1 AMAKHOSI 2 - IsiNdebele 2012 Translation

Imiyalo yokugcina kaDavida kuSolomoni

¹ Kwathi nasele kusondele isikhathi sokobana uDavida ahlongakale, wayala indodanakhe uSolomoni

² wathi: “Sengizokukhamba ngiziyele kwamhlaba. Nje-ke, qina amandla msanami, uzibonakalise bonyana uyindoda emadodeni.

³ Ulonde okufunwa nguSomnini uZimakho: Khamba eendleleni zakhe, ulonde iimiso nemiyalwakhe, imithetho neemfuneko zakhe njengombana kutlolwe emthethweni kaMosi, ukuze uphumelele kikho koke okwenzako nalokho onqophe ukukwenza.

⁴ Phetha koke lokhu ukuze uSomnini aphumelelise isithembiso sakhe kimi nathi, ‘Nange iinzukulwana zakho zingatjheja indlela eziphila ngayo, zikhambe ngokwethembeka phambi kwami, ziphelele ngeenhliziyo nangemiphefumulwazo, angeze wabhalelwa kubeka umuntu esihlalweni sobukhosi kwa-Israyeli.’

⁵ “Uyazazela-ke nawe bonyana uJowabi umsa kaTseruya wenzani kimi lokha nabulala iinduna ezimbili zebutho lakwa-Israyeli, u-Abineri umsa kaNeri no-Amasa umsa kaJeteri. Kwathi kusikhathi sokuthula waphalaza iingazi zabo kwanga kusepini, watjhatjha ibhande edinini lakhe namapatlagwana eenyaweni zakhe ngeengazi zabo.

⁶ Bona ukuqeda ngaye ngendlela ongakghona ngayo, kodwana ungamlisi azifele ngokuthula.

⁷ “Yiba nesisa emadodaneni kaBharzilayi weGiliyadi, uwavumele abe hlangana nalabo abagoma etafuleni lakho ngombana angisekela lokha nangibaleka umfowenu u-Absalomu.

⁸ “Ukhumbule-ke bonyana kunoTjhimeyi umsa kaGera umBhenjamini weBharhurimu, owangijikijela ngazo zoke iinhlamba mhlana ngiya eMarhanayimu. Wewuka wangihlangabeza eJordani, ngafunga kuye ngathi, ‘NgoZimu ngiqinisile ngithi angeze ngakuqunta ihloko ngesabula.’

⁹ Nokho angitjho bonyana umthathe njengomuntu omsulwa. Wena uyindoda ehlakaniphileko, uzazibonisela ngaye. Akafe ngengongoma.”

¹⁰ UDavida wahlongakala, wafihlwa eMzini kaDavida.

¹¹ Wabusa iminyaka ematjhumi amane kwa-Israyeli. Wabusa iminyaka elikhomba eRhebroni; ematjhumi amathathu nantathu eJerusalema.

¹² Nje-ke uSolomoni wahlala esihlalweni sobukhosi sakayise uDavida, umbuswakhe wahlonywa ngokunzinzileko.

U-Adoniya uyasuswa

¹³ Kwasuka u-Adoniya indodana kaRhagithi waya kuBhathi-Tjheba unina kaSolomoni. UBhathi-Tjheba wambuza wathi: “Uze ngokuthula na?” Waphendula wathi: “Iye, ngize ngokuthula.”

¹⁴ Godu wathi: “Kunento engifuna ukuyikhuluma nawe.” UBhathi-Tjheba wathi: “Yiza nazo.”

¹⁵ Waraga-ke u-Adoniya wathi: “Njengombana wazi, umbuso bewungewami. Woke u-Israyeli gade aqale mina bonyana ngizakuba yikosi. Kodwana kube nomphambo, iintambo zaphathwa ngumfowethu. Nokho-ke lokho ukwabelwe nguZimu.

¹⁶ Yeke nginento yinye tere engifuna ukuyikhombela kuwapha. Ngibawa bonyana ungali.” UBhathi-Tjheba wathi: “Ungakhuluma.”

