1 AMAKHOSI 5 - IsiNdebele 2012 Translation

USolomoni wenza amalungiselelo wokwakha ithempeli

¹ Lokha uRhiramu ikosi yeTirosi nezwa bonyana uSolomoni uzeswe bona abe yikosi athathe iintambo zakayise uDavida, wathumela abazenda bakhe kuSolomoni ngombana gade azwana noDavida.

² USolomoni wathumela umlayezo kuRhiramu wathi:

³ “Uyazi bonyana ubaba uDavida gade asahlelwa zizipi ngapha nangapha, nje-ke ngebangelo akhange akghone ukwakhela uSomnini uZimakhe ithempeli, uZimu angakabeki izitha zakhe ngaphasi kweenyawo zakhe.

⁴ Nje-ke uSomnini uZimami unginikele ukuphumula mahlangothi woke begodu anginasitha nanyana ingozi.

⁵ Yeke, ngiyabhinca ngifuna ukwakhela uSomnini uZimami ithempeli njengombana uSomnini watjela ubaba uDavida wathi, ‘Indodanakho engizayibeka esihlalweni sobukhosi endawenakho izangakhela ithempeli.’

⁶ Ngebangelo-ke thumela umlayezo bonyana ngilungiselwe iingodo zomsedari weLibhanoni. Abantu bami bazakusebenza nebakho begodu ngizakukhokhela nanyana yimalini oyibizako ngabantu bakho. Uyazi bonyana asinaye umuntu onekghono lokukghedlha imithi njengamaTsidoni.”

⁷ Lokha uRhiramu nezwa umlayezo kaSolomoni wathaba khulu wathi: “Akuthokozwe uSomnini uZimu namhlanjesi ngombana uphe uDavida indodana ehlakaniphileko kobana ibuse isizwe esikhulu kangakesi.”

⁸ Yeke uRhiramu wathumela ilizwi kuSolomoni wathi: “Ngiwufumene umlayezwakho begodu ngizakwenza koke okubawileko, umsedari neengodo zomsayipurusi.

⁹ Abantu bami bazazidudula ukusuka eLibhanoni bekube selwandle bese ngizithayisa ngeenyanda elwandle kufikela lapha uzifuna khona. Nazifika lapho ngizabese ngiyazitlharhulula-ke, uzithathe ukhambe nazo. Wena-ke uzakufanela bonyana uphe isigodlo sami ukudla engikubawileko.”

¹⁰ Ngambala uRhiramu wahlinzeka uSolomoni ngomsedari nangeengodo ayegade azidinga,

¹¹ noSolomoni wapha uRhiramu amatjhumi athobako weenkulungwana zemigodla yekoroyi njengokudla kwesigodlo sakhe. Godu wamupha neenkulungwana ezilithoba zamalitha wamafutha we-oliva etlhodlhiweko. USolomoni waragela phambili nokupha uRhiramu ngalendlela iminyaka ngeminyaka.

¹² USomnini wapha uSolomoni ukuhlakanipha njengombana bekamthembisile. Kwaba khona itjhebiswano ehle phakathi kwakaSolomoni noRhiramu ngombana benza isivumelwano sokuthula.

¹³ Ikosi uSolomoni yakatelela amadoda aziinkulungwana ezimatjhumi amathathu kilo loke lakwa-Israyeli bona asebenze.

¹⁴ Wawathumela eLibhanoni ngamajima wabaziinkulungwana ezilitjhumi ngenyanga ukuze aqede inyanga aseLibhanoni bese aqeda zimbili asemakhaya. U-Adoniramu gade ayinduna yamajima.

¹⁵ USolomoni gade aneenkulungwana ezimatjhumi alikhomba zamadoda athwala amatje neenkulungwana ezimatjhumi abunane akghedlha ngeentabeni,

¹⁶ kanye neenduna eziziinkulungwana ezintathu namakhulu amathathu ebegade zibeke ilihlo emsebenzini begodu zilawula abasebenzi.

¹⁷ Ikosi uSolomoni yayala bonyana kukghadlhwe amatje amakhulu nakhethekileko ukuze kuyokwakhiwa isisekelo sethempeli ngamatje abaziweko.

¹⁸ Abososino bakaSolomoni noRhiramu namadoda weGebali bagawula bebalungisa iingodo kanye namatje wokwakha ithempeli.