1 AMAKHOSI 16 - IsiNdebele 2012 Translation

¹ Ilizwi lakaSomnini lafika kuJehu umsa kaRhanani lijamelene noBhatjha lathi:

² “Ngakudobha ethulini ngakwenza umrholi wabantu bami u-Israyeli, kodwana ukhambe eendleleni zakaJerobhowamu bewabangela bona abantu bami u-Israyeli nabo bone, wangithukuthelisa ngezono zabo.

³ Nje-ke ngizakurhurhula indlwakho, wena Bhatjha, njengamanzi narhurhula amabibi; ngiyenze ifane neyakaJerobhowamu umsa kaNebathi.

⁴ Abantu bakho abafele emadorobheni bazakudliwa zizinja, kuthi abafele emrhuleni badliwe madlanga.”

⁵ Zoke izehlakalo zokubusa kwakaBhatjha, koke akwenzileko nokuhlula kwakhe, kutlolwe encwadini yemilando yamakhosi wakwa-Israyeli.

⁶ UBhatjha wahlongakala, wabulungelwa eTiritsa. U-Ela indodanakhe yaba yikosi esikhundleni sakhe.

⁷ Umlayezo uSomnini awuphathisa umphorofidi uJehu umsa kaRhanani gade unqophe kuBhatjha neenzukulwana zakhe, ngebanga lakho koke okumbi akwenza phambi kwakaSomnini. Wathukuthelisa uSomnini ngezenzo zakhe, waba njengendlu kaJerobhowamu. Elinye ibanga kukobana uBatjha wabhubhisa indlu kaJerobhowamu.

Umbuso ka-Ela ikosi yakwa-Israyeli

⁸ Emnyakeni wamatjhumi amabili nathandathu wokubusa kwaka-Asa ikosi yakwaJuda, u-Ela umsa kaBhatjha waba yikosi kwa-Israyeli. Wabusa eTiritsa iminyaka emibili.

⁹ Omunye weenkhulu zakhe okuthiwa nguZimri ogade amphathi wengcenye yeenkarana zakhe wamakhela ubukhwebetjhana. Ngesikhatheso u-Ela gade aseTiritsa, azinikelele ngotjwala kwa-Aritsa, induna egade yeluse isigodlo seTiritsa.

¹⁰ UZimri wangena, wamdula phasi bewambulala. Lokhu kwenzeka emnyakeni wamatjhumi amabili nekhomba wokubusa kwaka-Asa ikosi yakwaJuda. UZimri wathatha ubukhosi.

Umbuso kaZimri ikosi yakwa-Israyeli

¹¹ Kuthe nathoma ukubusa, sele abekiwe esihlalweni sobukhosi, wabulala boke endlini kaBhatjha. Azange atjhiye namunye omduna, wabulala kwasihlobo namngani.

¹² Iye, uZimri wabhubhisa woke umndeni kaBhatjha kwaba njengokutjho kwelizwi lakaSomnini alikhuluma kuJehu ngokujamelana noBhatjha.

¹³ Ngebanga lazo zoke izono ezenziwa nguBhatjha nendodanakhe u-Ela, ngokubangela bonyana no-Israyeli one ngabosingazimu abangatjho litho, bathukuthelisa uSomnini uZimu wakwa-Israyeli.

¹⁴ Ezinye izehlakalo zokubusa kwaka-Ela, nakho koke akwenzako kutlolwe encwadini yemilando yamakhosi wakwa-Israyeli.

¹⁵ Emnyakeni wamatjhumi amabili nalikhomba wokubusa kwaka-Asa ikosi yakwaJuda, uZimri wabusa eTiritsa amalanga alikhomba. Kwakunamabutho agade avimbezele iGibhethoni, idorobho lamaFilista.

¹⁶ Kuthe lokha ama-Israyeli asekampeni nezwa bonyana uZimri ubophele ikosi ubukhwebetjhana, bewambulala, athatha u-Omri umphathibutho amenza ikosi phezu kwaka-Israyeli khona mhlokho ekampenapho.

¹⁷ U-Omri nawo woke ama-Israyeli agade anaye lapho baphuma eGibhethoni bavimbezele iTiritsa.

