1 AMAKHOSI 12 - IsiNdebele 2012 Translation

Ukuhlukaniswa kobukhosi

¹ URerhobhowamu waya eTjhekemu ngombana woke ama-Israyeli aya lapho kobana ambeke abe yikosi.

² UJerobhowamu umsa kaNebathi wezwa ngendaba le asese seGibhide lapha abalekela khona uSolomoni. Wahlala eGibhidapho,

³ nje-ke kwathunyelwa abantu kuye bonyana abuye. UJerobhowamu nomkhambathi woke wakwa-Israyeli baya kuRerhobhowamu bafese bathi kuye:

⁴ “Uyihlo gade asithwese ijogi elibudisi. Yeke wena gedlisa umsebenzi obudisi kayihlo lo bewunyefise nejogi asithwese loneli; khona-ke sizakulotjha.”

⁵ URerhobhowamu wathi: “Khambani bese nibuya elangeni lesithathu.” Awa, yeke abantu bakhamba-ke.

⁶ Ikosi uRerhobhowamu yabonana neengwevu zabaphathi ezazilotjha uyise uSolomoni ngesikhathi sokuphila kwakhe yathi: “Ningangeluleka bonyana ngithini ebantwinapha na?”

⁷ Bathi kiyo: “Nawungakhe ube yinceku ebantwinaba namhlanjesi, ubenzele kuhle bese ubanikela ipendulo ehle, bazakuhlala baziinceku zakho.”

⁸ Kodwana uRerhobhowamu wala iseluleko asinikelwa ziingwevu, wayokubonana neentanga zakhe nebegade sele bamlotjha.

⁹ Wababuza wathi: “Umbono wenu uthini? Singabaphendula njani abantwaba abathi kimi angigedlise ijogi abalithweswe ngubaba na?”

¹⁰ Iintanga zakhe zamphendula zathi: “Tjela abantu abathe kuwe batjho bafuna ukugedliselwa ijogi elibudisi abalithweswa ngubabakho uthi, “ ‘Utsetserwanami umabhombo kunedini lakababa.

¹¹ Ubaba wanethwesa ijogi elibudisi; mina-ke ngizalenza libe budisi ukudlula. Ubaba bekaniritha ngeembebhu; mina ngizonirhadla ngomrwedla.’ ”

¹² Elangeni lesithathu uJerobhowamu nabantu boke babuyela ekosini uRerhobhowamu njengombana wayethe: “Yenibuye elangeni lesithathu.”

¹³ Ikosi yalahla iseluleko eyasinikelwa baphathi, yaphendula abantu ngobukhali

¹⁴ ngombana yalandela iseluleko seentanga zayo yathi: “Ubaba wenza ijogi lenu laba budisi; kimapha-ke nizokubhesa. Ubaba waniritha ngeembebhu; mina ngizonirhadla ngomrwedla.”

¹⁵ Yeke ikosi azange ilalele abantu ngombana isenzekwesi sasiyintando kaZimu, ukuzalisa amagama awakhuluma kuJerobhowamu umsa kaNebathi ngo-Arhiya umTjhilo.

¹⁶ Kuthe lokha woke u-Israyeli nabona bonyana ikosi ayimuphi indlebe, waphendula ikosi wathi: “Asinasabelo noDavida, asithintani ndawo nomsa kaJese! Ayigubhe Israyeli! Uzazibona ukuqeda wena ndlu kaDavida!” Yeke ama-Israyeli aphadlhalala, agoduka.

¹⁷ Kodwana nakuma-Israyeli agade ahlala emadorobheni wakwaJuda wona, uRerhobhowamu wawabusa.

¹⁸ Ikosi uRerhobhowamu yathumela u-Adoniramu owayegade ayinduna yomsebenzi okatelelako, kodwana woke u-Israyeli wamkhanda ngamatje bewahlongakala. Nokho ikosi uRerhobhowami yakghona ukuphunyurha yakhwela ekaranenayo yabalekela eJerusalema.

