1 AMAKHOSI 6 - IsiNdebele 2012 Translation

USolomoni wakha ithempeli eJerusalema

¹ Ngomnyaka wamakhulu amane namatjhumi abunane ngemva kokuphuma kwama-Israyeli eGibhide, emnyakeni wesine wokubusa kwakaSolomoni phezu kwaka-Israyeli, ngenyanga kaZifu, okuyinyanga yesibili, uSolomoni wathoma ukwakha ithempeli lakaSomnini.

² Ithempeli ikosi uSolomoni eyalakhela uSomnini lalimamitha amatjhumi amathathu ubude, amamitha alitjhumi ububanzi begodu namamitha alitjhumi nahlanu ukuphakama.

³ Isirhodlwana sobungeno esingaphambi kwesirhodlo esikhulu sethempeli gade silingana nethempeli ngobubanzi, simamitha alitjhumi. Isirhodlwaneso gade siphume ngamamitha amahlanu ngaphambi kwethepeli.

⁴ Wenza amafesidere anomluko ethempelini.

⁵ Ngaphandle emabodeni wethempeli wahlomelela amalawana. Wawakha magegana neboda lomakhiwo wethempeli okusirhodlo esikhulu nelawu elingaphakathi. Amalawana angaphandle lawo wawakha ngamaplanka.

⁶ Umgangadelo ophasi wamalawana angaphandle gade umamitha amabili nesiquntu ububanzi, kuthi ophakathi ube mamitha amathathu bese kuthi umgangadelo ongehla ube mamitha amathathu nesiquntu. Iboda langaphandle lethempeli gade linemiphetho emibili etjhiyanako magegana nalo ukuze kungalinyazwa iboda lethempeli.

⁷ Nakwakhiwa ithempeli bekusetjenziswa amatje abazelwe ekwarini kwaphela, kwakungazwakali nondo, tjhizela namkha sitlabagelo bani sesimbi nakwakhiwako.

⁸ Ubungeno bomgangadelo ophakathi bebungesewula yethempeli. Umuntu bekakghona ukungena ngeminyangwana ukusuka emgangadelweni ophakathi ukuya emgangadelweni wesithathu.

⁹ Kwathi lokha naqeda ukwakha amaboda wethempeli wenza isilinghi ngamabhaluga namaplanka womsedari.

¹⁰ Amalawana angaphandle awakha magegana nethempeli gade amamitha amabili nesiquntu ukuphakama emgangadelweni ngamunye. Gade ahlomelelwe ethempelini ngamabhaluga womsedari.

¹¹ Ilizwi lakaSomnini lafika kuSolomoni lathi:

¹² “Mayelana nethempeli olakhako leli, kuzakuthi nawulandela iimiso zami, wenze imiyalwami, ulonde imithethwami bewuyilalele, ngizalise iinthembiso engazenza kuDavida uyihlo ngawe:

¹³ Ngizakuhlala hlangana nama-Israyeli, ngingabasukeli abantu bami bakwa-Israyeli.”

¹⁴ Lokha uSolomoni naqeda ukwakha ithempeli

¹⁵ wanameka ilingaphakathi lamaboda wakhona ngamaplanka womsedari, wawavala ukusuka phasi emgangadelweni ukufika phezulu esilinghini. Wanameka umgangadelo wethempeli ngamaplanka womsayipurusi.

¹⁶ Waqunta amamitha alitjhumi ukusuka emsamo wethempeli ngamaplanka womsedari, wawajamisa kusukela phasi emgangadelweni ukuya esilinghini. Ngokwenza njalo gade alungiselela ukwakha ilawu elingaphakathi okutjho indawo ecwenge khulu.

¹⁷ Isirhodlo esikhulu, esingaphambi kwendawo ecwenge khulu besimamitha amatjhumi amabili ubude.

¹⁸ Amaplanka womsedari emabodeni angaphakathi kwethempeli gade abazwe aba mfanekiso weenkurwana namakhwa aqhakazileko. Woke amaboda ngaphakathi bekanamekwe ngomsedari, kungabonakali litje.