¹⁷ U-Adoniya wathi: “Ngikhombela bonyana ungikhulumele nekosi uSolomoni ingiphe u-Abitjhagi umTjhunemi bona abe mkami. Ngiyazi angeze aba likhuni nakatjelwa nguwe.”

¹⁸ UBhathi-Tjheba wathi: “Iye, awa kulungile. Ngizakukhulumela nekosi.”

¹⁹ UBhathi-Tjheba waya ekosini uSolomoni bonyana ayokukhulumela u-Adoniya. USolomoni wasikima wamhlangabeza, wafese wamkhothamela. Wahlala esihlalweni sakhe wathi akulethwe isihlalo sendlovukazi izokuhlala. UBhathi-Tjheba wahlala phasi ngesidleni sakhe.

²⁰ UBhathi-Tjheba wathi: “Nginesibawo esincani esisodwa tere engisilethe kuwapha. Ungangaleli.” Ikosi yathi: “Yewukhulume mma, angeze ngakwalela.”

²¹ Wakhuluma-ke uBhathi-Tjheba wathi: “Vumela u-Abitjhagi umTjhunemi kobana ende kumfowenu u-Adoniya.”

²² Ikosi uSolomoni yathi endlovukazini: “Kubayini ubawa bona u-Abitjhagi umTjhunemi ende ku-Adoniya? Akusingcono usale sele umbawela nobukhosobu? Angithi vele nguye omkhulu! Iye, ubawele nomphristi u-Abiyatari noJowabi umsa kaTseruya!”

²³ Ikosi uSolomoni yafunga ngoZimu yathi: “Ngithi nange u-Adoniya angafi ngesibanga sesibawo sakhesi, uZimami akangihlunguphaze, ngiphele nya!

²⁴ NgoZimu owangibeka esihlalweni sobukhosi sakababa uDavida bewanginikela nobukhosi njengombana athembisa, ngiqinisile ngithi u-Adoniya loyo, uzakubulawa khona namhlanjesi!”

²⁵ Ikosi uSolomoni yayala uBhenaya umsa kaJehojada bonyana abulale u-Adoniya. Ngambala wafika wamrharhabula wafa.

U-Abiyatari uyaqotjhwa begodu uJowabi uyabulawa

²⁶ Ikosi yathi kumphristi u-Abiyatari: “Buyela ekhenu e-Anatothi. Umumuntu wokufa wena. Emanyeni ngabe ngikubulele ibe thana bewungasimthwali womfaji kaSomnini uSomandla phambi kwakababa uDavida, wahlanganyela nobaba kiyo yoke imitlhagwakhe.”

²⁷ USolomoni waqotjha u-Abiyatari esikhundleni sobuphristi bakaSomnini, kwazaliseka ilizwi lakaSomnini alikhuluma eTjhilo ngekumba ka-Eli.

²⁸ Kwathi bona uJowabi ezwe ngokwenzekileko, wabalekela etendeni lakaSomnini, wakakarela iimpondo ze-aldari. UJowabi lo gade ahlala isicathana no-Adoniya kodwana azange enze isigungu no-Absalomu.

²⁹ Ikosi uSolomoni yabikelwa bonyana uJowabi ubalekele etendeni lakaSomnini begodu use-aldarini. USolomoni wayala uBhenaya umsa kaJehojada wathi: “Khamba, ufese umrharhabule!”

³⁰ Yeke uBhenaya wangena ngetendeni lakaSomnini wathi kuJowabi: “Ingwenyama ithi uphume lapho.” Kodwana wathi: “Ulale ulahlile, abe angiphumi lapha, dumbana ngifele khonapha.” UBhenaya wabikela ikosi wathi: “Ulikhomba libaba.”