¹⁹ Ngalokho u-Israyeli wathoma ukujamelana nendlu kaDavida bekwaba kunamhlanje.

²⁰ Kuthe bona woke u-Israyeli ezwe bonyana uJerobhowamu ubuyile, kwaphuma igama lokobana abizelwe emkhambathini azokubekwa bonyana abe yikosi phezu kwaka-Israyeli woke. Yikoro yakwaJuda yodwa eyathembekako endlini kaDavida.

²¹ Lokha uRerhobhowamu nafika eJerusalema, wabutha yoke indlu kaJuda kanye nekoro kaBhenjamini, kwaba ziinhlabani zeenkakaramba ezilikhulu namatjhumi abunane weenkulungwana kobana zilwe nendlu ka-Israyeli nokubuyisa ubukhosi bakaRerhobhowamu umsa kaSolomoni.

²² Kodwana kwafika ilizwi lakaZimu kuTjhemaya umuntu kaZimu lathi:

²³ “Yewuthi kuRerhobhowamu umsa kaSolomoni ikosi yakwaJuda, kiyo yoke indlu kaJuda noBhenjamini, nakibo boke abantu,

²⁴ nakhu okwatjhiwo nguSomnini, ‘Ningenyuki bona niyokulwa nabafowenu, ama-Israyeli. Godukani, omunye nomunye anqombe kwakhe ngombana lokhu kusisenzo sami.’ ” Yeke balalela ilizwi lakaSomnini babuyela emakhaya njengombana uSomnini bekabatjelile.

UJerobhowamu wenza iinthombe zegolide

²⁵ UJerobhowamu waqinisa iTjhekemu ngembundwini we-Efrayimu bewahlala lapho. Ukusuka lapho waphuma wayokwakha iPenuweli.

²⁶ UJerobhowamu wazitjela wathi: “Kwanjesi umbuso ungahle ubuyele endlini kaDavida.

²⁷ Nange abantwaba bangalokhu benyuka bayokwenza imihlabelo ethempelini lakaSomnini eJerusalema, iinhliziyo zabo zizakubuyela ekosinabo uRerhobhowamu ikosi yakwaJuda. Bazangibulala bese babuyela kuRerhobhowamu.”

²⁸ Ikosi uJerobhowamu yafuna iseluleko, yenza amathole amabili wegolide. Yathi ebantwini: “Sekwanele kwanje bonyana nilokhu nenyukela eJerusalema. Napa musi abozimu bakho, wena Israyeli abakukhupha eGibhide.”

²⁹ Elinye lamathole lawo walibeka eBhethe-Eli, elinye walibeka eDani.

³⁰ Lokhu kwaba sisono. Abantu bakhamba bebayokufika eDani ukuze balotjhe itholelo lapho.

³¹ UJerobhowamu wakha amathempedlana emibundwini bewabeka nabaphristi abakhethe ebantwini abahlukahlukileko nanyana gade bangasi maLevi.

³² Wasungula umnyanya elangeni letjhumi nahlanu lenyanga yobumnane, okumnyanya ofana nowawuphele ubanjwe kwaJuda, wenza imihlabelo e-aldarini. Lokhu wakwenza eBhethe-Eli, wenzela namathole awenzileko imihlatjelo. NeBhethe-Elapho wabeka abaphristi ethempelini alenze emibundwini.

Isigwebo sakaZimu phezu kwe-aldari eBhethe-Eli

³³ UJerobhowamu wakhwelela e-aldarini alenze eBhethe-Eli. Lokhu wakwenza elangeni letjhumi nahlanu lenyanga yobumnane, okuyinyanga azikhethela yona ehliziywenakhe kobana enzele ama-Israyeli umhlatjelo. UJerobhowamu wakhwelela e-aldarinapho kobana enze umhlabelo.