¹⁹ Ngaleyondlela walungisa indawo ecwenge khulu ngethempelini ukuze abeke umfaji wesivumelwano sakaSomnini lapho.

²⁰ Indawo ecwenge khulu le beyimamitha alitjhumi ubude, amamitha alitjhumi ububanzi namamitha alitjhumi ukuphakama. Wayinameka yona ne-aldari lomsedari ngecwecwe legolide.

²¹ USolomoni wanameka ilingaphakathi lethempeli ngecwecwe legolide. Walembelelisa iinketani zegolide ziqaba ingaphambili lendawo ecwenge khulu, ebeyembeswe ngegolide.

²² Ngaleyondlela wanameka ngegolide woke umakhiwo ngaphakathi kanye ne-aldari elingaphambi kwendawo ecwenge khulu.

²³ Ngaphakathi kwendawo ecwenge khulu wenza amakerubhi amabili ngeengodo ze-oliva; ikerubhi ngalinye laba mamitha amahlanu ukuphakama.

²⁴ Iphiko ngalinye lekerubhi lalimamitha amabili nesiquntu ubude, kumamitha amahlanu ukusuka etlobeni yephiko ukuya kwenye itlobo yephiko.

²⁵ Ikerubhi lesibili nalo gade linesilinganiso samamitha amahlanu ngombana amakerubhi amabili lawa gade afana poro ngobukhulu nangesibumbeko.

²⁶ Ukuphakama kwekerubhi ngalinye gade kumamitha amahlanu.

²⁷ Wabeka amakerubhi ngaphakathi kwendawo ecwenge khulu, amaphiko wakhona avulekile. Iphiko lekerubhi elilodwa belithinte iboda bese kuthi iphiko lelinye ikerubhi nalo lithinte iboda elinye. Wona gade athintene ngamaphiko phakathi nendawo ecwenge khulu.

²⁸ Wanameka amakerubhi ngegolide.

²⁹ Wabazela amakerubhi, imithi yamasundu namakhwa aqhakazileko emabodeni angaphakathi wethempeli, endaweni ecwenge khulu nesirhodlweni esikhulu.

³⁰ Wanameka nomgangadelo wendawo ecwenge khulu nesirhodlo esikhulu ngegolide.

³¹ Ebungenweni bendawo ecwenge khulu wenza iminyango yeengodo zemithi ye-oliva, igoseni yakhona beyinamahlangothi amahlanu.

³² Wabazela amakerubhi, imithi yamasundu namakhwa aqhakazileko eminyangweni emibili leyo yeengodo ze-oliva. Wanameka iminyango ngegolide, ngokufanako wanameka amakerubhi kanye nemithi yamasundu.

³³ Wenza soneso nebungenweni besirhodlo esikhulu: Igoseni yeengodo zemithi ye-oliva beyinamahlangothi alinganako.

³⁴ Iminyango emibili yegoseni leyo gade yenziwe ngeengodo zomsayipurusi. Umnyango omunye nomunye gade uphayeka begodu wenziwe ngamaplanka amabili.

³⁵ Wabazela amakerubhi, imithi yamasundu namakhwa aqhakazileko phezu kweminyango leyo, watlinkelela igolide emlabulabana phezu kobaziweko.

³⁶ Wakha nesirhodlo esingaphakathi esinamahla amathathu wamatje abaziweko nelihla elilodwa lamabhaluga womsedari.

³⁷ Isisekelo sethempeli lakaSomnini sakhiwa emnyakeni wesine, ngenyanga kaZifu.

³⁸ Emnyakeni wetjhumi nanye wokubusa kwakaSolomoni, ngenyanga kaBhulu, okuyinyanga yobumnane ithempeli laqedwa ukwakhiwa ngokwemininingwana yoke yakhona nangendlela yoke ebeyijanyiswe ngayo. Kwamthatha iminyaka elikhomba uSolomoni ukwakha ithempeli.