakiyo yoke inarha agade ayibusa.

^20-21 USolomoni wakatelela ngomsebenzi boke abantu egade basele kuma-Amori, amaHite, amaPherizi, amaRhivi namaJebusi. Abantwaba bekungasiwo ama-Israyeli, kodwana gade baziinzukulwana zabo ezasala eenarheni ezingazange zibhujiswe ma-Israyeli. Lokho kusese njalo nanamhlanjesi.

²² USolomoni azange akatelele namunye wama-Israyeli ngomsebenzi, kodwana gade awenze amabuthwakhe wepi, iinkhulu zakhe zombuso, iimphathiswa zakhe, abalawuli neenduna zeenkarana zakhe zepi nabakhweli bazo.

²³ Godu ama-Israyeli gade aziinkhulu eziphezulu ezaziqalene nomsebenzi kaSolomoni. Bekunamadoda amakhulu amahlanu namatjhumi amahlanu agade eluse abantu abenza umsebenzi.

²⁴ USolomoni wakha indunduma yeJerusalema ngemva kobana uNaFaro asukile eMzini kaDavida waya esigodlweni asakhelwe nguSolomoni.

²⁵ Wenza imihlabelo yokutjhiswa neyetjhebiswano kathathu ngomnyaka e-aldarini alakhele uSomnini. Godu watjhisa nepepho phambi kwakaSomnini. Ngaleyondlela waphelelisa ihloso yokwakhiwa kwethempeli.

²⁶ Ikosi uSolomoni yakha neenthayamanzi e-Etsiyoni-Gebere eseduze ne-Elathi eliseligwini lelwandle eliBomvu enarheni yakwa-Edomu.

²⁷ URhiramu wathumela iinsebenzi zakhe eenthayamanzini zakaSolomoni, kobana zisebenzisane neensebenzi zakaSolomoni. Gade kumadoda azizazi zelwandle.

²⁸ Zathayela e-Ofira zeza namakhilogremu wegolide angaphezu kweenkulungwana ezilitjhumi nane. Zafese zalethula ekosini uSolomoni.