1 AMAKHOSI 4 - IsiNdebele 2012 Translation

Iinkhulu zakaSolomoni

¹ Ikosi uSolomoni yabusa phezu kwaka-Israyeli woke.

² Iinkhulu zakhe eziphezulu bekungilezi: u-Azariya umsa kaTsadokhi umphristi;

³ u-Elirhorefi no-Arhiya, amadodana kaTjhitjha bekubomabhalana; uJehotjhafathi umsa ka-Arhiludi angunobhala;

⁴ uBhenaya umsa kaJehojada ayinduna yamabutho; uTsadokhi no-Abiyatari babaphristi;

⁵ u-Azariya umsa kaNathani angumphathi weenkhulu zeemfunda; uZabudi umsa kaNathani amphristi nomeluleki wekosi;

⁶ u-Arhitjhari amphathi wesigodlo; u-Adoniramu umsa ka-Abida amphathi wezemisebenzi.

⁷ USolomoni gade anababusi beemfunda ezilitjhumi nambili kilo loke lakwa-Israyeli, egade baphakela ikosi nesigodlo. Omunye nomunye gade afanele alethe isondlo senyanga yoke ngomnyaka.

⁸ Amabizwabo bekungu Bhen-Rhuru wangeentatjaneni zakwa-Efrayimu;

⁹ uBhen-Dekere aphethe eMakatsa, eTjhayalbimi, eBhethe-Tjhemetjhi ne-Eloni-Bhethe-Rhanani;

¹⁰ uBhen-Rhesedi aphethe e-Arubhotho (iSoko nayo yoke inarha yeRhefere bekungezakhe);

¹¹ uBhen-Abinadaba aphethe yoke iNaphathi-Dori (gade atjhade noThafati indodakazi kaSolomoni);

¹² uBhana umsa ka-Arhiludi aphethe eTanakha neMegido, nayo yoke iBhethe-Tjhani eseduze neTsarithani ngenzasi kweJizriyela, ukusuka eBhethe-Tjhani ukuya e-Abela-Merhola ngaphetjheya kweJokomoyamu;

¹³ uBhen-Gebere aphethe eRamothi eGiliyadi (wathatha amatende kaJayire umsa kaManasa oseGiliyadi bona abe ngewakhe kanye nesifunda se-Arigobho eseBhatjhani esinamadorobho amathandathu amakhulu, anemithangala namasango aneenqabo zekoporo);

¹⁴ U-Arhinadaba umsa ka-Ido aphethe eMarhanayimu;

¹⁵ U-Arhimahatsi aphethe eNafitali (gade atjhade uBhasemathi indodakazi kaSolomoni);

¹⁶ UBhana umsa kaRhutjhayi aphethe e-Atjhere ne-Alothi;

¹⁷ UJehotjhafathi umsa kaParuwarha aphethe e-Isakari;

¹⁸ UTjhimeyi umsa ka-Ela aphethe eBhenjamini;

¹⁹ UGebere umsa ka-Uri aphethe eGiliyadi (inarha yeSirhoni, ikosi yama-Amori nenarha ye-Ogi, ikosi yeBhatjhani). Gade kunguye kwaphela umbusi wesifunda.

Ukudla kwemihla ngemihla endlini yobukhosi

²⁰ Abantu bakwaJuda nebakwa-Israyeli gade babanengi inga yihlabathi yelwandle; bangatlhogi okudliwako nokuselwako, bajekezela.

²¹ USolomoni wabusa yoke imibuso ukusukela emlanjeni iYufrathe ukuya enarheni yamaFilista, ukuyokufika emkhawulweni weGibhide. Yoke imibuso le yaletha umthelwayo kuSolomoni begodu wayibusa ipilwakhe yoke.

²² Ukudla kwakaSolomoni kwangamalanga gade kulikhulu namatjhumi amathathu nahlanu wemigodla yeflowuru esefiweko namakhulu amabili anamatjhumi alikhomba wemigodla yeflowuru emakariya;

²³ iinkomo ezilitjhumi ezinonisweko, iinkomo ezimatjhumi amabili ezidla emrhuleni nezimvu ezilikhulu, imihlobo yeempalapala, iinhlangumataka neentsephe kanye namadada anonisiweko.

²⁴ Wabusa imibuso yoke engetjingalanga yomLambo, ukusuka eTifsarha ukuya eGaza, godu anokuthula mahlangothi woke.

²⁵ Ngesikhathi sokuphila kwakaSolomoni, uJuda no-Israyeli baphila ngokuphepha ukusuka eDani etlhagwini ukuya eBheritjheba esewula, enye nenye indoda beyizigedla ngaphasi komthunzi wakwayo wesidiribe nomuthi wamakhiwani.

²⁶ USolomoni gade aneenkulungwana ezine zeenjomani zeenkarana, neenkulungwana ezilitjhumi nambili zabakhweli.

²⁷ Isikhulu esinye nesinye sesifunda bekuthi nakuyinyanga yedlhego laso sithumele isibiko ekosini uSolomoni kanye nazo zoke iinthekeli zakhe. Gade ziqinisekisa bonyana akunanto etlhayelako esigodlweni.

²⁸ Godu gade ziletha nebhali neforiji endaweni efaneleko ukuze kuzokuphiwa iinjomani zeenkarana nezinye nje iinjomani.

Ukuhlakanipha kwakaSolomoni

²⁹ UZimu wapha uSolomoni ukuhlakanipha okukhulu nokubona kuhle izinto ngelihlo elibukhali, nommoya wokuzwisisa ngendlela ebanzi.

³⁰ Ukuhlakanipha kwakaSolomoni gade kudlula kwawo woke amadoda wepumalanga, godu kudlula ukuhlakanipha koke kweGibhide.

³¹ Gade ahlakaniphe ukudlula woke umuntu, adlula ngitjho no-Ethani umEzrarhi, uHemani, uKalkolo noDarida, amadodana kaMarholo. Iye, idumo lakhe lasabalala kizo zoke izizwe ezizombelezileko.

³² Wakhuluma izaga eziziinkulungwana ezintathu neengoma zakhe zaziyikulungwana nahlanu.

³³ Wahlathulula zoke iintjalo ukusuka keziqakathekileko njengomsedari weLibhanoni ukuya kezijayelekileko njengehisophi emila emithangaleni. Begodu bekafundisa ngeenlwana neenyoni, iinrhurhubi neenhlambi.

³⁴ Kweza amadoda avela ezizweni zoke ukuzokulalela ubuhlakani bakaSolomoni, athunyelwe makhosi woke wephasi egade sele ezwile ngobuhlakani bakhe.