¹⁸ Lokha uZimri nabona bonyana idorobho liragelelwe, wanqomba esiphephelweni sesigodlo, wafese wasithungelela ngomlilo ngehla kwakhe, wahlongakala.

¹⁹ Wafa ngebanga lezono azenzileko ngombana wenza okumbi phambi kwakaSomnini ngokukhamba eendleleni zakaJerobhowamu nezonweni azenzako, nabangela ngazo u-Israyeli bona one.

²⁰ Ezinye izehlakalo zokubusa kwakaZimri kanye nobukhwebetjhana bakhe ngo-Ela kutlolwe encwadini yemilando yamakhosi wakwa-Israyeli.

U-Omri uyikosi yakwa-Israyeli

²¹ Abantu bakwa-Israyeli bahlukana iinqhema ezimbili, esinye isiquntu sasekela uTibni umsa kaGinathi kobana abe yikosi, esinye sasekela u-Omri.

²² Kodwana abalandeli baka-Omri bebanamandla ukudlula bakaTibni umsa kaGinathi. Kuthe uTibni selahlongakele, u-Omri waba yikosi.

²³ Emnyakeni wamatjhumi amathathu nanye wokubusa kwaka-Asa ikosi yakwaJuda, u-Omri wathatha iintambo kwa-Israyeli. Wabusa iminyaka elitjhumi nambili; iminyaka esithandathu wayibusela eTiritsa.

²⁴ Wathenga intatjana yeSamariya kuTjhemeri ngamakhilogremu amatjhumi asithandathu nobunane wesiliva. Wakha nomuzi phezu kwentatjanapho, wawuthiya bona yiSamariya, awuthiyelela ngoTjhemeri ogade amnikazi waphambilini wentatjana leyo.

²⁵ Kodwana u-Omri wenza ubumbi phambi kwakaSomnini, wathuwelela ukudlula boke ababuse phambi kwakhe.

²⁶ Wakhamba kizo zoke iindlela zakaJerobhowamu umsa kaNebathi ngitjho nezonweni zakhe, abangela ngazo bonyana u-Israyeli one, bekwafika lapha bathukuthelisa khona uSomnini uZimu wakwa-Israyeli ngabosingazimu abangatjho litho.

²⁷ Ezinye izehlo zokubusa kwaka-Omri, koke akwenzileko nokuhlula kwakhe, kutlolwe encwadini yemilando yamakhosi wakwa-Israyeli.

²⁸ U-Omri waphumula kiboyisemkhulu, wabulungwa eSamariya. U-Arhabi indodanakhe waba yikosi emva kwakhe.

Umbuso ka-Arhabi ikosi yakwa-Israyeli

²⁹ Emnyakeni wamatjhumi amathathu nobunane wokubusa kwaka-Asa ikosi yakwaJuda, u-Arhabi umsa ka-Omri waba yikosi yakwa-Israyeli. Wabusa eSamariya phezu kwaka-Israyeli iminyaka ematjhumi amabili nambili.

³⁰ U-Arhabi umsa ka-Omri wathuwelela khulu ukudlula boke ababuse phambi kwakhe ngokwenza ubumbi phambi kwakaSomnini.

³¹ Wabona inga akukaneli ukudlhemadlhema eendleleni zokona kwakaJerobhowamu umsa kaNebathi, watjhada no-Izebeli indodakazi ka-Ethi-Bhali ikosi yamaTsidoni, bewakhamba alotjha uBhali wamkhothamela.

³² Wajamisela uBhali i-aldari ethempelini lakaBhali alakha eSamariya.

³³ U-Arhabi godu wenza umfanekiso ka-Atjhera begodu wathuwelela ngokuthukuthelisa uSomnini uZimu wakwa-Israyeli kunawo woke amakhosi abuse ngaphambi kwakhe.

³⁴ Ngesikhathi saka-Arhabi, uHiyeli weBhethe-Eli wavuselela iJerikho. Waleya isisekelo sayo ngomphefumulo wezibulo lendodanakhe u-Abiramu, wajamisa amasangwayo ngomphefumulo wobuphetjani bendodanakhe uSegubhi, kwaba njengelizwi lakaSomnini alikhuluma ngoJotjhuwa umsa kaNuni.