³¹ Ikosi yayala uBhenaya yathi: “Nafuna ukufela lapho, akube njengamagamakhe: Mrharhabule! Umngcwabe ukuze kuhlanzeke ibizo lami kanye nekumba yakababa emlandwini wokuthululwa kweengazi ezinganamlandu okwenziwa nguJowabi.

³² UZimu umthwese umlandu weengazi azithululako ngokumadlha abulale amadoda amabili, u-Abineri umsa kaNeri ogade ayinduna yebutho lakwa-Israyeli, no-Amasa umsa kaJeteri ogade ayinduna yebutho lakwaJuda. Womabili amadoda lawo gade kumadoda alungileko nangcono khulu kunaye. Koke lokhu wakwenza ngaphandle kokwazisa ubaba uDavida.

³³ Iingazi zabo zizakuba phezu kwakaJowabi kanye neenzukulwana zakhe isiphelani. Kodwana ukuthula kwakaZimu kuzakwanda isiphelani kuDavida neenzukulwana zakhe, esigodlweni sakhe nakilabo abazakubusa emva kwakhe.”

³⁴ Yeke uBhenaya umsa kaJehojada wenyuka wayokurharhabula uJowabi wambulala. Wangcwatjwa endawenakhe emrhuleni.

³⁵ Ikosi uSolomoni yabeka uBhenaya umsa kaJehojada bona abe mphathibutho esikhundleni sakaJowabi begodu isikhundla saka-Abiyatari yasinikela umphristi uTsadokhi.

UTjhimeyi uyabulawa

³⁶ Ikosi uSolomoni yathumela bona kubizwe uTjhimeyi yathi kuye: “Zakhele ikumba eJerusalema bese uzihlalela lapho, kodwana ungalingi uye kwenye indawo.

³⁷ Mhlana weqa umlanjana weKhidroni, wazi bonyana uziphekelele! Iingazi zakho zizakuba phezu kwehlokwakho.”

³⁸ UTjhimeyi wathi ekosini: “Amagamakho lawo ahlaba ikomo. Yeke incekwakho izakwenza njengombana kusitjho ikosami.” Ngambala uTjhimeyi wahlala eJerusalema isikhathi eside.

³⁹ Kodwana ngemva kweminyaka emithathu, amakhoboka amabili wakaTjhimeyi abalekela ku-Akhitjhi umsa kaMakha, ikosi yeGathi. UTjhimeyi wabikelwa kwathiwa: “Amakhobokakho aseGathi.”

⁴⁰ Khonokho uTjhimeyi wabophela udumbanakhe wanqomba ku-Akhitjhi eGathi ukuyokufuna amakhobokakhe. Kwaba kuwabuyisa kwakhe-ke amakhobokakhe eGathi.

⁴¹ USolomoni wabikelwa bonyana uTjhimeyi khewaphuma eJerusalema waya eGathi bewabuya.

⁴² Yeke ikosi uSolomoni yathi akubizwe uTjhimeyi. Yathi kuye: “Kanti azange ngikufungise phambi kwakaSomnini bengakukhalima ngathi, ‘Nange watjhida kelalapha, wazi bonyana uziphekelele?’ Mhlokho wathi kimi, ‘Amagamakho lawo ahlaba ikomo; ngizakwenza njalo.’

⁴³ Alo-ke kutheni ungazange ulonde isithembiso sakho owasenza phambi kwakaSomnini bese ulalela umyalo engakuyala ngawo na?”

⁴⁴ Ikosi yathi godu kuTjhimeyi: “Ehliziywenakho wazi yoke imitjhapho owatjhaphela ngayo ubaba uDavida. Nje-ke uZimu uzokuhlawulisa ngokona kwakho.

⁴⁵ Kodwana mina Solomoni, uZimu uzangibusisa begodu aqinise ubukhosi bakaDavida isiphelani.”

⁴⁶ Ikosi uSolomoni yalayela uBhenaya umsa kaJehojada bonyana aphume afese arharhabule uTjhimeyi ambulale. Baqina njalo-ke ubukhosi ezandleni zakaSolomoni.